كەرەكۋدەگى ءىرى كاسىپورىندار كاسىبي قىزمەتكەرلەرگە ۇنەمى ءزارۋ. بۇگىندە اتالعان ءۇردىس جاستاردىڭ پايداسىنا قاراي ويىسىپ جاتىر. سەبەبى كومپانيالاردىڭ كوبىندە تاجىريبەلى ماماندار زەينەت جاسىنا جەتىپ قالعان. جاستاردى باۋلىپ, بىلىكتى كادرلار رەزەرۆىن قالىپتاستىرۋ ءار جۇمىس بەرۋشى ءۇشىن ماڭىزدى ماسەلەگە اينالىپ كەلەدى.
وبلىس ورتالىعىندا تۇرعىنداردىڭ بارلىق ساناتىنا ارنالعان بوس جۇمىس ورىندارى جارمەڭكەسى ءوتتى. مۇندا جالپى سانى 70 ۇيىم وزدەرىندەگى بوس ەڭبەك ورىندارىن ۇسىندى. كەيبىر ۇيىمداردىڭ ۇسىنىستارىن بىلمەك ويمەن جۇمىس ىزدەگەن جۇرتشىلىق كادىمگىدەي كەزەككە تۇردى. وقۋدى جاڭا بىتىرگەن جاس تا, قىرىقتان اسىپ كەتكەن جىگىت اعاسى دا وسى جەردەن تابىلدى.
– مۇنداي جارمەڭكەلەر جالپى قالادا ۋاقىت سايىن وتكىزىلىپ تۇرادى. بۇگىنگى ءىس-شارانى كەڭ اۋقىمدى ءارى جۇرتشىلىق ءجيى سەرۋەندەيتىن ورتالىق جاعاجايدا ۇيىمداستىرۋدى شەشكەن ەدىك. كۇتكەنىمىزدەي ادام كوپ كەلىپ جاتىر. ازاماتتار جۇمىس بەرۋشىلەرمەن تىكەلەي تىلدەسىپ, وزدەرىن قىزىقتىرعان سۇراقتارىنا بىردەن جاۋاپ الادى. وقۋ ورىندارىنىڭ تۇلەكتەرى, زەينەت الدى جاسىنداعى ادامدار بولسىن, تۇراقتى ءارى تابىستى جۇمىس تاپقىسى كەلەدى. ءتىپتى كەيبىر ادامدار ىستەپ جۇرگەن جۇمىسىنان تابىسى نەعۇرلىم جوعارى ەڭبەك ورنىن ىزدەي الادى. جارمەڭكەگە جالپى سانى 70 جۇمىس بەرۋشى قاتىسىپ,
1 100-دەن اسا بوس جۇمىس ورنىن ۇسىندى. كاسىپورىنداردىڭ كوبىنە بىلىكتى قىزمەتكەرلەر قاجەت, دەيتۇرعانمەن بەيىندى وقۋ ورنىندا ءبىلىم العان ازاماتتار ءۇشىن دە بوس ورىندار بار ەكەنى ايتىلىپ جاتىر. جۇمىس بەرۋشىلەر تەك پاۆلودار قالاسىنان عانا ەمەس, ءوڭىرىمىزدىڭ بارلىق اۋدانىنان, اقسۋ مەن ەكىباستۇز قالالارىنان كەلدى. ماسەلەن, وقۋدى جاڭا تامامداعان پەداگوگ اۋىلدا مۇعالىم بولىپ ەڭبەك جولىن باستاي الادى. اۋىلداردا جاس ماماندارعا مۇقتاجدىق بار. ول جەرلەردە جالاقى دا جوعارى, اي سايىن قوسىمشا الاتىن ۇستەمەلەر قاراستىرىلعان. ال ەگەر جاس ماماندار وتباسىمەن باراتىن بولسا, جەرگىلىكتى اكىمدىكتەر ولاردى باسپانامەن قامتۋعا جاردەمدەسەدى, – دەيدى وڭىرلىك ەڭبەك ۇتقىرلىعى ورتالىعىنىڭ ديرەكتورى مەرۋەرت ەسەمباەۆا.
كەلۋشىلەرگە ءتۇرلى سالاداعى ەڭبەك ورىندارى ۇسىنىلدى: بانك سالاسى, اۋىل شارۋاشىلىعى, ءبىلىم بەرۋ, دەنساۋلىق ساقتاۋ, قۇقىق قورعاۋ, وزەن فلوتى, ازاماتتىق قورعانىس, ت.ب. ءىرى ونەركاسىپتىك كومپانيالار دا بىلىكتى كادر ىزدەپ كەلىپتى. ولاردىڭ ىشىندە «كاۋستيك», «رۋبيكوم», «بوگاتىر كومىر», «گوفروتارا», «سكيف ترەيد» كاسىپورىندارى كوزگە شالىندى.
پاۆلودار وزەن پورتىنىڭ وكىلدەرى وزدەرىنە قوزعالتقىش جوندەۋشىلەر مەن اسپازدار قاجەت ەكەنىن جەتكىزدى.
«ەڭبەكاقى شامامەن 200 مىڭ تەڭگەنىڭ توڭىرەگىندە بولادى. ۇيىمىمىز ەرتىس وزەنىنەن قۇم قازىپ, تاسىمالداۋمەن شۇعىلدانادى. قىزمەتكەرلەرىمىز قالقىمالى كراندار مەن تەپلوحودتاردا ىستەيدى. جاسى 35-كە دەيىنگى ەر ازاماتتار كەرەك. دەنە كۇشىن قاجەت ەتەتىن جۇمىس, كەيدە قىزمەتكەرلەرىمىز جوعارىعا ورمەلەسە, ەندى بىردە بارجادان تەپلوحودقا سەكىرىپ جۇرە بەرەدى. شيراق, مىعىم ازاماتتار قاجەت. بارلىعىنا ءوزىمىز ۇيرەتەمىز. سونداي-اق اسپازدار, پورت جۇمىسكەرلەرى دە كەرەك», دەپ ءوز تالاپتارىن باياندادى كومپانيا وكىلدەرى.
ال «قازەنەرگوكابەل» اق-نىڭ جۇمىس بەرۋشىلەرى ورتا بۋىنداعى بىلىكتى كادرلار 350 مىڭ تەڭگە ەڭبەكاقى جانە ءار توقسان سايىن جالاقىسىنىڭ 50-100 كولەمىندە سىياقى الاتىنىن ايتتى. مۇندا وندىرىستىك تسەح جۇمىسكەرلەرىن, جيىنتىقتاۋشى, جۇك ءىلۋشى, مەنەدجەر, قامتۋ جونىندەگى ينجەنەر, ينجەنەر-سىناۋشىلاردى قابىلداۋعا دايىن. بۇعان قوسا اليۋمينيدەن سوزبا سىم جاسايتىن تسەح قىزمەتكەرلەرى, قايتا وراۋشى, ايماقتىق مەنەدجەرلەر دە قاجەت.
«پروماناليت» جشس وكىلدەرى دە بىرقاتار بەيىندى كادرلارعا ءزارۋ ەكەنىن ءبىلدىردى. ساتۋ جونىندەگى مەنەدجەر, سمەتالاۋ ينجەنەرى, جوبالاۋ ينجەنەرى سياقتى بىلىكتى كادرلارعا سۇرانىس بار.
ۇيىمداستىرۋشىلاردىڭ سوزىنشە, مۇنداي اۋقىمدى جارمەڭكە الداعى ۋاقىتتا جالعاسىن تابادى.
پاۆلودار وبلىسى