1. ءبىزدىڭ جاقتا ءتىسى اۋىرعانداردىڭ دا ... كوڭىلىن سۇرايدى
حالىقتا ء“تىسى اۋىرعاننىڭ كوڭىلىن سۇرامايدى” دەگەنگە ساياتىن ءبىر قيسىنسىزداۋ تۇسىنىك قالىپتاسقان. وۋ, ادام اعزاسىنىڭ بار ء“ىسى” ەڭ اۋەلى تىسكە بايلانىستى ەمەس پە؟!. ەندەشە, ءتىسى اۋىرعان ادامنىڭ كوڭىلىن سۇراپ, نەگە جاعدايىن جاساماسقا!
“بىرلىگىمىز جاراسقان!” اكتسياسى اياسىندا قازاقستان ۇلتتىق ستوماتولوگتار قاۋىمداستىعىنىڭ وبلىستىق فيليالى ۇيىمداستىرعان قالا تۇرعىندارىنىڭ تىسىنە تەگىن ەم-دوم جاساۋ شاراسى, مىنە, وسى شەتىن ماسەلەنى دە ەستەن شىعارمادى. ويتكەنى, ءتىسى ساۋ ادامنىڭ ءىسى دە ءونىمدى, ءوزى دە كوڭىلدى.
اكتسياعا اتسالىسقان وبلىس ورتالىعىنداعى 5 ەمحانانىڭ دارىگەرلەرى مەن مەدبيكەلەرى ءتىسىن ەمدەتۋگە كەلگەن قالا تۇرعىندارىنا سول كۇنى تىك تۇرىپ قىزمەت جاسادى. اقىل-كەڭەستەرى مەن اۋرۋدى انىقتاعاندارىنا, ءتىس جۇلعاندارىنا دا اقى-پۇل تالاپ ەتكەن جوق. اكتسياعا دەيىن ءتىس كۇتىمى تۋرالى كەڭەس الۋعا كەلگەندەر اجەپتاۋىر اقشا جۇمساۋشى ەدى.
ءتىس ەمدەۋمەن شۇعىلداناتىن “دانتيست”, “ستوماتولوگ”, “امانجولوۆ”, “ستەپ”, تاعى باسقا ەمحانالارعا جاعىن باسىپ, جابىرقاپ كىرگەندەر جايراڭداپ شىعىپ جاتتى. ولار ءتىس جۇلدىرۋ, ەمدەۋ جانە جاڭالاۋ مۇمكىندىگىنە قول جەتكىزگەندەر بولاتىن. ەڭ باستىسى – بۇل يگى ءىس تاراز قالاسىندا عانا ەمەس, سونىمەن بىرگە وبلىستىڭ بارلىق ءتىس ەمدەۋ مەكەمەلەرىندە قولعا الىندى. “بىرلىگىمىز جاراسقان!” اكتسياسىنىڭ ءمانى مەن ماعىناسى دا وسى – اۋىرىپ ەم ىزدەگەنشە, اۋىرمايتىن جولدى بىرىگىپ ىزدەۋ ەمەس پە!
اكتسيا اياسىندا وبلىس بويىنشا 9287 ادام ءتىسىن تەگىن قاراتتى. ءسوزىمىزدىڭ باسىنداعى ء“بىزدىڭ جاقتا ءتىسى اۋىرعانداردىڭ دا ...كوڭىلىن سۇرايدى”, دەپ ازىلدەپ جاتقانىمىزدىڭ ءبىر سىرى وسى ەدى.
2. اۋلا مەن اۋرا ۇيلەسىم تاپقاندا...
“جاسىل ەل” جاستار ەڭبەك وتريادى ەلدەگى تازالىقتى ءار اۋلادان باستاۋدى قولعا الىپتى. وسىعان وراي “جاسىل ەل” جاستار ەڭبەك وتريادى, ازاماتتىق اليانس وبلىستىق فيليالى جانە “قازاقستان اۋىل جاستارى” قوعامدىق قاۋىمداستىعى وبلىس اكىمدىگىنىڭ قولداۋىمەن تاراز قالاسى, قويگەلدى كوشەسىندەگى №209 ءۇيدىڭ اۋلاسىن تارتىپكە كەلتىردى.
