عيماراتتىڭ شاتىرى مەن قابىرعاسىن جىلى ۇستايتىن ماتەريالدار جاساۋمەن اينالىساتىن «Metal Former» جشس «جايلى مەكتەپ» جوباسىنا بەلسەندى قاتىسىپ جاتىر. زاۋىتتا عيمارات قابىرعاسىن جىلى ۇستايتىن بىرنەشە ءونىم جاسالادى. بۇگىنگە دەيىن 90 مەكتەپتىڭ تاپسىرىسىن تولىق ورىنداپ, ءتيىستى جابىندىلارىن جىبەرىپ ۇلگەرگەن. كاسىپورىندا 75 جۇمىسشى مەن قىزمەتكەر ەكى اۋىسىمنان اپتاسىنا 7 كۇن, تاۋلىگىنە 24 ساعات تولاسسىز جۇمىس ىستەيدى.
«زاۋىت ءونىمىنىڭ ساپاسى شەتەلدىك ماتەريالدان ءبىر مىسقال كەم ەمەس. سوعان قاراماستان وتاندىق قۇرىلىس كومپانيالارى مويىن بۇرماي ءجۇر» دەيدى سەرىكتەستىكتىڭ وندىرىستىك ديرەكتورى ادىلەت بەركىنباەۆ.
«جارناما جاعى كەمشىن. سونىڭ سالدارىنان زاۋىتتى دۇرىستاپ تانىستىرىپ, ماتەريالدىڭ ساپالى جانە ءتيىمدى ەكەنىن ناسيحاتتاي الماي جاتىرمىز. ەلوردادا وسىنداي ساپالى ماتەريال شىعارىلىپ جاتقانىن بالكىم كوبى بىلمەس. ال بىلگەندەرىنىڭ ءوزى ەسكى سۇرلەۋ, ۇيرەنشىكتى سوقپاقپەن ءدال وسى ءونىمدى ءالى كۇنگە شەتەلدەن يمپورتتاپ كەلەدى. قىركۇيەك ايىندا پايدالانۋعا بەرىلەتىن مەكتەپ ماتەريالدارىن 20 شىلدەگە دەيىن دايىنداپ ءبىتىرۋىمىز كەرەك. ودان كەيىن 16 جەلتوقساندا اشىلاتىن وقۋ وشاقتارى بار, ولاردىڭ تاپسىرىسىن 30 قازانعا دەيىن ازىرلەپ ۇلگەرۋگە ءتيىسپىز», دەدى ءا.بەركىنباەۆ.
بىراق وسىدان كەيىن داعدارىپ قالمايمىز با دەگەن الاڭداۋشىلىق بار. ويتكەنى كاسىپورىنعا كەلەسى جىلى سالىناتىن مەكتەپتەردىڭ جوباسى ۇسىنىلماعان.
«تاپسىرىستى تۇگەل ورىنداپ بولعان سوڭ ءارى قاراي نە ىستەيمىز؟ زاۋىت توقتاپ قالماي ما؟ ءبىزدى قازىر وسى وي قاتتى مازالاپ ءجۇر. سوندىقتان ەكسپورتقا بايلانىستى تاراپتاردى كەلىسسوزگە شاقىرىپ جاتىرمىز. ەگەر الداعى كۇز, قىس ايلارىندا جۇمىسسىز تۇرىپ قالساق قيىن تيمەك. سەبەبى ۇلكەن نەسيەمىز بار. بۇل زاۋىتقا ينۆەستيتسيانىڭ 80%-ىن «سامۇرىق-قازىنا» قۇيعان. ونى قايتارۋ ءۇردىسىن ءبىر ساتكە دە ىركىلتۋگە بولمايدى. وسى ەكى ماسەلەگە وراي بىزدە قورقىنىش بولىپ تۇر», دەدى.
قالالىق ينۆەستيتسيا جانە كاسىپكەرلىكتى دامىتۋ باسقارماسىنىڭ باستىعى حالەل اكىمجانوۆتىڭ ايتۋىنشا, زاۋىت ۇلكەن سەرتيفيكاتتاۋدان جاقسى ءوتتى. «قازىر وتاندىق نارىقتا قاجەت ماتەريالعا دەگەن سۇرانىستىڭ 15%-ىن عانا قامتىپ وتىرعانى راس. كاسىپورىننىڭ نارىقتاعى ورنىن كەڭەيتۋدىڭ امالىن قاراستىرىپ جاتىرمىز», دەيدى باسقارما باسشىسى.
كاسىپورىن ءار ماتەريالىنا 20 جىلعا دەيىن كەپىلدىك بەرەدى. ءارى وتاندىق قۇرىلىس كومپانيالارىنا ماتەريالدى ەڭ تومەنگى باعامەن ۇسىناتىن جەڭىلدىگى تاعى بار. مەملەكەتتىڭ ءوزى قۇرىلىس جۇمىستارىنا وتاندىق ماتەريالدار پايدالانىلسىن دەگەن باستاما كوتەرىپ وتىر ەمەس پە؟ ەندەشە, «Metal Former» ءوز ەلىندە وگەيدىڭ كۇيىن كەشپەۋگە ءتيىس.