الداعى 8-14 قىركۇيەك ارالىعىندا استانادا وتەتىن دۇنيەجۇزىلىك كوشپەلىلەر ويىندارىنىڭ ءدۇبىرى دە جاقىنداپ قالدى. جالپاق الەم كوز تىگىپ وتىرعان اۋقىمدى ءىس-شاراعا ەلوردا قىزۋ دايىندىق ۇستىندە. اسىرەسە شاھاردىڭ ءار بولىگىندە اسەم بەزەندىرىلگەن ۇلتتىق ناقىشقا تولى دۇنيەلەر كوزدىڭ جاۋىن الادى. سونىڭ ءبىرى – بەيبارىس سۇلتان كوشەسىنىڭ بويىنداعى كوپقاباتتى تۇرعىن ءۇيدىڭ قابىرعاسىنا سالىنعان «بۇركىتشى» اتتى جاڭا مۇرال.
مۇرالدىڭ بيىكتىگى – 16 مەتر. وندا بۇركىتتىڭ توماعاسىن سىپىرىپ, بالاقباۋىن شەشىپ, اسپانعا ەركىن قويا بەرگەن بۇركىتشىنىڭ بەينەسى بەدەرلەنگەن. بۇل كورىنىس كوشپەلىلەر ويىندارىن بىلدىرەدى. سۋرەتتىڭ مازمۇنىندا اسقارالى تاۋ, ونىڭ ەتەگىندەگى اق بوز كيىز ۇيلەر, جايقالعان كوك مايسا, قىسقاسى, وسى سايىن دالادا ەركىن ءومىر ءسۇرىپ, ءوز ءداستۇرى مەن مادەنيەتىن دامىتقان كوشپەلىلەردىڭ بەكزاتتىعى, تەكتىلىگى, ەر كوڭىلدىلىگى شىنايى كوركەمدەلگەن. ءبىر سوزبەن ايتقاندا, «بۇركىتشى» بەينەسى ادامعا رۋح بەرەدى.
ايتا كەتەيىك, دۇنيەجۇزىلىك كوشپەلىلەر ويىنى – ەتنيكالىق سپورت تۇرىنە ارنالعان حالىقارالىق جارىس. وعان كوشپەلى ءومىر رۋحىن كورسەتەتىن ورتالىق ازيا ەتنوستارىنىڭ حالىقتىق ويىندارى كىرەدى. باس شاھاردا وتەتىن ۇلكەن ءىس-شاراعا الەمنىڭ 89 ەلىنەن 2000-عا جۋىق سپورتشى قاتىسپاق.