– ەگەر تەاتر كيىمىلگىشتەن, پاتەر كىرەبەرىستەن باستالسا, قالامىزدىڭ مادەنيەتى مەن ءتارتىبى ءاربىر اۋلادان باستالادى, – دەيدى وبلىستىق “جاسىل ەل” جاستار ەڭبەك وتريادىنىڭ جەتەكشىسى يحتيار مىرزاحمەتوۆ.
ايتسا ايتقانداي, بۇگىندە تاراز قالاسىنداعى كوپقاباتتى تۇرعىن ۇيلەردىڭ اۋلالارى تازالىق جونىنەن باسەكەگە تۇسكەندەي. وعان وبلىستىق, قالالىق اكىمدىكتىڭ ۇيىمداستىرۋىمەن قاراجاتى مول كاسىپكەرلەر دە اتسالىسۋدا.
قويگەلدى كوشەسىندەگى №209 ءۇيدىڭ اۋلاسىن تازالاۋعا جۇزدەن استام ادام قاتىستى. جاستاردىڭ ءىس-قيمىلىن كورىپ, كوپقاباتتى ءۇيدىڭ تۇرعىندارى دا كومەككە كەلدى. ولار اۋلا اۋماعىن قوقىستان تازارتىپ, اعاشتار مەن جول جيەكتەرىن اكتەپ-سوكتەدى. بالالار الاڭدارى مەن ورىندىقتاردى سىرلادى.
بۇل كومەككە وسى تۇرعىن ءۇيدىڭ اۋلاسى ءىشىندەگى جولدارعا اسفالت توسەپ جاتقان “قۇرىلىس-2050” جشس-ءنىڭ جۇمىسشىلارى دا ريزا. قۇرىلىسشىلاردىڭ ايتۋىنشا, بۇل ءۇيدىڭ اۋلاسى ەندى ەۋروپاداعى وركەنيەتتى ۇيلەردىڭ اۋلاسىنداي تازا ءارى كوركەم بولماقشى. ولاردىڭ جوبالارى بويىنشا, اۋلاعا جاڭا ورىندىقتار, قوقىس تاستايتىن جاشىكتەر قويىلىپ, بالالار وينايتىن ءتۇرلى سىرعاناقتار, اتكەنشەكتەر كەشەنى ورناتىلماق.
ءىس-شارا بارىسىندا اۋلا بالالارى سالعان سۋرەتتەر مەن ولاردىڭ بولاشاق ۇرپاقتارعا ارنالعان ىزگى تىلەكتەرى جازىلعان حاتتار كاپسۋلاعا سالىنىپ, ءۇيدىڭ الدىنان جاسالاتىن مەموريالدى تاقتا استىنا جاسىرىلدى. ءىس-شارانى ۇيىمداستىرۋشىلار بالالارعا ءتۇرلى سىيلىقتار تاپسىردى.
“بىرلىگىمىز جاراسقان!” اكتسياسى كەيبىرەۋلەر ءۇشىن قىزدىرمانىڭ قىزىل ءسوزى سياقتى كورىنۋى بەك مۇمكىن. ال, شىن مانىندە, وسى اكتسيا باستالعالى بەرى ەلدە كوپ تىرلىك تىندىرىلدى. وعان ەل-جۇرت كۋا.
كوسەمالى ساتتىباي ۇلى.
جامبىل وبلىسى.
ماگنيتكا وتتارى جارقىراپ تۇر
بۇل كۇندە تۇڭعىش قازاقستاندىق شويىن الىنۋىنىڭ 50 جىلدىق مەرەكەسى الدىندا تەمىرتاۋ كوركى ودان سايىن قۇلپىرىپ, جايناپ-جارقىراپ تۇر. سان ۇلت وكىلدەرىنىڭ قويان-قولتىقتاسا ەڭبەك ەتىپ, بىرلىگى نىعايۋى ارقاسىندا اتاعى الىسقا تانىلعان مۇنداعى ايگىلى مەتاللۋرگيالىق كومبينات ۇجىمى ىنتىماقتاستىقتى, تۇتاستىقتى بەرىك ۇستانۋىمەن ايان. اعا تولقىن مەتاللۋرگتەر قالىپتاستىرعان تاماشا ءۇردىس بۇگىنگى ءىزباسارلارىنا وشپەس ۇلگى.
