سەنات دەپۋتاتى نۇرتورە ءجۇسىپ «Egemen Qazaqstan», «كازاحستانسكايا پراۆدا», «انا ءتىلى», «بالدىرعان», «ۇيعىر اۆازي» باسىلىمدارىن بىرىكتىرەتىن «قازاق گازەتتەرى» جشس-نىڭ الماتىداعى فيليالىنىڭ قىزمەتكەرلەرىمەن كەزدەستى. سەناتور ءداستۇرلى بۇقارالىق اقپارات قۇرالدارىن ترانسفورماتسيالاۋ, ءسوز بوستاندىعىن قورعاۋ, جۋرناليست مارتەبەسىن بەكىتۋ جونىندەگى مەملەكەتتىك رەفورمالار جانە پارلامەنت قابىلداعان «ماسس-مەديا تۋرالى» زاڭداعى وزگەرىستەر تۋرالى ايتىپ بەردى.
كەزدەسۋگە قاتىسۋشىلار جۋرناليستيكانى دامىتۋ, بۇقارالىق اقپارات قۇرالدارىنىڭ جاس قىزمەتكەرلەرىن, بلوگەرلەردى جانە جاڭا كەزەڭ جۋرناليستەرىن قولداۋ ماسەلەلەرىن تالقىلادى. نۇرتورە ءجۇسىپ قازىرگى قوعامنىڭ ىرگەتاسى ساپالى اقپارات ەكەنىن اتاپ ءوتتى. اقپارات تاراتۋدىڭ نەگىزگى قۇرالىنىڭ ءبىرى رەتىندە مەرزىمدى ءباسپاسوز قوعامدىق پىكىر قالىپتاستىرۋدا, وزەكتى وقيعالاردى جاريالاۋدا ماڭىزدى ءرول اتقارىپ كەلەدى.
«گازەتتەر مەن جۋرنالدار ءبىلىم كوزى رەتىندە جانە ادام قۇندىلىقتارىن قالىپتاستىرۋدا قوعام ومىرىندە ماڭىزى زور. مەملەكەت ءتيىستى زاڭداردى قابىلداۋدا جانە وتاندىق بۇقارالىق اقپارات قۇرالدارىنىڭ دامۋىن بەلسەندى تۇردە قولداپ كەلەدى. پارلامەنت قابىلداعان «ماسس-مەديا تۋرالى» زاڭ – وسى جولداعى ماڭىزدى قادامنىڭ ءبىرى. ول بۇقارالىق اقپارات قۇرالدارى سالاسىنداعى قولدانىستاعى بىرنەشە زاڭنىڭ ەرەجەلەرىن بىرىكتىرىپ وتىر. وندا مەملەكەتتىك ەمەس بۇقارالىق اقپارات قۇرالدارىنا ارنالعان گرانت ارقىلى مەملەكەتتىك اقپارات ساياساتىن قارجىلاندىرۋدى جەتىلدىرۋ, سۇراقتاردى قاراۋ مەرزىمىن قىسقارتۋ, ءجۋرناليستىڭ كاسىبي قىزمەتىنە قۇقىقتىق كەپىلدىك بەرۋ, سونداي-اق بۇقارالىق اقپارات قۇرالدارىنىڭ ءوزىن-ءوزى رەتتەۋى جانە ءجۋرناليستىڭ ادەپ كودەكسىن ازىرلەۋ جونىندەگى قوعامدىق-كاسىبي كەڭەس قۇرۋ سياقتى وزگەرىستەر بار. بۇل زاڭ ەلىمىزدىڭ مەديا كەڭىستىگىن دامىتۋداعى ماڭىزدى قادام بولىپ وتىر», دەدى نۇرتورە ءجۇسىپ.
تاراپتار جۋرناليستەردى دايارلاۋ, ماماندىق ەتيكاسى جانە جۋرناليستيكادا جاساندى ينتەللەكتتى پايدالانۋ كەلەشەگى ماسەلەلەرىن دە تالقىلادى.