عىلىم جانە جوعارى ءبىلىم ءمينيسترى ساياسات نۇربەكتىڭ قاتىسۋىمەن عىلىم جانە جوعارى ءبىلىم سالاسى تۋرالى ونلاين بريفينگ ءوتتى. وندا سالا باسشىسى مينيسترلىكتىڭ اتقارعان جۇمىسى, عىلىمي ينفراقۇرىلىم مەن جوعارى ءبىلىم بەرۋدى دامىتۋ, سونداي-اق شەتەل جوعارى وقۋ ورىندارىنىڭ ەلىمىزدە اشىلعان فيليالى تۋرالى اڭگىمەلەدى. سونىمەن قاتار جوعارى ساپالى زەرتتەۋ مەن ازىرلەمە جۇرگىزۋگە مۇمكىندىك بەرەتىن ۋنيۆەرسيتەتتەر جانىنداعى زەرتحانا مەن زەرتتەۋ ورتالىعىن جاڭعىرتۋعا باسا نازار اۋدارىلعانىن ءسوز ەتتى.
سونىمەن, ەلىمىزدە شەتەل جوعارى وقۋ ورىندارىنىڭ فيليالىن اشۋدىڭ ءتورت نەگىزگى قاعيداتى بەلگىلەندى. س.نۇربەك شەتەلدىڭ جەتەكشى جوعارى وقۋ ورىندارىنىڭ فيليالىن اشۋ مەملەكەت باسشىسىنىڭ تاپسىرماسى ەكەنىن ايتا كەلىپ, بۇل جوعارى ءبىلىم مەن عىلىمدى دامىتۋدىڭ 2023-2029 جىلدارعا ارنالعان تۇجىرىمداماسى اياسىندا ىسكە اسىپ وتىرعانىن جەتكىزدى.
«بىرىنشىدەن, ءبىز وڭىرلىك ۋنيۆەرسيتەتتەرگە باسىمدىق بەرىپ, ەلىمىزدىڭ ءبىر ايماعىندا عانا شەتەلدىك فيليالداردىڭ شوعىرلانۋىنان اۋلاق بولامىز. جوعارى ءبىلىمدى ينتەرناتسيونالداندىرۋ ەلىمىزدىڭ بارلىق سالاسىن قامتىدى.
ەكىنشىدەن, حالىقارالىق ىنتىماقتاستىق قازاقستاننىڭ بارلىق نەگىزگى سەرىكتەسىن قامتيدى. قازىر ەلىمىزدە اقش, ۇلىبريتانيا, گەرمانيا, رەسەيدىڭ جوعارى وقۋ ورىندارىنىڭ فيليالى جۇمىس ىستەيدى. ەندى تۇركيا, قىتاي, وڭتۇستىك كورەيا, وزبەكستان ۋنيۆەرسيتەتىنىڭ فيليالى اشىلادى.ۇشىنشىدەن, ءبىزدىڭ حالىقارالىق ءبىلىم بەرۋ ىنتىماقتاستىعىمىز ەل ەكونوميكاسىنىڭ ناقتى قاجەتتىلىگىن قاناعاتتاندىرۋعا باعىتتالعان. شەتەلدىك ۋنيۆەرسيتەت فيليالدارىنىڭ وقۋ باعدارلاماسىنىڭ 95 پايىزى تەحنيكالىق باعىتقا يە بولىپ وتىر. تورتىنشىدەن, اكادەميالىق جانە عىلىمي ۇتقىرلىقتى ىنتالاندىرۋ – حالىقارالىق ىنتىماقتاستىقتىڭ باستى باسىمدىعىنىڭ ءبىرى», دەدى ول.
بىلتىر ەلىمىزدەگى 74 جوعارى وقۋ ورنى اكادەميالىق ۇتقىرلىق باعدارلاماسىن جۇزەگە اسىرىپ, وعان 2 مىڭنان اسا وتاندىق ستۋدەنت قاتىستى. بيىل 328 وتاندىق جاس عالىم اقش, ۇلىبريتانيا, گەرمانيا, تۇركيا, رەسەي, فرانتسيا جانە تاعى باسقا ەلدەردەگى بەدەلدى زەرتتەۋ ورتالىقتارىندا عىلىمي تاعىلىمدامادان وتەدى.
سونداي-اق ساياسات نۇربەك عىلىم جانە جوعارى ءبىلىم مينيسترلىگى قۇرىلعاننان بەرى ەلىمىزدى وڭىردەگى بالامالى ءبىلىم بەرۋ جانە زەرتتەۋ حابى رەتىندە ورنالاستىرۋ مىندەتى قويىلعانىن ايتتى. اسىرەسە جوعارى ءبىلىمدى سۋبسيديالاۋ سالاسىنان سالىقتى, جاڭا جۇمىس ورنىن قۇرۋ, ۋنيۆەرسيتەت عىلىمىن دامىتۋ جانە جەكە ينۆەستيتسيالاردى تارتۋ سەكىلدى ەكونوميكانىڭ نەگىزگى سەكتورىنا اينالدىرۋ ماڭىزدى. مينيسترلىك شەتەل فيليالدارىنىڭ كومەگىمەن وڭىرلىك جوعارى وقۋ ورىندارىن حالىقارالىق زەرتتەۋ ۋنيۆەرسيتەتىنە اينالدىرۋعا ماقسات تۇتىپ وتىرعانىن اتاپ ءوتتى.