بوكستان 51 كەلى سالماق دارەجەسىندە ەل نامىسىن قورعاۋ ءۇشىن پاريجگە اتتانعان ساكەن بيبوسىنوۆ وليمپياداعا قاتىستى پىكىر ءبىلدىردى, دەپ جازادى Egemen.kz.
توكيو - 2020 وليمپياداسىنىڭ قولا مەدال يەگەرى ءبىرىنشى كەزدەسۋىندە تۇرىك سامەت گيۋميۋشتى ايقىن باسىمدىقپەن جەڭىپ, شيرەك فينالعا شىققان ەدى. شيرەك فينالدا وتانداسىمىزدى وزبەكستاندىق حاسونباي دۋسماتوۆ كۇتىپ تۇردى. ءبىر-ءبىرىنىڭ قىر-سىرىنا قانىق ەكى بوكسشىنىڭ جەكپە-جەگىندە كورشى ەل بوكسشىسىنىڭ قولى كوتەرىلدى.
پاريج وليمپياداسىنداعى جارىس جولى وسىلاي وربىگەن ساكەن بيبوسىنوۆ ەل نامىسىن قورعاعانى ءۇشىن باقىتتى ەكەنىن جازدى.
«ارمان…. ماقسات… جەڭىس… توكيو وليمپياداسىندا قولا مەدال العانىمدا, پاريج وليمپياداسىندا قايتسەمدە التىن الىپ, ماقساتىما جەتەمىن دەپ ويلادىم, سول ءۇشىن وسىندا كەلدىم. وسى وليمپيادانى اسىعا كۇتتىم. ەلىمە التىن سىيلاعىم كەلدى. كوك تۋىمىزدى كوكتە قالىقتاعانىن, ءانۇرانىمىزدىڭ شىرقالعانىن قالادىم. ءبارى ءسىز بەن مەن ويلاعانداي بولمادى. شارشى الاڭعا شىققان سپورتشىنىڭ باعى مەن بابى كەلىسىپ قاتار شابۋى كەرەك ەكەن. بابىمدا بولدىم دەپ ويلايمىن. كىشكەنە ساتتىلىك جەتىسپەي, باعىم جانباي قالعان سياقتى. دەگەنمەن, اللاعا سانسىز شۇكىر, تاعدىرىما قازاقتىڭ نامىسىن قورعاۋ باقىتى جازىلعان ەكەن.مەنى جەڭىستە دە, جەڭىلىستە دە قولداعان جانكۇيەرلەرىمە العىس ايتامىن. جىلى لەبىزدەرىڭىز ءۇشىن راحمەت», دەپ جازدى ساكەن بيبوسىنوۆ.