تولاعايلار كۇش سىناستى

ەلوردا ءتورىن دۇبىرگە بولەيتىن دۇنيەجۇزىلىك كوشپەلىلەر ويىندارىندا تولاعايلار دا سايىسقا ءتۇسىپ, «Powerfull nomad» سپورت ءتۇرى بويىنشا كۇشىن سىنايدى. وسىناۋ ايتۋلى دوداعا ەلىمىزدىڭ اتىنان قوسىلاتىن الىپتاردى ىرىكتەۋدىڭ سوڭعى كەزەڭى استانا قالاسىندا ءوتتى. رەسپۋبليكالىق تۋرنيردە ءۇش مەگاپوليس, 17 وبلىستان ىرىكتەلىپ كەلگەن الىپتار بەسسايىس ءتۇرى بويىنشا دوداعا كىردى.

الىپتار سايىسىنىڭ الدىندا شارا­نىڭ قۇرمەتتى قوناعى, بىرنەشە مارتە رەكورد جاڭعىرتقان ءجامالي ديحان ۇلى سالماعى 3 توننا تارتاتىن اۆتوكولىككە 7 جىگىتتى (ارقايسىنىڭ سالماعى 100 كگ) مىنگەستىرىپ الدى دا, تاياق تاستام جەرگە (25 مەتر) تىسىمەن سۇيرەدى. بۇعان دەيىن دە بىرنەشە مارتە رەكورد جاڭارتىپ, الىپ كۇش يەسى ەكەنىن ايگىلەپ كەلە جاتقان جىگىت اعاسى ادام بالاسىنىڭ مۇمكىندىگى شەكسىز ەكەنىن جاستارعا ۇلگى ەتۋدى كوزدەيدى.

«جاسىم – 53-تە. بۇعان دەيىن 5 تون­نالىق كولىككە 17 ادامدى مىنگىزىپ سۇي­رەدىم, 20 ادام سىياتىن اۆتوبۋستى قوزعاپ تا كۇشىمدى سىنادىم. مەنىڭ ماقساتىم – ماقتانگەرلىك ەمەس, قازاق ازاماتتارىنىڭ قايسارلىعىن, قارا كۇشكە يە ەكەنىن كورسەتۋ. ادامنىڭ مۇمكىندىگى شەكسىز, تەك سونى ءتيىمدى پايدالانا الساڭ بولعانى. پىشاقتىڭ جۇزىندە تۇرىپ 170 كگ تارتاتىن تەمىردى كوتەردىم. 2013 جىلى 18 پىشاقتى تابانىممەن تاپتاپ, تىسىممەن ادامدى, قولىممەن گىرتاسىن ءبىر مەزەتتە كوتەرگەنىم گيننەس رەكوردتار كىتابىنا ەندى. ودان كەيىن بەس مارتە رەكورد جاڭارتتىم», دەگەن ءجامالي ديحان ۇلى تولاعايلارعا ساتتىلىك تىلەپ, باتاسىن بەردى.

قاتىسۋشىلار الدىمەن سالماعى 100 كگ تارتاتىن كورتاستى 1 مينۋت ىشىندە قاشىقتىققا كوتەرىپ جۇرۋدەن سىنعا ءتۇستى. 19 قاتىسۋشىنىڭ بارلىعى دەرلىك بۇل مەجەدەن ءوتتى. ەكىنشى سايىستا سالماعى 10 كگ تارتاتىن ەگەۋلى نايزانى قاشىقتىققا لاقتىرۋدان سىنعا ءتۇستى. قاس قىلعاندا الابۇرتىپ تۇرعان كۇن رايى دا كۇرت بۇزىلىپ, جەل تۇرىپ قاتىسۋشىلاردىڭ قايرات-كۇشىنە ايتارلىقتاي كەدەرگىسىن تيگىزدى. ودان كەيىن 130 كگ تارتاتىن جۋان بورەنەنى اش بەلىنەن قاپسىرا ۇستاپ يىققا سالىپ, 1 مينۋتتا وتىرىپ-تۇرۋ بويىنشا دوداعا تۇسسە, 200 كگ جۇك تيەلگەن اربانى اۋدەم جەرگە سۇيرەپ تە كوردى.

«تولاعاي» الىپتار سايىسىن بۇعان دەيىن دە وتكىزىپ كەلەمىز. كۇزدە استانا قالاسىندا دۇنيەجۇزىلىك كوشپەلىلەر ويىندارى وتەدى. سول دودادا الىپ كۇش يەلەرىنىڭ دە باسەكەسىن كوپشىلىك تاماشالايدى. ەلوردا كۇنىنە وراي ۇيىمداستىرىلعان بۇگىنگى دوداعا ەلىمىزدىڭ ءار وڭىرىنەن ىرىكتەلگەن 19 سپورتشى قاتىستى. وڭىرلەردەگى ىرىكتەۋ ناۋرىز ايىنان بەرى جۇرگىزىلدى. كەشەگى 51 پۇت (816 كگ) كىردىڭ تاسىن كوتەرگەن بالۋان شولاق, قارا كۇشى بويىنا سىيماعان قاجىمۇقانداي بابالارىمىزدىڭ بۇگىنگى ۇرپاعى دا قايراتتى ەكەنىن دالەلدەسەك دەيمىز. يگى ءىس-شارانى قولداپ, وتكىزۋگە مۇرىندىق بولعان استانا قالاسىنىڭ اكىمدىگىنە العىس ايتامىز, بۇل سايىس جىل سايىن جالعاسىن تابادى», دەدى ءتۋرنيردىڭ ۇيىمداستىرۋشىسى تەمىر سپاتاەۆ.

سايىس قورىتىندىسىندا تۇركىستان وبلىسىنان كەلگەن ازامات ماقۇلبەكوۆ بارلىق قارسىلاسىنان باسىم ءتۇسىپ, باس بايگەگە تىگىلگەن 1 ميلليون تەڭگەنى ولجالاپ قانا قويماي, V دۇنيەجۇزىلىك كوشپەلىلەر ويىندارىنا قاتىسۋ جولداماسىن يەلەندى. 2-ورىن اقتوبە وبلىسىنان قاتىسقان جانبولات يبادىلداەۆقا بۇيىرسا (600 مىڭ تەڭگە), 3-ورىن ماڭعىس­تاۋلىق ەرسەيىت برالينگە (400 مىڭ تەڭگە) بەرىلدى.

استانا قالاسى اكىمدىگىنىڭ الاڭىندا وتكەن الىپتار سايىسىن تاماشالاۋشىلار الدىندا الماتىلىق باۋىرجان ءابدىحايىم سالماعى 40 كگ تارتاتىن مۋلياج­دى 4 مىڭ رەت كوتەرىپ ءوزىنىڭ رە­كور­دىن جاڭارتسا, رەسەيدىڭ تۇمەن قا­لاسىنان كەلگەن ازامات بەكتاسوۆ 81 كگ گىرتاسىن استانا قالاسىنىڭ 26 جىل­دىعىنا وراي 26 مارتە كوتەردى.