وزبەكستان الداعى ۋاقىتتا جەمىس-جيدەك, كوكونىس جانە ازىق-ت ۇلىك ونىمدەرىنىڭ ەكسپورتىن 3,5 ملرد دوللارعا دەيىن ارتتىرۋعا نيەتتى. بىلتىر اۋىل شارۋاشىلىعى سالاسىنداعى ءوسىم 4,1 پايىزدى قۇراپ, ءونىم ەكسپورتىن 2 ملرد دوللارعا جەتكىزگەن ەدى. قازاقستان مەن وزبەكستان اراسىندا دا اۋىل شارۋاشىلىعى باعىتىنداعى تاۋار اينالىمى ءساتتى جولعا قويىلعان.
ەلىمىز وزبەكستانمەن ءساتتى ساۋدا تىزبەگىن ورناتۋعا نيەتتى. قازىر تاراپتار اراسىندا ەت ونىمدەرىن وندىرەتىن, وڭدەيتىن, كوكونىستەر مەن جەمىس-جيدەكتەردى قاپتايتىن, مايلى داقىلدار, بيداي, كارتوپ وسىرەتىن بىرلەسكەن كاسىپورىندار اشۋ مۇمكىندىگى قاراستىرىلىپ جاتىر. مۇنى وسىدان ەكى جىل بۇرىن مەملەكەت باسشىسىنىڭ ءوزى ارنايى ايتىپ وتكەن ەدى.
قازاقستان مەن وزبەكستان اۋىل شارۋاشىلىعى سالاسىندا ىنتىماقتاستىق اياسىن جىل سايىن كەڭەيتىپ كەلەدى. بيىل جىل باسىندا وتكەن ەۋرازيالىق ۇكىمەتارالىق كەڭەس وتىرىسى قارساڭىندا ەكى مەملەكەتتىڭ ۇكىمەت باسشىلارى كەزدەسىپ, كەلىسسوز جۇرگىزدى. جيىندا ايتىلعانداي, وزبەك ينۆەستورلارى قازاق جەرىندە جەمىس-جيدەكتى وڭدەۋ زاۋىتتارىن سالعىسى كەلەدى. ال ءبىزدىڭ كاسىپكەرلەر وزبەكستاندا بيداي وڭدەۋ كاسىپورنىن سالىپ, ۇن ەكسپورتىن ەسەلەۋدى جوسپارلاپ وتىر. تاراپتار سونداي-اق تسيفرلىق ترانسفورماتسيا, سۋ شارۋاشىلىعى سالاسىنداعى كەڭ اۋقىمدى ماسەلەلەردى تالقىلاعان ەدى.
جاقىندا عانا ەلىمىزدىڭ وزبەكستانداعى توتەنشە جانە وكىلەتتى ەلشىسى بەيبىت اتامقۇلوۆ پەن وزبەكستان رەسپۋبليكاسىنىڭ اۋىل شارۋاشىلىعى ءمينيسترى يبروحيم ابدۋراحمونوۆ كەزدەستى. كەزدەسۋ باۋىرلاس ەكى ەلدىڭ اۋىل شارۋاشىلىعى سالاسىنداعى ەكىجاقتى ىنتىماقتاستىقتىڭ بۇگىنگى جاي-كۇيى مەن دامۋ كەلەشەگىن تالقىلاۋعا نەگىزدەلگەن. كەلىسسوز بارىسىندا اۋىل شارۋاشىلىعى داقىلدارىن بىرلەسىپ ءوسىرۋ جوبالارىن جۇزەگە اسىرۋ, استىق وڭدەۋ كلاستەرىن قۇرۋ ماسەلەلەرى كەڭىنەن ءسوز بولدى.
ايتا كەتۋ كەرەك, ەلىمىزدەن كورشى ەلگە بيداي, ەت, ۇن, وسىمدىك مايى, كارتوپ, ارپا ەكسپورتتالسا, وزبەكستاننان جەمىس-جيدەك پەن كوكونىس, سارىمساق, پياز يمپورتتالادى. 2023 جىلدىڭ قىركۇيەگى مەن 2024 جىلدىڭ مامىرى ارالىعىندا قازاقستان وزبەكستانعا 130,5 مىڭ توننا ارپا ەكسپورتتاعان. بۇل الدىڭعى جىلدىڭ كورسەتكىشىنەن 7 پايىزعا جوعارى. ەلىمىز بۇل الەۋەتتى ودان ءارى ارتتىرۋعا مۇددەلى. اتاپ ءوتۋ كەرەك, قازاقستاننان ارپا ساتىپ الۋ بويىنشا وزبەكستان توپ-يمپورتتاۋشىلار قاتارىنا (تەك قىتايعا جول بەرەدى) كىرەدى.
