قالا ىرگەسىندەگى «وڭتۇستىك» يندۋستريالدى ايماعىندا ورنالاسقان «ەۆروكريستالل» جشس شىنى بانكىلەر, سۋسىندارعا ارنالعان شىنى بوتەلكەلەر شىعارۋمەن اينالىسادى. حيميا ونەركاسىبىنەن باستاپ تاماق, ءتىپتى مەديتسينا سالاسىندا دا شىنىعا دەگەن سۇرانىس وتە جوعارى. بۇرىن بانكى مەن بوتەلكە يمپورتتالاتىن. ەندى وتاندىق كاسىپورىن ىسكە قوسىلعالى شەتەلدىك وندىرۋشىلەرمەن باسەكە ورناپ, جەرگىلىكتى بازار, ساۋدا نۇكتەلەرى شىنى ىدىستارمەن تولىقتى.
ساپاسى وتە جوعارى, اسسورتيمەنتكە باي, كولەمى 250 ميلليليتردەن باستالىپ 3 ليترگە دەيىنگى, سان الۋان پىشىندەگى, نەگىزىنەن تاماق ونەركاسىبىنە ارنالعان شىنى ىدىستار شىعاراتىن بۇل كومپانيا 2011 جىلى قۇرىلدى. زاۋىتتا شىنى بالقىتاتىن 2 پەش, شىنىعا ءارتۇرلى قالىپ بەرەتىن 4 وندىرىستىك جەلى بار. سونىمەن بىرگە كاسىپورىندا وندىرىلەتىن شىنى ىدىستاردىڭ فيزيكالىق, حيميالىق قاسيەتىن باقىلاپ وتىراتىن زەرتحانا جۇمىس ىستەيدى. ءوندىرىس ورنىندا نەمىستىڭ شىنىعا قالىپ بەرەتىن «نەۋە» اپپاراتى ورناتىلعان.
ونىڭ NNPB قىزمەتى سالماعى جەپ-جەڭىل بىراق مىقتى شىنى ىدىستار شىعارۋعا مۇمكىندىك بەرەدى. شىنى بۇيىم نازىكتەۋ كەلەدى. وندىرىستە, تاسىمالداۋ بارىسىندا ابايسىزدىق سالدارىنان ەرنەۋىندە جارىق نەمەسە كەتىك پايدا بولۋى مۇمكىن. ادام قولىمەن تەكسەرگەندە دە ءبىرى بايقالىپ, ءبىرى بايقالماي قالادى. سونداي ولقىلىقتىڭ الدىن الۋ ءۇشىن كاسىپورىن دايىن ونىمدەردى اۆتوماتتى تۇردە سكانەرلەپ تەكسەرەتىن قوندىرعىنى ىسكە قوستى.
كاسىپورىن باسشىسى رۋستام سۋحوۆتىڭ ايتۋىنشا, جىلدىق قۋاتتىلىق شامامەن 200 ملن بۇيىمدى قۇرايدى. كومپانيا «Ecoqolday» ەكولوگيالىق باعدارلامانىڭ قاتىسۋشىسى بولعاندىقتان, پايدالانىلعان ءونىمدى قايتا وڭدەپ, قالدىقسىز تاۋار شىعارادى. وسىلايشا, تابيعاتتىڭ تازالىعىنا ەلەۋلى ۇلەس قوسىپ وتىر.
زاۋىت اعارعان مەن شىرىنعا, ءتۇرلى الكوگولدى ىشىمدىكتەرگە ارنالعان بوتەلكە مەن كونسەرۆىلەۋگە قاجەتتى بانكىلەر وندىرەدى. كاسىپورىن ىشكى نارىقتى جوعارى ساپالى شىنى ىدىستارىمەن قامتاماسىز ەتەدى. «اميران», «Globus plus», «Carsberg Kazakhstan», «ديونيس», «Golden food», «راۋان» سياقتى كومپانيالار «ەۆروكريستاللدىڭ» تۇراقتى تۇتىنۋشىسىنا اينالعان. سونداي-اق سەرىكتەستىك ءوز ونىمدەرىن قىرعىزستان, وزبەكستان, رەسەي, ليتۆا, پولشا مەملەكەتتەرىنە ەكسپورتتايدى.
