ەلوردا اكىمى جەڭىس قاسىمبەك Instagram پاراقشاسىندا جاڭادان اشىلعان شىعارماشىلىق حابتىڭ جۇمىسى تۋرالى جازدى, دەپ حابارلايدى Egemen.kz.
«ەلوردادا العاشقى ءىرى شىعارماشىلىق حاب («ميرنىي دوم» تۇرعىن ءۇي كەشەنىندە ورنالاسقان) اشىلدى. «ÓzgeEpic» حابىنا بىرەگەي ەتنو-مۋزەي مەن قولونەر شەبەرحاناسى كىرەدى. مۇندا قوناقتارعا زاماناۋي ارت-پەرفورمانس, مۋزىكالىق جانە ادەبي كەشتەر ءۇشىن ترانسفورمەر زال, سونداي-اق زاماناۋي ونەر گالەرەياسى, تەاتر الاڭى جانە ۇلتتىق ويىنداردىڭ سمارت ايماعى ۇسىنىلادى. سونداي-اق حاب اۋماعىندا وتاندىق باسپالاردىڭ ونىمدەرىن ساتۋعا ارنالعان كىتاپ دۇكەنى بار», دەپ جازدى قالا اكىمى.
وسى تۇستا جەڭىس قاسىمبەك استانادا العاش رەت اشىلعان كرەاتيۆتى حابتىڭ ماقساتىن ايقىندادى.
«استاناداعى كرەاتيۆتى حابتىڭ ماقساتى – باسەكەگە قابىلەتتى زاماناۋي ونەردى دامىتۋ جانە قوعامنىڭ مادەني ساناسىن ارتتىرۋ, سونداي-اق دارىندى جانە ينتەللەكتۋالدى جاستاردى قولداۋ ءارى تالىمگەرلىك ەتۋ. حاب شىعارماشىلىق نارىققا جۇزدەگەن ماماندى قوسۋعا ىقپال ەتەدى», دەپ ءتۇسىندىردى ەلوردا اكىمى.