قىتايدىڭ Hunan TV كانالىندا وتە وزەكتى جانە ايگىلى جوبالاردىڭ ءبىرى «I am a Singer» گالا-كونتسەرتى ءوتتى. جوبانىڭ 2017 جىلدان بەرى بىرنەشە مارتە قوناعى بولعان توپ مۇشەسى ديماش قۇدايبەرگەن «Angel love» اتتى جاڭا كومپوزيتسياسىن ورىندادى. بۇل تۋرالى Egemen.kz DimashNews.com سايتىنا سىلتەمە جاساپ حابارلايدى.
ءاننىڭ مۋزىكاسى مەن ءسوزىن قازاقتىڭ بەلگىلى كومپوزيتورى رەنات گايسين مەن اقىن قالقامان سارين جازدى. تۋىندىنىڭ ارانجيروۆكاسىن رەنات گايسين دىبىس پروديۋسەرى ەرلان بەكچۋرينمەن بىرلەسىپ جاسادى.
ديماش ارنايى قىتايلىق كورەرمەندەر ءۇشىن قازاق جانە قىتاي تىلىندە ءان شىرقادى. قىتاي تىلىندەگى ءماتىننىڭ اۆتورى – لين ۆەي ۆەيليم.
رەنات گايسين ءاننىڭ شىعۋ تاريحى تۋرالى بىلايشا وي ءبولىستى:
«بىرنەشە جىل بۇرىن ۇشاق تەرەزەسىنەن اقشا بۇلتتارعا قاراپ وتىرىپ, مەن ەرەكشە ادەمى سۋرەتتەن شابىتتانىپ, ويىما ادەمى ءبىر اۋەن ورالدى. سول ارادا مەن اۋەندى ۇمىتىپ قالمايىن دەپ ءوزىمنىڭ دىبىس جازۋ قۇرىلعىما جازىپ قويدىم.
پاندەميا كەزىندە «Qairan Elim» كومپوزيتسياسىن ازىرلەۋ ۇستىندە مەن بۇل اۋەندى ديماشقا كورسەتتىم. بىراق تىنىمسىز ساياحات پەن گاسترولدىك ساپارلار كوبەيىپ كەتكەننىڭ سالدارىنان, بۇل انمەن اينالىسۋعا ەندى عانا مۇمكىندىك تۋدى.
جاقىندا ديماش ماعان تەلەفون سوعىپ, «I am a Singer» گالا-كونتسەرتىندە وسى ءاندى ورىنداعىسى كەلەتىنىن ايتتى. ول ءماتىنىن قازاق تىلىندە جازۋدى ءوتىندى. ال مەن كوپ ويلانباستان بىردەن ءوزىمنىڭ جاقىن دوسىم, ەلدەگى ەڭ تالانتتى اقىنداردىڭ ءبىرى قالقامان سارينگە تەلەفون سوقتىم.
ءبىز تەلەفون ارقىلى حابارلاسقان سوڭ, قالقامان اۋەننەن شابىتتانىپ, نازىك سەزىمدى انگە ولەڭ جازدى.
مەن بۇنى – كومپوزيتور مەن اقىننىڭ ءبىرىن-ءبىرى ءسوزسىز تۇسىنىسۋدەگى ناعىز ۇيلەسىمدىلىك دەپ اتاي وتىرىپ, شىعارمانى رومانتيكالىق پوەما دەگىم كەلەدى.
انگە ديماشتىڭ ءوزى شىنايى, تازا جانە باعا جەتپەس ماحابباتتىڭ بەلگىسى رەتىندە «Angel love» دەگەن اتاۋ بەردى», دەدى رەنات گايسين.