كۇمىس سىڭعىرلاعان كۇن

ەل ءۇمىتىن ارقالاعان دەمەۋ

قاي جاعىنان بەزبەندەگەندە دە پاريج جازعى وليمپيا ويىندارى­نىڭ ون ەكىن­شى كۇنى ەنشىمىزگە بۇيىرعان قوس كۇمىس­تىڭ دە سالماعى ءزىل باتپان, دەسى باسىم. اتتەگەن-اي دا ىشىمىزدە كەتتى بىراق. دەمەۋ جادىراەۆتىڭ 44 جىلدان بەرى قازاق با­لۋاندارىنا جالىنان ۇستاتپاي كەلە جاتقان جازعى وليمپيا ويىندارىنىڭ التىن جۇلدەسىن ج ۇلىپ الاتىن مۇمكىندىگى تۋىپ-اق ەدى. نۇربەك­تىڭ دە ءتورت جىلدان بەرى تايعاناقتىق تانىتىپ, تەڭسەلىپ تۇرعان قازاق بوكسىنىڭ رۋحىن كوتەرىپ, كەتكەن ەسەمىزدى بۇتىندەيتىن مەزەتى ەدى. ءبىر كەم دۇنيە...

الدىمەن گرەك-ريم كۇرەسىنەن بۇ­يىرعان كۇمىس مەدال جونىندە بىرەر ءسوز. پاريج جازعى وليمپيا ويىندارىنا بۇل سالماقتا دەمەۋ جادىراەۆ ليتسەن­زيانى دا بەرتىندە قىرعىزستاننىڭ بىشكەك قالاسىندا وتكەن سوڭعى ىرىكتەۋ­دە يەلەندى. وقۋ-جاتتىعۋ جيىنىن دا جوعارى دەڭگەيدە وتكىزىپ, تاس-ءتۇيىن بارعان بالۋانعا جازعى وليمپيا ويىن­دارىنىڭ التىنى بۇيىرماي تۇر ەكەن. بىراق دەمەۋدىڭ ات بايلاعان بۇل بيىگى دە از ولجا ەمەس. ءتىپتى بۇل مەجەگە جەتۋدە تالاي «تار جول تايعاق كەشۋلەردەن» ءوتتى. 2021جىلى بولعان توكيو جاز­عى وليمپيا ويىندارىنا قاتىسىپ, العاشقى اينالىمدا-اق جارىس جولىنان ىعىسقان بالۋاننىڭ ارادا وتكەن ءۇش جىلدا بۋىرقانىپ شىعا كەلەتى­نىن كۇللى الەم كۇتە قويعان جوق. ءتىپتى ءبىرىنشى بەلدەسۋىندە كولۋمبيالىق حاير الەكسيس كۋەرونى ايقىن ۇتقان­دا دا جاۋىرىنشىلار ەكىنشى كەزەڭدە ەكى دۇركىن الەم چەمپيونى, توكيو جازعى وليمپيا ويىندارىنىڭ كۇمىس جۇلدەگەرى, قىرعىزدىڭ ماقتانىشى اقجول ماحمۇدوۆتىڭ مىسىن باسا المايدى دەپ تە تون ءپىشتى. وزىنەن 9 جاس كىشى «قىرعىز اكۋلاسىنا» جادىراەۆتىڭ بۇعان دەيىن دە جىبەرگەن ەسەسى از ەمەس ەدى. قىرعىز ەلىندە وتكەن ازيا چەم­پيو­ناتىندا جەڭىلدى. سونى مالدانعان ساۋەگەيلەر شيرەك فينالدا