ەل سپورتىنىڭ ەرتەڭى

جۋىردا تۋريزم جانە سپورت مينيسترلىگى سپورت جانە دەنە شىنىقتىرۋ ىستەرى كوميتەتىنىڭ توراعاسى ەربول مىرزابوسىنوۆ رەسپۋبليكالىق سپورتتىق مەكتەپ-ينتەرنات-كوللەدجدەردىڭ باسشىلارىن جيناپ, قىزمەتتىك جيىن وتكىزدى. جوعارى سپورتقا لايىقتى ءىزباسارلار دايارلايتىن سپورتتىق مەكتەپ, كوللەدجدەردەگى كەم-كەتىكتى بۇتىندەۋ ماڭىزدى. ەل سپورتىن وركەندەتۋگە ۇمتىلعان ورەندەردى مەكتەپكە قابىلداپ العاننان باستاپ چەمپيوندىق دارەجەگە جەتكىزگەنگە دەيىنگى ارالىقتاعى جۇمىستى جۇيەلى دامىتۋ مىندەتى تۇر. قانداي كەدەرگى بار, نەندەي تۇيتكىلدىڭ ءتۇيىنىن تارقاتۋ كەرەك دەگەن ساۋا­ل قاشاندا وزەكتى. سپورتشىنىڭ چەمپيوندىق دارەجەگە جەتۋى باپكەرلەردىڭ بىلىكتىلىگىنە تىكەلەي قاتىستى. كەلەشەكتە جاتتىقتىرۋشىلاردىڭ ساپالىق قۇرامىنا تالداۋ جاساپ, بىلىكتىلىگى جوعارى مامانداردى تارتۋ, سونداي-اق دايىنداۋ ادىستەرىن جەتىلدىرۋ ماقساتىندا جۇمىس توبىن قۇرىپ, توقسان سايىن مامانداردىڭ بىلىكتىلىگىن ارتتىرۋ كۋرستارىن ۇيىمداستىرۋ جۇزەگە اسىرىلۋى مۇمكىن. سەلەكتسيا جاساقتاۋ ءۇشىن جەر-جەردەن تالانتتى سپورتشىلاردى جيناۋ باعىتىندا كوميسسيا قۇرىپ, وڭىرلەردە ىرىكتەۋ وتكىزىپ, كورىنبەي جۇرگەن تالانتتاردى تاۋىپ, جيناۋ­دى قولعا الۋ قاجەت. سوندا عانا دارىندى, قارىمدى بالالاردى سپورتقا تارتۋدىڭ جەمىسىن كەلەشەكتە كورەمىز, ەگەر جۇمىس جۇيەلى جۇرگىزىلسە. مەكتەپ-ينتەرناتتارداعى سپورت تۇرلەرىن بازالارىنا سايكەس توپتاستىرۋ كەرەك. كوميتەت توراعاسى ەربول مىرزابوسىنوۆ الماتىداعى ك.احمەتوۆ اتىنداعى وليمپيادا رەزەرۆىنىڭ رەسپۋبليكالىق مامانداندىرىلعان مەكتەپ-ينتەرنات-كوللەدجىندەگى سپورت تۇرلەرىنىڭ كەيبىرىنىڭ سپورتتىق بازاسى سىن كوتەرمەيتىنىن ايتتى. بولاشاق وليمپياداشىلاردى دايار­لايتىن ىرگەلى ءبىلىم مەكەمەسىندە 17 سپورت ءتۇرى قامتىلسا, سونىڭ تەك جەتەۋى بو­يىن­شا بالالار الاڭسىز جاتتىعۋ وتكىزەدى. ال قالعان 9 سپورت ءتۇرىنىڭ بازاسى تالاپقا ساي ەمەس. مۇنىڭ زاردابى الدىمەن وقۋعا تيەتىنى بەلگىلى. ولار ءوزى قالاپ تاڭداعان سپورت ءتۇرى بويىنشا ازىرلىك وتكىزۋ ءۇشىن باسقا بازاعا بارۋعا ءماجبۇر.

