استانا قالاسىندا وتەتىن V دۇنيەجۇزىلىك كوشپەلىلەر ويىندارىنا ازىرلىك بارىسىمەن شەتەلدىك بلوگەرلەر تانىستى. دۇنيەجۇزىلىك كوشپەلىلەر ويىندارىن دايىنداۋ جانە وتكىزۋ ديرەكتسياسى «Qazaqstan» جەڭىل اتلەتيكا كەشەنىندە شەتەلدىك بلوگەرلەرگە وتاندىق ءتۋريزمدى دامىتۋدىڭ جوسپارىن, وركەندەۋ ۇدەرىسى مەن ۇلتتىق سپورت تۇرلەرىنىڭ ءورىسىن تانىستىردى.
تايلاند, مالايزيا, قىتاي, ومان, تۇركيا, ازەربايجان, ۆەتنام, يتاليا جانە قىرعىزستاننان كەلگەن بلوگەرلەر ۇلتتىق ويىنداردىڭ ەلىمىزدە قارقىن الىپ كەلە جاتقانىنا كوز جەتكىزدى. كەلگەن قوناقتاردىڭ اراسىندا الەۋمەتتىك جەلىدە وقىرماندارى 1 ميلليوننان اساتىن بلوگەرلەر دە بار. ءىس-شارا اياسىندا قوناقتار قازاق كۇرەسى, قۇسبەگىلىك, اسىق اتۋ, توعىزقۇمالاق, مانگالا, وۆاري, ماس-رەستلينگ جانە ءداستۇرلى ساداق اتۋ سپورت تۇرلەرىمەن تانىستى. ەلىمىزدىڭ تۋريستىك الەۋەتىن كۇشەيتىپ ءارى دۇنيەجۇزىلىك كوشپەلىلەر ويىندارىن ميلليونداعان شەتەلدىك بلوگەر ورتاسىندا ناسيحاتتاۋعا مۇمكىندىك بەرەتىن ءىس-شارا بارىسىندا مەيماندار كوپ جايتقا قانىقتى.
8-13 قىركۇيەك ارالىعىندا وتەتىن دۇنيەجۇزىلىك كوشپەلىلەر ويىندارىنا 89 ەلدەن 2 مىڭنان اسا سپورتشى قاتىسادى دەپ جوسپارلانىپ وتىر. ەتنوسپورت دوداسىنا قاتىسۋشىلار سپورتتىڭ 21 تۇرىنەن 97 مەدال جيىنتىعى ءۇشىن تارتىسقا تۇسەدى.