وسىدان ءتورت جىل بۇرىن مەملەكەت باسشىسىنىڭ ىجداعاتىمەن 10 تامىز «اباي كۇنى» دەپ بەكىتىلىپ, مەرەكەلەر قاتارىنا قوسىلدى. بۇل كۇنى ەلىمىزدىڭ ءار تۇكپىرىندە حاكىمنىڭ مۇراسى جان-جاقتى ناسيحاتتالىپ, ءان-جىرى شىرقالادى. ماسەلەن, استانا قالاسىنداعى ۇلتتىق اكادەميالىق كىتاپحانادا «ادامزاتتىڭ ابايى» اتتى اۋقىمدى ءىس-شارا ءوتتى.
ورايلى تۇستا ويعا تۇسىرەيىك. پرەزيدەنت قاسىم-جومارت توقاەۆ اقىننىڭ 175 جىلدىق مەرەيتويىندا سويلەگەن سوزىندە ابايدىڭ تۇلعالىق جانە قوعامدىق دامۋ ۇدەرىسىنىڭ قوزعاۋشى كۇشى ەكەنىن جەتكىزگەن ەدى. «اباي – مەملەكەت ءىسىنىڭ مۇددەلەسى, بىرلىگى جاراسقان جۇرت بولۋ يدەياسىنىڭ جاقتاۋشىسى. ول ءوز شىعارمالارى ارقىلى ەل ەڭسەسىن تىكتەۋگە زور ۇلەس قوستى. ۇلى اقىن ۇلتتى ۇيىستىرىپ, ادىلەتتى قوعام قۇرۋعا ۇندەيدى», دەپ ويشىلدىڭ اسىل مۇراسىن ارداقتاۋ, ونى سان قىرىنان دارىپتەۋ – بارشامىزدىڭ مىندەتىمىز ەكەنىن, ونىڭ ءار سوزىنە جەتە ءمان بەرىپ, استارىنا ءۇڭىلىپ, پاراسات-پايىمىنا بويلاي ءبىلۋ قاجەتتىگىن ايتقان بولاتىن.
سوعان وراي ۇلتتىق اكادەميالىق كىتاپحانا دا حاكىمنىڭ بولمىسى مەن شىعارماشىلىعىنا قاتىستى كەشەندى ءىس-شارالاردى جۇزەگە اسىردى. سونىڭ ءبىرى – «اباي – تۇتاس ءبىر الەم» تاقىرىبىنداعى كىتاپ كورمەسى. وندا ابايتانۋ سالاسىنداعى ۇزدىك زەرتتەۋ جۇمىستارى مەن اقىن تۋرالى جازىلعان كوركەم شىعارمالار ەل نازارىنا ۇسىنىلدى. كورمە قازاقستاننىڭ ەڭبەك سىڭىرگەن قايراتكەرى, ءانشى قالقاتاي قۇماربەكتىڭ ورىنداۋىنداعى ابايدىڭ ءانى «سەگىز اياقپەن» باستالىپ, بەلگىلى ولكەتانۋشى, قالامگەر قاليبەك التىباەۆتىڭ «اباي الەمىنە ساياحات» كىتابىنىڭ تانىستىرىلىمىمەن جالعاستى. «بۇل – حاكىمنىڭ جۇرەگىنە تەرەڭ بويلاۋ ءۇشىن ءار وقۋشى مەن مۇعالىمنىڭ قولىندا بولۋى ءتيىس كەڭەسشى كىتاپ. سىنىپ ساعاتتارىن وسى كىتاپ سۇراقتارىمەن تۇيىندەپ, ويىندىق ءتاسىل ارقىلى قورىتىپ وتىرۋ اقىن ءىلىمىنىڭ بالا ساناسىنا سىڭۋىنە وڭ ىقپالىن تيگىزەدى», دەيدى جازۋشى جانات ەلشىبەك.
سونىمەن قاتار اكادەميك شەرۋباي قۇرمانباي ۇلىنىڭ مودەراتورلىعىمەن عالىم, فيلولوگيا عىلىمدارىنىڭ دوكتورى, پروفەسسور شاكىر ىبىراەۆتىڭ «ابايتانۋدىڭ زاماناۋي دامۋى جايىندا» تاقىرىبىندا ءدارىسى ءوتتى.
قازىرگى تاڭدا اقىن شىعارمالارى شەت تىلدەرىنە كەشەندى تۇردە ءتارجىمالانىپ, الەمنىڭ بەدەلدى كىتاپحانالارىنا جىبەرىلىپ, ونداعى ەلشىلىكتەردىڭ جانىنان اباي ورتالىقتارى اشىلىپ جاتىر. سوعان وراي, كىتاپحانادا «اباي ولەڭدەرى الەم تىلدەرىندە» اتتى ءىس-شاراسى بولىپ ءوتتى. وندا اقىننىڭ «عىلىم تاپپاي ماقتانبا» ولەڭى الەمنىڭ توعىز تىلىندە وقىلدى.
اقىننىڭ شىعارماشىلىق الەمىندەگى نەگىزگى ماقسۇتى – ادام تاربيەسى. وسى تۇرعىدان العاندا ۇلت ۇستازى رەتىندە ابايدىڭ اعارتۋشىلىق قىزمەتىن باسا ايتقان ءجون. اقىن ءوزىنىڭ عاقليالارىندا ءبىلىم-عىلىم ىسىنە قادام باسۋ ءۇشىن تالاپ كەرەگىن, ونىڭ شارتتارى بارىن ەسكە سالادى. وقۋ-ونەرگە قۇشتارلىق ارمان-اڭسارمەن شەكتەلمەيدى. ونى تانىپ-ءبىلىپ, كوڭىلگە تۇيگەننىڭ ءمانى ايرىقشا. اسىرەسە ومىرلىك ۇستانىمنىڭ قالىپتاسار تۇسىندا جاس بالانىڭ تاربيەسىنە ءجىتى كوڭىل ءبولۋ كەرەكتىگىن ايتادى. بۇل تۇرعىدا ابايدىڭ ەرەسەكتەرگە عانا ەمەس, جاس ۇرپاققا دا تۇسىنىكتى بولۋى ماڭىزدى. وسى ماقساتتا نازارباەۆ ۋنيۆەرسيتەتىنىڭ پروفەسسورى گۇلتاس قۇرمانباي كىتاپحانانىڭ كىشكەنتاي وقىرماندارىمەن «بالا اباي» اتتى ستوريتەللينگ جانرىندا اشىق سۇحبات وتكىزدى.