ۇلىتاۋ وبلىستىق تاريحي-ارحەولوگيالىق مۋزەيىنىڭ جادىگەرلەرى قاتارىندا حالىق اقىنى ماياسار جاپاقوۆتىڭ دا دومبىراسى ساقتاۋلى تۇر.
حالقىمىزدىڭ جۇرەگىندە ەسىمدەرى ماڭگىلىككە ساقتالىپ قالعان ۇكىلى ىبىراي, ءمادي, مۇحيت ىسپەتتى ءارى اقىن, ءارى ءانشى تۇلعالاردى وزىنە ۇستاز تۇتقان ماياسار اقىن 1889 جىلى ومىرگە كەلىپ, 1965 جىلى قايتىس بولعان. ول ۇلتىمىزدىڭ ايتىس ونەرىن دامىتۋعا ايرىقشا ۇلەس قوسا ءبىلدى. ونىڭ بولمان, نۇرلىبەك, كوشەن, قايىپ اقىندارمەن ءسوز قاعىسى كوپتەگەن جيناققا ەنگەن. ول سونىمەن بىرگە ەسكىلىكتى اڭىز اڭگىمەلەردى, قيسسا-داستانداردى, وزىنەن بۇرىن جاساعان اقىنداردىڭ جىر-تولعاۋلارىن جاتقا بىلگەن. شورتانبايدىڭ «قاراكەسەك», «اعىباي باتىر» داستاندارى مەن ولەڭدەرى, سونداي-اق «شوجە مەن كەمپىربايدىڭ ايتىسى», «شال مەن قاسقىردىڭ ايتىسى» اتتى اۋىز ادەبيەتىنىڭ ۇلگىلەرى م.جاپاقوۆتىڭ ايتۋىمەن جازىلىپ الىنىپ, ادەبي قوردىڭ مۇراسىنا ەنگىزىلگەن.
ۇلىتاۋ وبلىستىق تاريحي-ارحەولوگيالىق مۋزەيىندەگى ماياساردىڭ قوس ىشەكتى دومبىراسى قايىڭ اعاشىنان جاسالعان, مويىن ۇزىندىعى – 48 سم, شاناعى – 32 سم. دومبىرانى مۋزەيگە 1985 جىلى اقىننىڭ ۇلى ابدىقۇل تاپسىرعان. دومبىرا كۇنىنە وراي وتكىزىلگەن «دومبىرا – قازاق حالقىنىڭ اسىل مۇراسى» اتتى كورمەگە ماياسار اقىننىڭ دومبىراسى قويىلىپ, كەلۋشىلەردىڭ قاتتى قىزىققانىن بايقادىق.
جەزقازعان