سولتۇستىك ارالداعى سۋ كولەمى 27 ملرد تەكشە مەترگە دەيىن ارتتى. سولتۇستىك ارال تەڭىزىن قۇتقارۋ جوباسى اياسىندا ماڭىزدى ناتيجەگە قول جەتىپ, قويماداعى سۋ كولەمى 27 ملرد تەكشە مەتردەن اسقانىن قازاقستاننىڭ سۋ رەسۋرستارى جانە يرريگاتسيا مينيسترلىگى مالىمدەدى.
بۇل جەتىستىكتىڭ نەگىزگى فاكتورى كوكارال بوگەتىن قايتا جاڭارتۋ بولعان. سونىمەن بىرگە سىرداريا وزەنى ارقىلى قىزىلوردا وبلىسىنا سەكۋندىنا 650 تەكشە مەتر سۋ كەلۋىنىڭ دە اسەرى بار. بۇل ماسەلەگە قاتىستى وزبەكستان جانە قىرعىز رەسپۋبليكاسىمەن بىرلەسكەن جۇمىستار اتقارىلعان. اتاپ ايتقاندا, قازىر سۋ بەرۋ كەستەلەرى بەكىتىلىپ, جەرگىلىكتى شارۋا قوجالىقتارىمەن كەزدەسۋلەر ۇيىمداستىرىلعان. ەگىس القاپتارىن سۋارۋ ءۇشىن قاجەتتى سۋدىڭ جەتكىلىكتى مولشەرى بەلگىلەنگەن.
سونىمەن قاتار ۆەدومستۆو وكىلدەرى جەرگىلىكتى تۇرعىندارمەن كەزدەسۋ بارىسىندا جوبانىڭ دۇنيەجۇزىلىك بانكپەن بىرلەسىپ ىسكە اسىرىلىپ جاتقانىن اتاپ ءوتتى. قازىر جوبانىڭ ەكىنشى كەزەڭى ازىرلەنىپ جاتىر. بۇل بالىق شارۋاشىلىعىن, ەكوتۋريزمدى دامىتۋعا, ەكولوگيانى جانە سۋ رەسۋرستارىن باسقارۋدى جاقسارتۋعا باعىتتالعان.