دەمەۋدىڭ اقجولدى ىعىستىرادى دەگەنگە اسا سەنىم ارتا قويعان جوق. ال ءبىزدىڭ وعلان جەردىڭ استىن ۇستىنە اۋدارىپ, تاريحي جەڭىستى ج ۇلىپ الدى. سالقىنقاندى بالۋان اسىعىپ-اپتىققان جوق, بايىپپەن بەلدەسىپ, داڭقتى قارسىلاسىنان ايلاسىن اسىردى. جارتىلاي فينالدا الەم چەمپيوناتىنىڭ ەكى دۇركىن كۇمىس جۇلدەگەرى, ەۋروپا چەمپيونى ازەربايجان بالۋانى سانان سۇلەيمانوۆتى دا سانسىراتىپ كەتتى. بۇعان دەيىن وسى بالۋانعا ەكى رەت ەسە جىبەرىپ, جالى جىعىلعان جادىراەۆ بۇل جولى مىنەز تانىتىپ, تەگەۋرىندى قارسىلاسىنان باسىم ءتۇستى. پاريج جازعى وليمپيا ويىندارىنىڭ في­نال­دىق بەلدەسۋىندە جەرلەسىمىزدى جاپو­نيانىڭ ءۇمىتى, 23 جاستاعى وعلان ناو كۋساكا كۇتىپ تۇردى. ازيا چەمپيونى, الەمدىك رەيتينگتە 77 كگ سالماقتىڭ كوشىن باستاپ تۇرعان ناو نويان جاستىق جىگەرىمەن وليمپيادانىڭ التىن مەدا­لىن يەلەندى. ءسوز جوق, دەمەۋ تاريحي جە­ڭىس­كە جەتەتىن, 44 جىل بۇرىن جاقسى­لىق ۇشكەمپىروۆ پەن ءشامىل سەرىكوۆ­تىڭ ماسكەۋ وليمپيا ويىندارىندا التىن مەدال ولجالاپ, شىڭعا شىققان جەڭى­سىن قايتالاعان ءۇشىنشى قازاق وعلانى اتاناتىن مۇمكىندىكتى ۋىسىنان سۋسى­تىپ الدى. ءتىپتى ءبىرىنشى كەزەڭدە 1 ۇپاي ­الىپ, العا ۇزاعان دا ەدى. تورەشى جاپون­نىڭ قيمىلى سىلبىر دەپ تورتتاعان­عا قويدى. دەمەۋ ءۇشىن ەڭ وڭتايلى ءسات وسى ەدى. بۇعان دەيىن جازعى وليمپيا ويىندارىنىڭ جۇلدەگەرى, الەم چەمپيونى دەگەن اتاققا يە قارسىلاستا­رىن ولاي دا, بىلاي دا بۇراي اۋناتىپ, ايقىن جەڭگەن جەرلەسىمىزدىڭ كۋساكاعا كەلگەن­دە قولىنىڭ قارى تالعانداي كورىندى. ەكىن­شى كەزەڭدە ءتىپتى كۇتپەگەن جەردەن ناو­نىڭ تۇزاعىنا ءتۇسىپ قالدى.

ماراپاتتاۋ راسىمىنەن كەيىن وليم­پيا ويىندارىنداعى بەلدەسۋىنە, فينال­دىق تارتىس تۋراسىندا پىكىر بىلدىرگەن بالۋان وزىنە جۇكتەلگەن جاۋاپكەرشىلىك­تىڭ تىم جوعارى بولعانى دا كوڭىلىن تولقىتىپ جىبەرگەنىن جاسىرمادى.

