پاريج وليمپياداسىنىڭ جارتىلاي فينالىندا قىتايلىق ۆۋ يۋگە ەسە جىبەرگەن نازىم قىزايباي جەڭىسىن قولداۋ بىلدىرگەن كوپشىلىككە ارنايتىنىن ايتتى, دەپ حابارلايدى Egemen.kz.
«ايەلدەر بوكسىنان قازاقتان شىققان تۇڭعىش وليمپيادا چەمپيونى اتانۋ ارمانىم بولدى. دزيۋدوشى قىزدارمەن پاريجدە جولىققاندا دا سونى ءبىر بىرىمىزگە تىلەدىك. قازىر وزىمە اسا كوڭىلىم تولىپ تۇرعان جوق. ويتكەنى التىن العىم كەلدى جانە جەڭۋگە بولاتىن قارسىلاس ەدى. الايدا قىتاي قىزى جەكپە جەك بارىسىندا الداپ كەتتى. وعان قوسا مەندە «قولاعا جەتتىڭ, ەندى التىن الۋ كەرەك» دەگەن جۇكتەمە تۇرعانداي بولدى. سول كەدەرگى كەلتىرگەندەي. جەڭسەم دە, جەڭىلسەم دە قاسىمنان تابىلاتىن وتباسىما, دوستارىما راقمەت ايتامىن!جەڭىسىمدى ماعان قولداۋ كورسەتكەن كوپشىلىككە ارنايمىن», دەدى ن.قىزايباي.
ەسكە سالايىق, ۇلتتىق قۇراما بوكسشىسى نازىم قىزايباي پاريج وليمپياداسىنىڭ جارتىلاي فينالىندا حانچجوۋداعى جازعى ازيا ويىندارىنىڭ جەڭىمپازى, الەم چەمپيونى قىتايلىق ۆۋ يۋدان جەڭىلىپ قالدى. وسىلايشا ول وليمپيادانىڭ قولا جۇلدەسىن مىسە تۇتتى.