بىلتىر ساۋدا كولەمى 4,4 ملرد دوللاردى قۇراسا, ونىڭ ىشىندە اۋىل شارۋاشىلىعى سالاسىنىڭ ەنشىسىنە 1,7 ملرد دوللار تيگەن.
ەكى مەملەكەت اراسىنداعى سالا كاسىپكەرلەرىنىڭ دە بايلانىسىن ايتا كەتۋ ماڭىزدى. وتكەن اپتادا استانادا ەكى ەل اۋىل شارۋاشىلىعى مينيسترلىگى وكىلدەرى مەن اقمولا, قاراعاندى, قوستاناي جانە سولتۇستىك قازاقستان وبلىستارىنىڭ اۋىل شارۋاشىلىعى باسقارمالارى مەن سالالىق قاۋىمداستىقتار باسشىلارى مەن كاسىپكەرلەردىڭ قاتىسۋىمەن جيىن ءوتتى. ونداعى ماقسات – اۋىل شارۋاشىلىعى سالاسىنداعى بىرلەسكەن كووپەراتسيالىق جوبالاردا اۋىل شارۋاشىلىعى داقىلدارىن بىرلەسىپ ءوسىرۋ جانە تەرىنى قايتا وڭدەۋ باعىتى بويىنشا ىسكە اسىرۋ مۇمكىندىگىن تالقىلاۋ. كەزدەسۋدە قوس تاراپ وزدەرىنىڭ بيزنەس ۇسىنىستارى مەن باستامالارىن مالىمدەپ, ىنتىماقتاستىق تەتىكتەرى مەن شارتتارىن تالقىلادى. جيىن قورىتىندىسىندا كاسىپكەرلەر اراسىنداعى كەزدەسۋ B2B فورماتىنداعى كەلىسسوزدەرمەن جالعاسىپ, وزبەك كاسىپكەرلەرىنىڭ ءبىزدىڭ ەلدەگى شارۋاشىلىقتارعا بارىپ تانىسۋى تۋرالى ۋاعدالاستىققا كەلىستى.
كەيىنگى جىلدارى وزبەكستاننىڭ اۋىل شارۋاشىلىعى سالاسىنداعى جۇمىستارىندا ەرەكشە سەرپىن بايقالادى. كورشى مەملەكەت ءبىرىنشى كەزەكتە جەمىس-جيدەك, كوكونىس, باقشا داقىلدارى, ءجۇزىم جانە ءداندى بۇرشاق داقىلدارىنىڭ ءوندىرىسىن ۇلعايتۋدى كوزدەپ وتىر. وزبەكستان وتكەن جىلى ءتۇرلى حالىقارالىق ۇيىمدار مەن قارجى ينستيتۋتتارىن قاتىستىرا وتىرىپ, اۋىل شارۋاشىلىعى سالاسىنا جالپى قۇنى 20 ملن دوللارعا تەڭ گرانت بەردى. كەيىنگى جىلدارى الەمنىڭ 80 ەلىنە اۋىل شارۋاشىلىعى ونىمدەرىن ەكسپورتتاۋعا 620 فيتوسانيتارلىق رۇقسات الىنىپ, ولارمەن ەلەكتروندىق فورماتتا دەرەك الماسۋ ءىسىن جولعا قويدى. ەكسپورت اياسىن كەڭەيتۋ ماقساتىندا تاعى 8 ەلدىڭ فيتوسانيتارلىق رۇقساتىن الۋ جوسپارلانعان. فەرعانا, سامارقاند جانە تاشكەنت حالىقارالىق اۋەجايى اۋماعىندا ەكسپورتقا شىعاتىن جەمىس-جيدەك پەن كوكونىستى ۋاقىتشا ساقتايتىن زاماناۋي نىساندار دا بوي كوتەرمەك.