«دايىندىق ءبارى ويداعىداي ءوتتى, تاس-ءتۇيىن ءازىر بولدىم. فينالدىق بەلدەسۋگە دەيىن بار كۇشىمدى سارقا كۇرەستىم, سوڭعى اسۋعا كەلگەندە قايراتىمدى كورسەتە ال­ماعانىم وكىنىشتى. بۇعان دەيىن دە الەم چەمپيوناتىنىڭ فينالىندا بەلدەستىم, ازيا بىرىنشىلىگى, باسقا دا حالىقارالىق سايىستاردا جىعىلساڭ, وكىنىش اسا قاتتى قىسا قويمايدى, ال وليمپيادانىڭ دۋى, مىسى مۇلدە بولەك ەكەن. تەگەۋرىندى بالۋانداردى جىعىپ, فينالعا جەتكەننەن-اق جانكۇيەرلەر وليمپيادا چەمپيو­نى دەپ قابىلداپ قويدى عوي دەيمىن. ءوزىمنىڭ ىشكى بۋىرقانىسىمدى باسقا­را الماي قالدىم. ماراپاتتاۋ كەزىندە «جاپونيانىڭ تۋى ورنىندا ءبىزدىڭ كوك بايراعىمىز جەلبىرەۋگە ءتيىس ەدى عوي» دەگەن وكىنىش وزەگىمدى ورتەگەندە, ءىشىم الاي-دۇلەي بولدى. بىراق كۇمىس مەدال بۇيىرعان ەكەن, بۇعان دا شۇكىرشىلىك ەتەمىن. قازاق ەلىنە التىن مەدال تارتۋ ەتكىم كەلىپ ەدى, امال قانشا», دەدى دەمەۋ.

دەمەۋدىڭ العاشقى باپكەرى جۇماحان تۇرعانبەكوۆ شاكىرتىنىڭ فينالدىق بەلدەسۋىنە قاتىستى پىكىرىن ايتتى. قوناەۆ قالاسىنداعى ساياباقتا كوپشىلىكپەن قاتار وتىرىپ بەلدەسۋدى تاماشالاعان بىلىكتى مامان قازاق وعلانىنىڭ وراسان جەتىستىگىنە رازى ەكەنىن جەتكىزدى.

«دەمەۋ بالا كۇنىنەن تورتتاعاندا ۇپاي الۋعا سامداعاي ەدى. قارسىلاسىن اش بەلىنەن قاپسىرا ۇستاپ, كەۋدەسىنەن اسىرا لاقتىرۋعا اسىق بولاتىن. جاپون بالۋانىمەن بۇعان دەيىن دە بەلدەسىپ ەسە جىبەرگەن ەدى, قىر-سىرىن تەرەڭ بىلەدى. وزىنە دە ايتقانمىن, اقىلمەن بەلدەسۋ كەرەك دەپ. ىشكى سەزىمدى, تولقىنىستىڭ ءبارىن دە سابىرمەن بايىپتاپ, اقىلعا جەڭدىرۋ قاجەت. ءسال اسىعىپ كەتكەندەي كورىندى. كۇمىس مەدال دا از ولجا ەمەس. الاقانداي عانا ءۇشارال اۋلىنان ەكىن­شى شاكىرتىم جازعى وليمپيا ويىن­دارىنىڭ كۇمىس مەدالىن ولجالادى. 2008 جىلى بەيجىڭدە شاكىرتىم نۇرباقىت تەڭىزباەۆقا بۇيىرعان وليم­پيادا مەدالى, مىنە, اراعا 16 جىل سالىپ دەمەۋدىڭ كەۋدەسىندە جارقىرادى. جاراتقانعا سانسىز شۇكىرشىلىك ايتامىن», دەدى بىلىكتى مامان.

بەيجىڭ جازعى وليمپيا ويىن­دارى­نىڭ كۇمىس جۇلدەگەرى, جاستار اراسىندا الەم چەمپيونى نۇرباقىت تەڭىزباەۆ پاريج كىلەمى دەمەۋ جادىراەۆ ءۇشىن قۇتتى ەكەنىن قايىرا ەسكە سالدى.