الىپ ءوندىرىس تىرەگى – قاشانعىداي جاستار. جالىن جۇرەك ورتا جاسامپاز ىستەرگە, باياندى باستامالارعا ءاردايىم ۇيىتقى. ء“بىز – ءبىر كوماندامىز, بىرلىگىمىز جاراسسا, ءبارىن دە جەڭەمىز”, دەگەن سوزدەر بۇگىندە بارلىق جۇرتتىڭ اۋزىندا. ونى ىسپەن ايعاقتاۋعا ءار بۋىن, اركىم قۇشتار.
كومبيناتتىڭ 3 قاڭىلتىر قاقتاۋ تسەحىنا ەكسكۋرسيا جاساعان قالاداعى 31 كاسىپتىك مەكتەبىنىڭ وقۋشىلارىنىڭ ەرەسەكتەر توبى, سونداي-اق جوعارى سىنىپ شاكىرتتەرى مەن ستۋدەنتتەر بۇعان كوزبە-كوز كۋا بولدى. ولار جۇپ-جۇقا اق قاڭىلتىردىڭ دايىندالۋ ۇدەرىسىن كوردى. ماماندار بۇل جونىندە جان-جاقتى تۇسىنىك بەردى.
تسەحتاعى وزات وندىرىستىك بۋىندار قاتارىندا ۆيكتور سولوۆەۆ جەتەكشىلىك ەتەتىن بريگادا الدىمەن اتالادى. قۇرامى 12 جۇمىسشىدان تۇراتىن ۇجىم شاعىن بولعانىمەن, اتقارىپ وتىرعان ىستەرى ءىرى. بيىلعى بەس ايدا ۆالتسوۆششيك جىگىتتەر 70 مىڭ توننادان استام قاڭىلتىر قاقتاعان. جۇمىستارىن قىزىقتاۋشىلارعا “بۇرىنعى ۋاقىتتارعا قاراعاندا, ەڭبەگىمىز اناعۇرلىم جەڭىلدەدى. جۇمىس تولىقتاي اۆتوماتتاندىرىلعان, كومپيۋتەرلىك جۇيەمەن باسقارۋعا كوشىرىلىپ كەلەدى. بىزدە ورىس, نەمىس, ۋكراين, قازاق جاستارى يىق تىرەستىرىپ ەڭبەك ەتەدى. ماقسات توعىسقان, تىلەك ۇشتاسقان ءبىر كوماندا سانايمىز ءوزىمىزدى”, دەدى ول.
مۇنداي تسەحقا ەكسكۋرسيانى ءبىر كۇندە اياقتاپ شىعۋ مۇمكىن ەمەس. وعان قاتىسۋشىلار تاعى دا ارالاۋعا كوڭىلدەرى سوعاتىندىعىن ايتقاندا تىلەك قابىل الىندى. ال كاسىپتىك مەكتەپ پەن جوعارى وقۋ ورىندارىنىڭ بولاشاق تۇلەكتەرى ىشىنەن مەتاللۋرگتەر قاتارىن تولىقتىرۋدى ارمانداۋشىلار اڭدالماي قالمادى.
تەمىرتاۋلىقتار قازاقستان ماگنيتكاسى دەپ ماقتانا اتايتىن وسىناۋ ءوندىرىس وشاعى قۇلاشى سەرپىندى, كەلەشەگى كەڭ, شەبەر ءارى بىلىكتى مامانداردى قاجەتسىنەدى. ولاردى ىرىكتەپ الۋعا مۇمكىندىك بار.
قۇرىش قالا قاشانعىداي دوستىق پەن بىرلىككە تۇعىر. ول بيىكتەگەن سايىن قۋات-كۇشى, ابىروي-بەدەلى اسقاقتاي تۇسۋدە. ماگنيتكا وتتارى الىسقا جارقىرايدى.
ايقىن نەسىپباي.
تەمىرتاۋ.