بۇگىن ۇكىمەت وتىرىسىندا پرەمەر-مينيستر ولجاس بەكتەنوۆ ءار اكىم مەن سالالىق مينيسترلەردىڭ مىندەتىن اتادى, دەپ حابارلايدى Egemen.kz.
«ۇكىمەت ەكونوميكالىق پاتريوتيزم قاعيداتىن قاتاڭ ۇستاناتىن بولادى. ءبىز قاشاندا وتاندىق ءوندىرۋشىنى قولدايمىز. بۇل – ءاربىر اكىمنىڭ, ءاربىر سالالىق ءمينيستردىڭ مىندەتى. ول تەك ءسوز جۇزىندە عانا ەمەس, ناقتى ءىس جۇزىندە ورىندالۋعا ءتيىس. يمپورتتى الماستىرۋ جۇمىستارىن, ونىڭ ىشىندە وفتەيك-كەلىسىمشارتتار ارقىلى جانداندىرا ءتۇسۋ قاجەت. بۇل وتاندىق كومپانيالارعا وزدەرىن الداعى بىرنەشە جىلدار بويىنا تاپسىرىستارمەن قامتاماسىز ەتۋگە, جاڭا وندىرىستەردى كەڭەيتۋگە جانە يگەرۋگە مۇمكىندىك بەرەدى», دەدى ۇكىمەت باسشىسى.
سونىمەن قاتار پرەمەر-مينيستر قازىر كوپتەگەن ەلدەر, ءتىپتى ەكونوميكاسى جوعارى دامىعان ەلدەر دە وزدەرىنىڭ ىشكى نارىعىن قولداۋ جانە قورعاۋ ساياساتىن بەلسەندى تۇردە جۇرگىزىپ جاتقانىن اتاپ ءوتتى.
«مەملەكەت باسشىسى ءۇش جىل ىشىندە جەر قويناۋىن پايدالانۋشىلاردىڭ, كۆازيمەملەكەتتىك جانە مەملەكەتتىك سەكتورلاردىڭ ساتىپ الۋىنداعى قازاقستاندىق تاۋارلار مەن قىزمەتتەردىڭ 60 پايىزدىق ۇلەسىن قامتاماسىز ەتۋدى تاپسىردى. ولاردىڭ ىسكەرلىك بەلسەندىلىگى وتاندىق ءوندىرىستى دامىتۋدىڭ ۇلكەن رەزەرۆى», دەدى ولجاس بەكتەنوۆ.
بۇعان دەيىن, ۇكىمەت باسشىسى ىشكى نارىقتى قورعاۋ ءۇشىن وتاندىق تاۋار وندىرۋشىلەردىڭ ءتىزىمى جاسالاتىنىن مالىمدەگەن ەدى.