«بالۋاندارىمىز فرانتسياعا اتتا­ناردا, پاريج كىلەمىنەن دەمەۋ ولجا­سىز ورالمايتىنىنا سەنىمدى ەكەنى­مىزدى ايتىپ, تىلەۋلەستىك بىلدىردىك. 2017 جىلى الەم چەمپيوناتى پاريجدە ءوتىپ, دەمەۋ فينالدا نەمىس بالۋانىنا ەسە جىبەرىپ, كۇمىس جۇلدەگەر اتانىپ ەدى. ەندى, مىنە, جازعى وليمپيا ويىن­دارىنىڭ كۇمىس مەدالىن ولجالادى. بار­شا جانكۇيەر شى­نى كەرەك, دەمەۋ­دەن التىن كۇتتى. ونىڭ فينالعا دەيىن وتكەرگەن بەلدەسۋلەرى التىن مەدال الادى دەگەن سەنىمىمىزدى نى­عايتتى. دەگەن­مەن كۇرەس بولسىن, باسقا سپورت بولسىن, فينالعا تەك مىقتىلار شىعادى. سول مىقتىنىڭ اراسىندا ءبىزدىڭ دەمەۋ دە بولدى. وسىنداي تاريحي ساتتە ەلىمىزدىڭ جەتىستىگىمەن قۇتتىقتايمىن. بۇل جەڭىستى دەمەۋدىڭ ەلىمىزگە, تۋعان اۋىلىمىزعا سىيلاعان ۇلكەن سىيى دەپ بىلەمىن», دەدى كەگەن اۋدانىنىڭ اكىمى ن.تەڭىزباەۆ.

گرەك-ريم كۇرەسىنەن ۇلتتىق قۇرا­­ما­نىڭ باس باپكەرى يۋري مەلنيچەن­كو دەمەۋ­دىڭ فينالدىق بەلدەسۋدە با­رىن سال­عانىن, بىراق ءسال ايىلىن ەرتە بوساتىپ بوساڭدىق تانىتقاندا جاپون كۋساكا ۇرىمتال ءساتتى وڭتايلى پايدالانىپ كەتكەنىن جەتكىزدى.

پاريج جازعى وليمپيا ويىندارىنا گرەك-ريم كۇرەسىنەن 60 كگ سالماق دارە­جەسىندە ايدوس سۇلتانعالي ەكىنشى اينالىمدا ەكى دۇركىن الەم چەمپيونى قىرعىز جولامان شارشەنبەكوۆكە ەسە جىبەرىپ, جارىستى اياقتاعان. 130 كگ سال­ماقتا ءالىمحان سىزدىقوۆ تا ءبىرىنشى بەلدەسۋىندە رۋمىن الىبى الين الەك­سۋستى جىعىپ, شيرەك فينالدا ازەر­بايجان بالۋانى ساباح شارياتيگە ەسە جىبەردى. 87 كگ سالماقتا پاريج جازعى وليمپياداسىنىڭ دوداسىنا قوسىلعان نۇرسۇلتان تۇرسىنوۆ تا ەكىنشى اسۋدان اسا المادى. ول 8/1 فينالدا ەگيپەتتىك موحاممەد مەدۆالليدى 10:1 ەسەبىمەن ايقىن جەڭگەن. شيرەك فينالدىق بەلدەسۋدە ەكى دۇركىن الەم چەمپيونى, توكيو جازعى وليمپيا ويىندارىنىڭ جەڭىم­پازى, ۋكراينا ەلىنىڭ نامىسىن قورعاعان كۋبالىق جان بەلەنيۋككە ەسە جىبەردى.

نار تۇلعالى نۇربەك

بوكسشىلار ءۇشىن پاريج جازعى وليم­­پيا ويىندارىنىڭ الامانى مارە­سىنە جەتتى. ەلىمىزدىڭ ەرلەر قۇرا­ماسى پاريج تورىنە توڭىرەگى تۇگەل بارعان. وليمپيادالىق 7 سالماقتا جەتى جام­پوز دوداعا قوسىلعان. التى وعلاننىڭ جارتىلاي فينالعا جەتپەي, اتىنان اۋىپ قالعانى از سىنالمادى. ەرىنبەگەننىڭ ءبارى قازاق بوكسىنىڭ «جانازاسىن شىعا­رۋ­عا» اسىقتى. باسىنان الاعاي دا بۇلا­عاي كۇيدى كەشىپ جاتقان بوكس سپورتى­نىڭ اينالاسىنداعى داۋ ودان بەتەر ءورشي تۇسكەندەي. پاريج جازعى وليمپيا ­ويىن­دارىندا تورەشىلەردىڭ قىساس­تىعى تالاي ساڭلاقتىڭ ساعىن سىندىرىپ, ەتەگىن جاسقا تولتىرعانى جانە انىق.