كاسىپورىننىڭ العا قويعان جوسپارى دا اۋقىمدى: ول – ءبىرىنشى كەزەكتە №2 شىنى بالقىتۋ پەشىن جاڭعىرتۋدان وتكىزۋ. سول ارقىلى ءوندىرىس قۋاتى ارتادى, ءونىم ساپاسى جاقسارادى, تابيعي گازدى تۇتىنۋ كولەمى ازايادى, شيكىزاتقا مۇقتاجدىق تومەندەيدى, ەڭ باستىسى, فرانتسۋزدىق «Tiama» كومپانياسىنىڭ زاماناۋي قوندىرعىسىن ساتىپ الۋمەن ءونىم ساپاسىن باقىلاۋ كۇشەيەدى.
«№2 شىنى بالقىتۋ پەشىن جاڭعىرتۋعا قاجەتتى قاراجاتتى «Halyk Bank» ءبولىپ وتىر. سونداي-اق «دامۋ» كاسىپكەرلىكتى دامىتۋ قورى» مەملەكەتتىك باعدارلاما اياسىندا العان نەسيە ۇستەمەاقىسىنىڭ ءبىر بولىگىن سۋبسيديالاۋعا كومەك بەرمەك. كاسىپورىندا 500-گە تارتا ادام ەڭبەك ەتەدى. جۇمىسشىلار ىستىق تاماقپەن قامتاماسىز ەتىلگەن, تەگىن تاسىمالداۋ قاراستىرىلعان, بارلىق قىزمەتكەر مەديتسينالىق ساقتاندىرىلعان. ۇيالى بايلانىس شىعىنىن دا كاسىپورىن ءوزى وتەيدى. ودان بولەك, جۇمىسشىلارعا ماتەريالدىق كومەكتەر كورسەتىلىپ تۇرادى. ال ەڭبەك وزاتتارىنا سىياقى تولەنەدى. كادر بىلىكتىلىگىن ارتتىرۋ ءۇشىن ارنايى كۋرستار مەن وقۋلار ۇيىمداستىرىلادى», دەيدى سەرىكتەستىك باسشىسى ر.سۋحوۆ.
كاسىپورىن باسشىسىنىڭ مالىمدەۋىنشە, ەلىمىزدە بۇل سالانى وركەندەتۋ ءۇشىن جوعارى جانە ارناۋلى وقۋ ورىندارىندا شىنى ونەركاسىبى ماماندارىن دايارلايتىن كافەدرالار اشۋ قاجەت. سەبەبى كادر تاپشىلىعى ءوندىرىس ورىندارىندا ۇلكەن ماسەلە تۋعىزادى. كەيدە سونىڭ سالدارىنان زاۋىت, فابريكالار مامانداردى شەتەلدەن جالداۋعا ءماجبۇر بولادى. سونىمەن قاتار ول وتىن تۇرىنەن تەك گاز پايدالاناتىن كاسىپورىندار ءۇشىن ونىڭ ءتاريفىن ءسال دە بولسا تومەندەتسە دەگەن تىلەگىن جەتكىزدى. «كوگىلدىر وتىن» باعاسىنىڭ ارزانداۋى تىكەلەي ءونىمنىڭ وزىندىك قۇنىنىڭ تومەندەۋىنە الىپ كەلەدى.
«ەۆروكريستالل» جشس وتكەن جىلى 174,4 ملن دانا ىدىس شىعارىپ, 7,134 ملرد تەڭگەنىڭ ءونىمىن ءوندىردى. زاۋىت ەڭبەككەرلەرىنىڭ ورتاشا ايلىق جالاقىسى بىلتىرعى مالىمەت بويىنشا 466 مىڭ تەڭگەنى قۇرادى.
شىمكەنت