استانا قالاسىندا وتەتىن V دۇنيەجۇزىلىك كوشپەلىلەر ويىندارىنىڭ باستالۋىنا دا ساناۋلى كۇن قالدى. ەتنوسپورت وليمپياداسى سانالاتىن ءدۇبىرلى دودانى تاماشالاۋعا ىقىلاستى تۋريستەردىڭ دە قاتارى ارتاتىنى ءسوزسىز. 2014 جىلدان بەرى تۇراقتى تۇردە وتكىزىلىپ كەلە جاتقان الاماننىڭ داڭقىن التى قۇرلىققا جەتكىزۋگە قۇمبىل جاندار دا جەتەرلىك. سولاردىڭ ءبىرى – 74 جاستاعى زەينەتكەر مارافونشى سارسەنباي قوتىراشەۆ.
كەشە استانا قالاسىنان زەينەتكەر مارافونشى قازاقستان – رەسەي – موڭعوليا – قىتاي باعىتى بويىنشا كەزەكتى ساپارىنا اتتاندى. بىرنەشە ەلگە تابانى تيەتىن قاريا بۇل جولعى ساياحاتىن دۇنيەجۇزىلىك كوشپەلىلەر ويىندارىنا ارنايتىنىن ايتتى.
وسكەمەننەن التاي ايماعىنا ءوتىپ, ارى قاراي موڭعولياعا ايالداپ, قىتايدىڭ استاناسى بەيجىڭگە جول تارتاتىن قاريانى كەشە ەلوردالىقتار اق جول تىلەپ, تىلەۋلەستىك تانىتىپ, ساتتىلىك تىلەدى.
«بىرنەشە ەلدىڭ شەكاراسىن باسىپ وتەتىن ساياحاتىمدى استانا قالاسىندا وتەتىن دۇنيەجۇزىلىك كوشپەلىلەر ويىندارىنىڭ قۇرمەتىنە ارنايمىن. ەتنوسپورت سايىسىن وتكىزۋ ارقىلى ءوزىمىزدىڭ ءتول مادەنيەتىمىزدى, بابالارىمىزدىڭ ات ۇستىندە ءجۇرىپ, وركەنيەتتى ءومىر سۇرگەنىن كۇللى الەمگە ايگىلەيمىز. كوشپەلى حالىقتىڭ ۇرپاعى بولعاندىقتان, دۇنيەجۇزىلىك دودانى ناسيحاتتاۋعا بەل بۋدىم. بىلتىر اتىراۋدان اتتانىپ, تۇركيانىڭ ىستانبۇل قالاسىنا دەيىن جاياۋ ءجۇردىم. بيىل ەۋروپا ەلدەرىن ارالاۋدى جوسپارلاپ ەدىم, قۇجاتتىق رەسىمدەۋدە كىلتيپان بولىپ, رەتى كەلمەدى. موڭعوليانىڭ ۇلانباتىر قالاسىنان قىتاي استاناسى بەيجىڭگە دەيىن, جالپى 3 500 شاقىرىمدى باسىپ وتپەكپىن», دەيدى مارافونشى.
سارسەنباي قوتىراشەۆ بالا كۇنىنەن جاياۋ جۇرۋمەن شۇعىلدانعانىن ايتتى. بۇگىندە زەينەتكەر مارافونشى كۇنىنە 35-40 شاقىرىم جول وندىرەدى. سالاماتتى ءومىر سالتىن ناسيحاتتاپ, كوپشىلىككە ۇلگى كورسەتىپ جۇرگەن قاريا قىزىعى مەن قيىندىعى قاتار ورىلەتىن ءار ساياحاتىندا مەيىرىمدى جانداردىڭ قامقورلىعىن كوپ كورگەنىن دە جەتكىزدى.