ۇلتتىق قور قارجىسىنا «قازاتومونەركاسىپ» اكتسيالارى ساتىپ الىنادى

مينيسترلىكتىڭ ءباسپاسوز قىزمەتى الەۋمەتتىك مىندەتتەمەلەردى قارجىلاندىرۋدى قامتاماسىز ەتۋ ماقساتىندا مەملەكەت ۇلتتىق قور قاراجاتىن سالۋعا بولاتىن قارجى قۇرالدارىنىڭ تىزبەسىن كەڭەيتكەنىن اتاپ ءوتتى.

بۇل تۋرالى ۇكىمەت قاۋلىسى 2024 جىلى 14 ماۋسىمدا كۇشىنە ەندى. ال بۇل قۇجاتقا سايكەس, ۇلتتىق بانك ۇلتتىق قور ەسەبىنەن «قازمۇنايگاز» ۇك اكتسيالارىمەن بىرگە ەندى «قازاتومونەركاسىپ» ۇاك-نىڭ باعالى قاعازدارىن ساتىپ الا الادى. الايدا مينيسترلىك ولاردىڭ «قازاتومونەركاسىپ» اكتسيالارىنىڭ قانشا پايىزىن ساتىپ الۋدى جوسپارلاپ وتىرعانىن ناقتىلاماعان.

«ۇلتتىق قوردىڭ نەگىزگى ماقساتى – تۇراقتاندىرۋ فۋنكتسياسى – رەسپۋبليكالىق بيۋدجەتتىڭ الەمدىك باعا كونيۋنكتۋراسىنا تاۋەلدىلىگىن تومەندەتۋ. ۇلتتىق قور بولاشاق ۇرپاق ءۇشىن جيناقتاردى قالىپتاستىرۋ ارقىلى جيناقتاۋ قىزمەتىن دە اتقارادى. ۇلتتىق قور قۇرىلعان ساتتەن باستاپ العا قويعان ماقساتتارعا جەتۋ ءۇشىن بىرقاتار ماڭىزدى شارانى جۇزەگە اسىرىپ, بارلىق مىندەتتەمەلەردى تيىسىنشە ورىنداپ كەلەدى. قوردىڭ باستى مىندەتتەرىنىڭ ءبىرى – بولاشاق ۇرپاق ءۇشىن كىرىستى جيناقتاۋ جانە ۇلعايتۋ بولسا, ەكىنشى ماڭىزدى مىندەت – ونى قازىرگى ۇرپاق ءۇشىن پايدالانۋ», دەپ ءتۇسىندىردى قارجى مينيسترلىگى.

مينيسترلىك مۇنداي جاعدايدا الەمدەگى ەڭ ءىرى ۋران كومپانيالارىنىڭ ءبىرىنىڭ باعالى قاعازدارىن ساتىپ الۋ قيسىندى ارەكەت سياقتى كورىنەتىنىن اتاپ ءوتتى.

ايتا كەتەرلىگى, قازىرگى تاڭدا ۋران ونەركاسىبى تارتىمدى ينۆەستيتسيالىق سالالاردىڭ ءبىرى. 5 جىل ىشىندە «قازاتومونەركاسىپ» ۇاك» اق پايداسى ءۇش ەسە ءوستى (2019 جىلى پايدا 318 ملرد تەڭگەنى, 2022 جىلى – 929 ملرد تەڭگەنى قۇرادى). سوڭعى ءۇش جىلدا ۋران باعاسى ءبىر فۋنت ءۇشىن 29 دوللاردان 106 دوللارعا دەيىن ءوستى ء(ۇش ەسەدەن استام), سوندىقتان بۇل فاكتورلار ۋران كومپانيالارى اكتسيالارىنىڭ قۇنىنىڭ وسۋىنە اكەلەدى.

«اتوم ەنەرگەتيكاسى ەلەكتر ەنەرگياسىن ءوندىرۋدىڭ ەڭ تۇراقتى جانە ءتيىمدى ادىستەرىنىڭ ءبىرى بولىپ قالا بەرەدى, اسىرەسە كليماتتىڭ وزگەرۋىنە قارسى كۇرەس جانە تازا ەنەرگيا كوزدەرىنە كوشۋ ۋرانعا سۇرانىستى ارتتىرادى. بۇل رەتتە, اعىمداعى قارجى جىلىنا ارنالعان كىرىس بولجامى نەعۇرلىم قولايلى باعالاۋلارعا نەگىزدەلگەنىن اتاپ وتكەن ءجون. قازىرگى ۋاقىتتا نەگىزگى ەكسپورتتىق مەتالدارعا باعانىڭ سىرتقى جاعدايى تومەندەگەنىن كورسەتەدى: مىرىش – 6,8%-عا, قورعاسىن – 0,4%-عا, يمپورت – 7,3%-عا, مۇناي ءوندىرۋ بولجامنان 95,4 ملن توننادان 90,3 ملن تونناعا دەيىن تومەندەدى  (ونىڭ ىشىندە وسى جىلدىڭ 6 ايىندا 2,3 ملن توننا) جانە ت.ب.», دەپ ناقتىلادى قارجى مينيسترلىگى.

بۇل تەندەنتسيا ءوز كەزەگىندە, رەسپۋبليكالىق بيۋدجەتكە تۇسەتىن تۇسىمدەردىڭ تاپشىلىعىنان كورىنەدى. ۇلتتىق قوردى ۋران سالاسىنا ينۆەستيتسيالاۋ قورجىنىمىزدى ارتاراپتاندىرۋعا مۇمكىندىك بەرەدى.

ايتا كەتەيىك, «قازاتومونەركاسىپ» ۇاك» اق الەمدەگى ەڭ ءىرى رەسۋرستىق بازالاردىڭ بىرىنە قول جەتكىزگەن تابيعي ۋراننىڭ الەمدەگى ەڭ ءىرى ءوندىرۋشىسى. «قازاتومونەركاسىپ» ۋراندى تەك قازاقستان رەسپۋبليكاسىنىڭ اۋماعىندا وندىرەدى جانە 300 مىڭ توننانى قۇرايتىن سالاداعى ەڭ ءىرى ۋران قورى بازاسى بار.