بوكستان ۇلتتىق قۇرامانىڭ باس باپ­­كەرى لاۋازىمىن ءۇشىنشى مارتە تىز­­گىن­دە­گەن مىرزاعالي ايتجانوۆ پا­­ريج­­­گە جۇ­رەر الدىندا ءۇش مەدال (1 ال­­تىن, ­1 كۇ­­مىس, 1 قولا) ولجالاۋعا با­رىن سالا­­تى­­نىن ايتقان. بىراق مامان­نىڭ دە­گەنى بول­عان جوق. جەتى جىگىتتىڭ تەك بى­رەۋى عانا سەنىمگە سەلكەۋ تۇسىرمەي ءۇمىت­­­تى اقتادى. 80 كگ سالماقتا جازعى وليم­پيا ويىن­دارىنا العاش قاتىسقان نۇر­بەك ورال­باي فينالدا ۋكراينا­لىق الەك­ساندر حيجنياكقا ەسە جىبەرىپ, كۇمىس مەدالدى مىسە تۇتتى. سالتاناتتى مارا­پات­تاۋ راسىمىنەن كەيىن نۇربەك مەدا­لىن موينىنان الىپ تۇعىردان كوڭىل­سىز ءتۇسىپ كەتتى. ىشىندەگى الاي-دۇلەي توپا­لاڭ­دى قالىڭ جانكۇيەرى دە ءتۇسىندى. ۇلت­تىق قۇراماداعى بوكسشىلاردىڭ كەي­بىرىن تورەشىلەر بەل­دەن باسىپ, جەڭى­سىن ۇرلاعانى دا جام­پوزدىڭ جانىنا باتقانى انىق. امال قاي­سى, بەس قازى حيج­نياكتىڭ دەسى باسىم ءتۇستى دەگەندى العا تارتتى. «بەكەر ادام تاز بولمايتىنى» سەكىلدى ۋكراينالىق بوكسشىنى وسال دەۋگە كەلمەيدى, قاشاندا شىن مىق­تىعا تۇساۋ جوق. جيىپ-تەرگەن تاجى­­ري­بەسى جاعىنان دا جوعارى بولدى. 2021 جىلى توكيو جازعى وليمپيا ويىن­دارىنىڭ فينالىندا برازيليا­لىق كون­سەساون سۇلاتىپ تۇسىرمەگەندە حيج­نياك وليمپيادا چەمپيونى اتانار ەدى. ورشە­لەنە العا ۇمتىلامىن دەپ وڭ­باي سوققى الىپ وماقاسا قۇلاعان. ودان بەرى ول ءوزىنىڭ وسى ولقىلىعىن بۇتىن­­دەپ, قاتەلىگىن تۇزەۋگە بارىن سالعانىن ­پاش ەتتى. قانجىعاسىندا جازعى وليمپيا ويىن­­دارىنىڭ كۇمىسى مەن التىنى بار ەندى.

