الماتىنىڭ ناۋرىزباي باتىر كوشەسىندە كوك ءتۇستى جول بەلگىسى پايدا بولدى, دەپ حابارلايدى Egemen.kz.
«الماتى پاركينگ» مالىمەتىنشە, كوممۋنالدىق مەكەمەنىڭ اقىلى تۇراق ايماعى كوك تۇسپەن تاڭبالانادى.
سىزىلعان كوك بەلگى كولىك جۇرگىزۋشىلەرىنە تۇراق ايماعىن تەز انىقتاۋعا كومەكتەسپەك.
بۇرىن اقىلى اۆتوتۇراقتار 5, 10, 20 ساندارى بار شەڭبەرمەن بەينەلەنگەن اقپاراتتىق تاقتا تۇرىندە كورسەتىلگەن ەدى, دەسە دە اتالعان بەلگىلەر اقىلى تۇراق شەكارالارىن ناقتى كورسەتە الماعان.
اتالعان كوشەدە پايدا بولعان كوك ءتۇستى تاڭبا ودان ءارى بارلىق كوممۋنالدىق اقىلى اۆتوتۇراقتا قولدانىلماق.
«تىعىز ترافيك كەزىندە جول بەلگىسى بايقالماۋى مۇمكىن, ال كوك تاڭبا ادام نازارىن اۋدارتادى. بۇل - قالالىق ينفراقۇرىلىمدى جاقسارتۋ جانە تۇرعىندار مەن قوناقتار ءۇشىن جايلىلىق دەڭگەيىن ارتتىرۋ جونىندەگى باعدارلامانىڭ ءبىر بولىگى. كولىك جۇرگىزۋشىلەرى قازىردىڭ وزىندە تۇراق ايماعىن انىقتاۋ پروتسەسىن قاراپايىم ءارى تۇسىنىكتى ەتەتىن جاڭا جۇيەنىڭ ارتىقشىلىعىن باعالاي الادى», دەلىنگەن «الماتى پاركينگ» مالىمدەمەسىندە.