اقمولا وبلىسىنان تاريحي ارتەفاكت تابىلدى. ونى ساندىقتاۋ اۋدانىنداعى ءورت سوندىرۋشىلەر ورمانداعى رەيد كەزىندە اڭعارعان. جاڭالىقتى اقمولا وبلىسىنىڭ توتەنشە جاعدايلار دەپارتامەنتى مەن تاريحي-ولكەتانۋ مۇراجايىنا حابارلاعان. بۇدان سوڭ جادىگەرگە استانالىق عالىمداردان بولەك شەتەلدىك عالىمداردىڭ دا قىزىعۋشىلىق تۋدىرعانى بەلگىلى بولدى.
كىسى كەلبەتى بەينەلەنگەن تىلسىم ەسكەرتكىش وڭىردە العاش رەت كەزدەسىپ وتىر. جادىگەردىڭ قاي داۋىرگە جاتاتىنى تۋراسىندا عالىمدار ءارتۇرلى پىكىر ءبىلدىرىپ جاتىر. ماسەلەن, ءا. مارعۇلان اتىنداعى ارحەولوگيا ينستيتۋتىنىڭ اعا عىلىمي قىزمەتكەرى سەرگەي يارىگين ءمۇسىننىڭ قولا ءداۋىرى مادەنيەتىنە تۇسپا-تۇس كەلەتىنىن العا تارتادى. «جادىگەر راسىمەن ەرەكشە. كىسىنىڭ كەلبەتى, اناتوميالىق ەلەمەنتتەرى جاقسى كورسەتىلگەن. كوزى, مۇرنى, ەرىنى مەن بەتى انىق اڭعارىلىپ تۇر. وسىعان ۇقساس جادىگەرلەر قولا داۋىرىندەگى ورتالىق ازيا مەن شىعىس ەۋروپادا كوپتەپ تابىلعان», دەيدى ول.
ال ل. ن. گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ عىلىمي قىزمەتكەرى دانيار تىلەۋعابىلوۆتىڭ دەرەكتەۋىنشە, بۇل – ەجەلگى تۇرىك مادەنيەتىنە تيەسىلى جادىگەر. «بۇل جەردە ءدىني راسىمدەر ورىندالاتىن ۇلكەن عيباداتحانانىڭ ورنى بولۋى بەك مۇمكىن. سول سەبەپتى تاس-ءمۇسىن ەگجەي-تەگجەي زەرتتەلىپ, ونىڭ اينالاسى دا عىلىمي نازاردان شەت قالماۋى كەرەك».
عالىمداردىڭ ولجاسىنان كەيىن جاباي وزەنىنىڭ جاعاسىنداعى قازبا جۇمىستارى باستالىپ كەتتى. ارحەولوگتەر بىرنەشە قىش ىدىستار مەن جامباس سۇيەكتەردى تاۋىپ, ولاردى راديوكومىرتەكتى تالداۋعا جولداپ جاتىر. وبلىستىق تاريحي-مادەني مۇرانى قورعاۋ جانە پايدالانۋ ورتالىعىنىڭ ديرەكتورى ءارى ەكسپەديتسيا باسشىسى جاسۇلان ۇكەەۆ بىلاي دەيدى: «قازىر «ساندىقتاۋ-3» قورىمى» كۇردەلى زەرتتەلۋ ۇستىندە. بۇگىنگى كۇنى ول جاقتان بۇرىن-سوڭدى زەرتتەلمەگەن 158 «مۇرتتى قورعان» تابىلىپ وتىر. ەندى جاباي وزەنىنىڭ بويىنداعى قونىستىڭ ورنىن تابۋ كەرەك. قاراپ وتىرساق, تاس داۋىرىنەن ورتا عاسىرلارعا دەيىنگى بارلىق ارحەولوگيالىق ەسكەرتكىشتى قامتيتىن ۇلكەن كەشەنگە اينالايىن دەپ تۇر».