الەم چەمپيونى نۇربەكتىڭ وسىنداي قارسىلاستىڭ تەگەۋرىنىن تويتارىپ, بارىن سالا ايقاسۋى دا – جەڭىسكە پارا-پار ءىس. جازعى وليمپيا ويىندارىنىڭ كۇمىسىن بوكسشىلارىمىز ۇنەمى كوسىپ ولجالاپ جاتقان جوق. ءوزىنىڭ العاشقى وليمپياداسىنا ات بايلاعان نۇربەك ءبىرىنشى جەكپە-جەگىندە اۋستراليالىق كاللۋم پيتەرستى ايقىن ۇتتى. شيرەك فينالدا ازەربايجان بوكسشىسى مۇرات اللاحبەرديەۆتى ىعىستىردى. جارتى­لاي فينالدا دومينيكاندىق كريستيان پيانلەستى 2:3 ناتيجەسىمەن ەڭسەرگەن. نۇربەكتىڭ ولجالاعان كۇمىس مەدالىنىڭ مىسى التىنمەن پارا-پار. قازاقستان تاۋەلسىزدىگىن العان 1991 جىلدان بەرى جازعى وليمپيا ويىندارىنا سەگىزىن­شى مارتە قاتىستىق. سونىڭ ىشىندە التى بىردەي الاماننان بوكسشىلارىمىز التىن مەدالسىز قايتقان جوق. تەك توكيو­داعى (2020) ەكى قولا مەدالدى مىسە تۇتقان سوڭ-اق قازاق بوكسىنىڭ اينا­لا­سىنداعى ابىڭ-كۇبىڭ اڭگىمە ۇدەي ءتۇسىپ ەدى, پاريجدەن كەيىن دە قىرىق اتانعا جۇك بولار سىن ايتىلاتىنى انىق.

جازعى وليمپيادا ويىندارىنان نۇربەكتىڭ سالماعىندا ولجا سالعان وع­لان­دارىمىز ساناۋلى عانا. 1996 جىلى اتلانتا جازعى وليمپيا ويىندارىندا ۆاسيلي جيروۆ (81 كگ) چەمپيون اتانىپ, وليمپيادانىڭ ۇزدىك بوكسشىسىنا بەرىلەتىن ۆەل باركەر كۋبوگىن يەلەندى. 2008 جىلى بەيجىڭ جازعى وليمپيا ­ويىندارىندا ەركەبۇلان شىناليەۆ ­81 كگ سالماقتا قولا جۇلدەنى قانجىعاسىنا بوكتەردى. 2012 جىلى لوندون جانە 2016 جىلى ريو جازعى وليمپيا ويىندارىندا ادىلبەك نيازىمبەتوۆ (81 كگ) ەكى مارتە كۇمىس مەدال ەنشىلەدى. ارادا وتكەن 8 جىلدا نۇربەك ورالباي ولقى تۇسىمىزدى بۇتىندەپ, بۇيىرماي تۇرعان كۇمىستى تارتۋ ەتتى.

ۇلتتىق قۇرامانىڭ باس باپكەرى مىر­زاعالي ايتجانوۆ پاريجدەگى تار­تىستى قورىتىندىلاپ, بوكسشىلار بارىن سالعانىن ايتتى.

«فرانتسياداعى بۇل جازعى وليمپيا­دا ءبىز ءۇشىن, ياعني بوكسشىلارىمىزعا وتە ءساتسىز بولدى. جەڭىلىستىڭ سەبەبىن بى­رەۋگە اۋدارمايمىز, بۇيىرماعان ەكەن التىن مەدال. كوپشىلىك جىگىتتەردىڭ في­زيكالىق دايىندىعىنا قاتىستى سىن ايتىپ, شارشاپ قالاتىنىن سىناپ جاتىر. بوكسشىلار بارىن سالىپ ايقاستى, شارشاعان جوق. ەشقايسىسىنىڭ دا جە­ڭىستى قولدان بەرەتىندەي جىگەرى جاسى­دى دەي المايمىن. دەگەنمەن دە بۇل – ۇلكەن ساباق. بۇدان ارى قاراي مىقتى, قايرات­تى بولۋعا قامشىلايدى. قازاق بوكسى اياعىنان نىق تۇرىپ, ەڭسەسىن تىكتەيتىنىنە سەنىمدىمىن», دەدى باس باپكەر.

