قورعانىس مينيسترلىگىنە قاراستى راديوەلەكترونيكا جانە بايلانىس اسكەري-ينجەنەرلىك ينستيتۋتىندا تالاپكەرلەردىڭ وقۋعا قۇجات تاپسىرۋ ۇدەرىسىن جەڭىلدەتۋ جانە كۇتۋ ۋاقىتىن قىسقارتۋ ءۇشىن QR-كودى ارقىلى تىركەۋ جۇيەسى ەنگىزىلدى.
قازىرگى ۋاقىتتا اسكەري وقۋ ورنىندا 2024-2025 وقۋ جىلىنا قۇجات قابىلداۋ ءجۇرىپ جاتىر. 30 شىلدەگە دەيىن جالعاساتىن ءىس-شارادا ەكى جۇزدەن استام تالاپكەردى قابىلداۋ جوسپارلانىپ وتىر.
ىرىكتەۋ ۇدەرىسى ۇبت ناتيجەلەرىن, پسيحولوگيالىق تەستىلەۋدى, مەديتسينالىق كوميسسيا ناتيجەسىن جانە دەنە شىنىقتىرۋ دەڭگەيىن تەكسەرۋدى قامتيدى. ۇبت-نىڭ ءتورت پانىنەن كەمىندە 50 بالل جيناعان جانە ارنايى تەكسەرۋدەن وتكەن تالاپكەرلەر اسكەري وقۋ ورنىنا قابىلدانۋى مۇمكىن.
ينستيتۋتتا راديوەلەكترونيكا, راديوتەحنيكا جانە ينجينيرينگ, اۆتوماتتاندىرۋ جانە ينفوكوممۋنيكاتسيالىق تەحنولوگيالار, اقپاراتتىق قاۋىپسىزدىك جانە كيبەرقاۋىپسىزدىك جۇيەلەرى, اسكەري قۇرىلىس, اسكەري جۋرناليستيكا جانە ديريجەرلىك سياقتى سالالاردا ماماندار دايارلانادى.
قابىلداۋ كوميسسياسىنىڭ تالاپكەرلەردى قابىلداۋ تۋرالى شەشىمىنەن كەيىن وقۋ ورنىمەن ءبىلىم بەرۋ قىزمەتتەرىن كورسەتۋگە شارت جانە اسكەري قىزمەت وتكەرۋ تۋرالى كەلىسىمشارت جاسالادى. كۋرسانتتار جاتاقحانامەن جانە تاماقپەن تولىق تەگىن قامتاماسىز ەتىلەدى. وقۋدى اياقتاعاننان كەيىن تۇلەكتەرگە جۇمىسقا ورنالاسۋعا كەپىلدىك بەرىلەدى جانە اسكەري لاۋازىمدارعا تاعايىندالادى.
بيىل راديوەلەكترونيكا جانە بايلانىس اسكەري-ينجەنەرلىك ينستيتۋتى بەس جىلدان ءتورت جىلدىق وقۋ مەرزىمىنە كوشتى. بۇل وزگەرىس وقۋ ۇدەرىسىن وڭتايلاندىرۋعا جانە تەز وزگەرەتىن تالاپتار مەن دامىپ كەلە جاتقان تەحنولوگيالار جاعدايىندا مامانداردى دايارلاۋ ساپاسىن جاقسارتۋعا باعىتتالعان. اسكەري وقۋ ورنىندا وقىتۋدىڭ زاماناۋي ادىستەرىن ەنگىزۋ, ءبىلىم الۋ جانە كۋرسانتتاردىڭ كاسىبي ءوسۋى ءۇشىن بارلىق جاعداي جاسالعان.