تاعى ءبىر ماسەلە, جاس سپورتشىلار تاجىريبە جيناپ, شىڭدالۋى ءۇشىن ۇلتتىق قۇرامالارمەن بىرلەسكەن وقۋ-جاتتىعۋ جيىندارىن وتكىزۋ مۇمكىندىگىن ارتتىرىپ, سپورتتىق مەديتسينالىق كومەك كورسەتۋدى جولعا قويعان ابزال. سەبەبى كەز كەلگەن سپورتتاعى جوعارى ناتيجە سپورتشىنىڭ دەنساۋلىعىنا تىكەلەي قاتىستى. بۇل, اسىرەسە بالالار سپورتىن دامىتۋدا ماڭىزدى. دارىگەر مامانداردىڭ بىلىكتىلىگىن قايتا قاراستىرىپ, قاجەت بولعان جاعدايدا ۇلتتىق سپورتتىق مەديتسينا جانە وڭالتۋ ورتالىعىنىڭ ماماندارىمەن تىزە قوسىپ جۇمىس ىستەۋ دە ارتىق بولمايدى.

«تۋريزم جانە سپورت مينيستر­لىگىنە قاراستى ءتورت مەكتەپ-ين­تەرنات-كوللەدج بەن ءبىر رەسپۋب­ليكالىق سپورت كوللەدجى بار. بۇگىندە جوعارى سپورتقا رەزەرۆ دايىنداپ, كەلەشەك چەمپيوندار وسى ورتادا شىڭدالادى. قازىر كەيبىر ينتەرناتتاردىڭ دايىندىق بازالارى زامانۋي تالاپقا ساي بولماعاندىقتان بالالاردىڭ الاڭسىز شىنىعۋىنا قولبايلاۋ بولىپ وتىر. سول سەبەپتى سپورت تۇرلەرىن جۇيەلەندىرۋ بويىنشا بازا مۇمكىندىكتەرىنە ساي شوعىرلاندىرۋىمىز قاجەت. وسىنداي مۇمكىندىك ارقىلى قايتالاناتىن سپورت تۇرلەرىن ازايتىپ, ساپالى سپورتشىلار قۇرامىن دايىندايمىز. مىسالى, «شاڭىراق» مەكتەپ-ينتەرنات كوللەدجىندە سەمسەرلەسۋ سپورتى بويىنشا وقيتىن سپورتشىلار كىسى اينالىپ جۇرە المايتىن تار جەردە ازىرلىك جۇرگىزەدى. ودان دا بۇل سپورتتى بازاسى قالىپتاسقان ك.احمەتوۆ اتىنداعى مەكتەپ-ينتەرنات كوللەدجىندە دامىتقان ءجون. سونداي-اق بۇل سپورتتىق مەكەمەدە دزيۋدو سپورتىنان ەتەنە دامىعان ورتالىق بار. ال ريددەردە قىسقى سپورت تۇرلەرىن وركەندەتۋ مىندەتى تۇر. قازىر ول جەردە بازاسى جوق بولسا دا, جەڭىل اتلەتيكا بويىنشا سپورتشىلار دايىندالىپ جاتىر. بۇل سپورت ءتۇرىنىڭ وركەن جايۋىنا كەدەرگى. ودان دا ونى شقو-دا بازاسى قالىپتاسقان ينتەرناتقا بەرگەنىمىز ءجون. سەبەبى و.رىپاكوۆا اتىنداعى سپورت ورتالىعى سياقتى زاماناۋي ۇلگىدە سالىنعان, سپورت­تىق جابدىقپەن قامتىلعان كەشەندەردە شىنىعادى», دەيدى ە.مىرزابوسىنوۆ.

2026 جىلى يتاليادا وتەتىن قىسقى وليمپيادا ويىندارى 2028 جىلى اقش-تىڭ لوس-اندجەلەس قالاسىندا جالاۋى جەلبى­رەيتىن جازعى وليمپيادا ويىندا­رىندا ەل ءۇمىتىن ارقالاي­تىن ساڭلاقتاردى دايارلاۋدى بۇ­گىننەن قولعا العان ماڭىزدى.