«مايقايىڭ-التىن» اق-نا قاراستى التىن شاحتاسىنداعى اپاتتان كوز جۇمعان ءتورت ازاماتتىڭ بارلىعى جەر قوينىنا تاپسىرىلدى. قۇتقارۋشىلار سوڭعى ەكەۋىنىڭ مۇردەسىن ويىققا قۇلاعان توپىراق اراسىنان جارتى جىلدان اسا ۋاقىت ىزدەدى. اقىرى شىلدە ايىنىڭ ەكىنشى جارتىسىندا تاۋىپ, تۋىستارىنا اماناتتادى.
ەندىگى ماسەلە كەنىشتىڭ قايتا ىسكە قوسىلۋىنا قاتىستى بولىپ وتىر. سەبەبى كەن بايىتۋ كومبيناتى كەيىنگى جارتى جىلدا قالدىق كەنمەن جۇمىس ىستەپ, الەۋەتى تومەندەپ قالعان. ال كاسىپورىندا مىڭعا جۋىق قىزمەتكەر ناپاقا تاۋىپ وتىر.
بۇعان دەيىن جازعانىمىزداي, كەنىشتەگى اپات پەن ونىڭ ماڭىنداعى ۇيلەردىڭ ماسەلەسىن پروكۋراتۋرا قۇرعان تەرگەۋ توبى زەردەلەپ جاتقانىنا بايلانىستى شاحتاداعى كەن قازۋ جۇمىستارى 4 قاڭتاردان بەرى قاڭتارىلىپ قالعان ەدى. سول ۋاقىتتا 185 جۇمىسشى جالاقىسىنىڭ 50 پايىزى ساقتالۋىمەن ءماجبۇرلى دەمالىسقا جىبەرىلگەن. كەيىن ولاردىڭ ءبىراز بولىگى كاسىپورىننىڭ وزگە قۇرىلىمدىق بولىمشەلەرىنەن جۇمىس تاپسا, كەيبىرى وزگە كاسىپورىندارعا اۋىسىپ كەتتى.
ال 25 شىلدە كۇنى قۇتقارۋشىلار شاحتا ماڭىنداعى ويىققا ءتۇسىپ قازا بولعان سوڭعى قۇتقارۋشىنىڭ دەنەسىن الىپ شىقتى. ول – 56 جاستاعى ايىپ تىلەۋبەرگەنوۆ. مارقۇم كاسىبي اسكەريلەندىرىلگەن اۆاريالىق-قۇتقارۋ قىزمەتتەرىنىڭ رەسپۋبليكالىق ورتالىق شتابى پاۆلودار فيليالىندا جەدەل اۆتوكولىك جۇرگىزۋشىسى بولىپ ەڭبەك ەتكەن. ول ەڭبەك جولىن العاشقىدا قۇقىق قورعاۋ سالاسىندا ءتارتىپ ساقشىسى بولىپ باستاعان. كەيىن دەنساۋلىعىنا بايلانىستى بۇل سالامەن قوش ايتىسۋعا تۋرا كەلىپتى. ودان سوڭ ءار جىلدارى «مايقايىڭالتىن» اق-دا, مايكوبەدەگى كومىر كەنىشىندە, كەيىنگى 6-7 جىلدا كاسىبي اسكەريلەندىرىلگەن اۆاريالىق-قۇتقارۋ قىزمەتتەرىنىڭ رەسپۋبليكالىق ورتالىق شتابى پاۆلودار فيليالىندا ەڭبەك ەتكەن.
وسىلايشا, اۆتوبۋسپەن قۇردىمعا قۇلاپ قازا تاپقان ءتورت قۇتقارۋشىنىڭ دا مۇردەسى تابىلدى. ەندىگى رەتتە «مايقايىڭ-التىن» اق-نىڭ قىزمەتكەرلەرى شاحتانىڭ تەزىرەك اشىلۋىن كۇتىپ وتىر. سەبەبى كەيىنگى جارتى جىل بويى كاسىپورىننىڭ كەن بايىتۋ كومبيناتى قالدىق كەنمەن جۇمىس ىستەپ كەلگەن.
اپات بولعان التىن كەنىشى ءوز جۇمىسىن قاشان جالعاستىرادى؟ بۇل ساۋالدى توتەنشە جاعدايلار مينيسترلىگى ونەركاسىپتىك قاۋىپسىزدىك كوميتەتىنىڭ پاۆلودار وبلىسى بويىنشا دەپارتامەنتىنىڭ باسشىسى الماز ولجاعۇلوۆقا قويدىق.
– «مايقايىڭ-التىن» اق-نا قاراستى التىن كەنىشى ماڭىنداعى اپات سالدارىنان ىشىندە ءتورت قۇتقارۋشى بار اۆتوبۋس توپىراق اراسىنا قۇلاپ كەتكەنى ءمالىم. مىنە, ارادا جەتى ايعا جۋىق ۋاقىت وتكەندە سوڭعى قۇتقارۋشى قازىپ الىندى. مارقۇم قۇتقارۋشىلاردىڭ تۋىستارىنىڭ كوڭىلى ورنىنا ءتۇستى دەپ ويلايمىز. ال التىن شاحتاسىنىڭ قايتادان ىسكە قوسىلۋى تۋرالى ماسەلە جاقىن كۇندەرى بەلگىلى بولىپ قالادى. بۇل ءۇشىن ەڭ اۋەلى كەن ءوندىرۋشى كاسىپورىن ءبىزدىڭ دەپارتامەنتكە تاۋ-كەن جۇمىستارىنىڭ جوسپارىن ۇسىنۋى كەرەك. ونى رەسپۋبليكالىق كوميتەتىمىز قۇپتاعان جاعدايدا شاحتا ءوز جۇمىسىن جالعاستىرا الادى. بۇعان دەيىن ارنايى كوميسسيا جەر استىنداعى شاحتانىڭ جاي-كۇيىن زەردەلەپ, 33 تارماقتان تۇراتىن كەمشىلىكتى جويۋ تۋرالى ۇيعارىمدى اكتسيونەرلىك قوعام باسشىلىعىنا جونەلتكەن. بۇل ولقىلىقتاردىڭ ورنى تولتىرىلىپ, كەنىش ءوز جۇمىسىن باستاۋعا دايىندالىپ جاتقانى انىق, – دەپ جاۋاپ بەردى ا.ولجاعۇلوۆ.
بۇعان دەيىن استانا سوتى التىن كەنىشىندەگى قايعىلى وقيعا تولىقتاي «مايقايىڭ-التىن» اق-نىڭ كىناسىنەن بولعان دەگەن شەشىم شىعارعان ەدى. ال ەڭبەك جانە الەۋمەتتىك قورعاۋ كوميتەتىنىڭ توراعاسى تولەگەن وسپانقۇلوۆ مايقايىڭداعى اپات بويىنشا 21 ادام كىنالى دەپ تانىلۋى مۇمكىن ەكەنىن ايتقان.
ايتىپ وتەيىك, قۇردىمعا قۇلاعان اۆتوبۋستا ايىپ تىلەۋبەرگەنوۆتەن بولەك, بەردىحان سارقىت, ولەگ تىشكوۆيچ, ايدوس شايمەردەن بولعان ەدى.
پاۆلودار وبلىسى,
باياناۋىل اۋدانى,
مايقايىڭ كەنتى