عالامنىڭ سالاماتتىلىق احۋالى

ددۇ-نىڭ 2020–2025 جىلدارعا ارنالعان ەۋروپالىق جۇمىس باعدار­لاماسى شەڭبەرىندە قوعامدىق دەنساۋ­لىق ساقتاۋ سالاسىنداعى ماماندار­دىڭ تاجىريبە الماسۋى – ماڭىزدى وقيعا. اسىرەسە ەۋروپا قۇرلىعىنداعى ەلدەردىڭ, ورتالىق ازيا مەن تمد-نىڭ قارۋ­لى قاقتىعىستار, حالىقتىڭ قوزعا­لىسى, كليماتتىڭ وزگەرۋى, شامادان تىس ۋربانيزاتسيا, ەنەرگەتيكالىق داع­دا­رىس, الەۋمەتتىك-ەكونوميكالىق تەڭ­سىز­دىك, جالعان اقپارات تاراتۋ, مەدي­تسينا قىزمەتكەرلەرىنىڭ فيزيكالىق جانە پسيحيكالىق شارشاۋى سىندى تۇيت­كىلدى تارقاتۋ ءۇشىن دە قاجەت. الەم­­دى الاڭداتقان جاڭا ىندەتتىڭ پاي­دا بول­ۋى جانە جەر ءجۇزىن جايلاعان جۇق­پا­لى اۋرۋ­لاردىڭ قايتا ۇدەپ, تارالۋى دا عالام­­نىڭ الاڭىن تۋدىرىپ وتىر.

«COVID-19 پاندەمياسى حالىقارا­لىق ىنتىماقتاستىق پەن قوعامدىق دەنساۋلىق ساقتاۋ سالاسىنداعى بىلىكتى مامانداردى دايارلاۋدىڭ ماڭىز­دىلىعىن ايقىن كورسەتتى. بۇل كۋرسقا قاتىسۋشىلار الەمدىك تاجىريبەمەن تانىسىپ قانا قويماي, حالىقارالىق دەڭگەيدە قوعامدىق دەنساۋلىق ساقتاۋ ماماندارىنىڭ يننوۆاتسيالىق جەلىسىن قۇرۋعا ىقپال ەتۋ مۇمكىندىگىن يەلەنەدى», دەدى دەنساۋلىق ساقتاۋ ۆيتسە-ءمينيسترى ەربول وسپانوۆ.

«سوڭعى ونجىلدىقتاردا الەمدە كوپتەگەن قىم-قيعاش قيىندىقتار بولدى. دەنساۋلىقتىڭ ەكولوگيالىق تۇراقتىلىقپەن جانە الەۋمەتتىك وزگەرىستەرمەن بايلانىسى نىعايسا, ءتيىمدى كوشباسشىلىقتىڭ ماڭىزى ارتادى. كۋرس بارىسىندا بىرنەشە ماڭىزدى تاقىرىپتار, سونىڭ ىشىندە جاھاندىق جانە وڭىرلىك دەڭگەيلەردەگى قوعامدىق دەنساۋلىق ساقتاۋ ماسەلەلەرى, ولاردىڭ سەبەپتەرى مەن شەشىمدەرى, سونداي-اق ۆەدومستۆوارالىق ىنتى­ماق­تاستىق تا تالقىلاندى», دەدى ددۇ-نىڭ قازاقستانداعى وكىلى, دوكتور سكەندەر سىلا.

استاناداعى كۋرستار باعدارلاماسى باسقارۋ جانە ستراتەگيالىق جوسپارلاۋ داعدىلارىن دامىتۋعا باعىتتالدى. قاتىسۋشىلار قارقىندى وقىتۋ مەن تاجىريبە الماسۋ ارقىلى دا دەنساۋلىق ساقتاۋعا تونەتىن سىن-قاتەرلەرگە توس­قاۋىل قويۋدىڭ مۇمكىندىگىن تالقىلادى.