م.ايتجانوۆتىڭ كۇيىنەتىندەيى دە بار. ول ۇلتتىق قۇرامانىڭ باس باپكەرى لاۋا­زىمىن العاش تىزگىندەپ, لوندون جازعى وليمپيا ويىندارىنا باردى. ۇلت­تىق قۇراما بوكسشىلارى 1 التىن, 1 كۇمىس, 1 قولا مەدال ولجالادى. 2016 جىلى برازيليانىڭ ريو قالا­سىندا وتكەن جازعى وليمپيا دودا­سىندا ايتجا­نوۆ ۇكىلەپ قوسقان بوكس­شىلار 1 التىن, ­2 كۇمىس, 1 قولا مەدال­عا قول جەتكىز­دى. 2009-2018 جىلدارى ەكى وليمپيادا­لىق تسيكلدا ۇلتتىق قۇرا­مانى باپتاعان ايتجانوۆقا 2023 جىل­دىڭ قاڭتار ايىندا وسى قىزمەت تاعى دا جۇك­تەلگەن ەدى. ناتيجەسى – 1 كۇمىس مەدال عانا. قازاق بوكسىنىڭ التىن ­بۋىنى كەلىپ, ەڭكەيگەن ەڭسەمىزدى تىكتەپ, قاشان جارقىرايتىنى – ۋاقىتتىڭ ەنشىسىندە.

ىرىكتەۋدەن اسا المادى

پاريجدەگى كەزەكتى جارىس كۇنىندە دوداعا قوسىلعان سپورتشىلارىمىز ءۇمىت­­تى اقتاي المادى. ۆەلوترەكتەن سپرينت باعدارلاماسىندا ىرىكتەۋ دوداسىنا قوسىلعان اندرەي چۋگاي 30-ساتىعا ورنى­عىپ, قويۋ شاڭنىڭ ىشىندە قالدى. تاەكۆوندودان ساميرحون اباباكي­روۆ ءۇشىن جەرەبە اۋىر ءتۇستى. 58 كگ سال­ماق دارە­جەسىندە وليمپيادا تارتىسىنا شىق­قان جەرلەسىمىز العاش­قى اينا­لىمدا-اق ەسە جىبەردى. توكيو جاز­عى وليمپيا ويىندارىنىڭ چەمپيو­­نى, الەم بىرىنشىلىگىنىڭ جەڭىمپازى ايگىلى يتاليالىق ۆيتو دەللاكۆيلعا جول بەر­دى. تارتىستى ايقاستا ۇپاي سانىمەن الدا تۇرعان ساميرحون سوڭعى 40 سەكۋند قالعاندا بوساڭدىق تانىتىپ, جەڭىستى ۋىسىنان سۋسىتىپ الدى.

بايداركا مەن كانوە ەسۋدە دە ازىرگە ەنشىمىزگە مەدال بۇيىرماي تۇر. سەر­گەي ەمەليانوۆ كانوەدە 1 000 مەترگە جا­رىس جولىنا شىعىپ, ءوز توبىندا 4-ورىن­دى قاناعات تۇتتى. بايداركادا (1 000 مەتر) بەكارىس راماتۋللا ىرىكتەۋدە جوعا­رى ناتيجەگە قول جەتكىزە المادى.

ازىرگە قازاقستان سپورتشىلارى پاريج جازعى وليمپيا ويىندارىنان 1 التىن, 3 كۇمىس, 3 قولا مەدال ولجالاپ, جالپى ەسەپتە 28-ساتىعا ورنىقتى.

ەركىن كۇرەس بالۋاندارى دا وليم­پيا­دا دوداسىن ءساتسىز باستادى. 86 كگ سال­ماق­تا بەلدەسكەن الەم چەمپيوناتىنىڭ جۇل­دەگەرى ازامات داۋلەتبەكوۆ العاشقى اينا­لىمدا امەريكالىق اارون برۋكسقا 3:4 ەسەبىمەن جول بەردى. 57 كگ سالماقتا مەي­رامبەك قارتباي قىرعىز بالۋانى بەك­زات الماس ۇلىنان اسا الماي جەڭىلىس تاپتى.