پاۆلودار وبلىسىنداعى «ەرتىس ورمانى» مەملەكەتتىك تابيعي ورمانىنا بارعان ءماجىلىس دەپۋتاتتارى, «Amanat» پارتياسى فراكتسياسىنىڭ مۇشەلەرى نۇرجان اشىمبەتوۆ, ۆەرا كيم جانە جارقىنبەك امانتاي ۇلى ورمانشىلارمەن كەزدەسىپ, قورىقتىڭ الداعى ءورت قاۋپى كەزەڭىنە دايىندىعىن تەكسەردى.
«ەرتىس ورمانى» باس ديرەكتورىنىڭ مىندەتىن اتقارۋشى قازبەك امەتوۆتىڭ ايتۋىنشا, تەحنيكا پاركىن جاڭارتۋ جۇمىسى جالعاسىپ جاتىر. اتاپ ايتقاندا, 8 تراكتور ساتىپ الىندى. ق.امەتوۆ قىزمەتكەرلەردى جاڭا تەحنيكامەن قامتاماسىز ەتۋ جۇمىسىن جالعاستىرۋ اسا ماڭىزدى ەكەنىن ايتسا, ءبولىم باسشىسى قوبىلاندى اتىعاەۆ بىلتىر ورمانشىلاردىڭ جالاقىسى وسكەنىمەن, وسى سالادا جۇمىس ىستەيتىن جۇرگىزۋشىلەر مەن ءورت سوندىرۋشىلەردىڭ ەڭبەكاقىسى جوعارىلاماعانىن العا تارتتى.
ءماجىلىس دەپۋتاتى نۇرجان اشىمبەتوۆ مەملەكەت باسشىسىنىڭ تاپسىرماسىمەن 2023 جىلعى 1 شىلدەدەن باستاپ تەك ءورت سوندىرۋشىلەردىڭ جالاقىسى كوتەرىلگەنىن ءتۇسىندىردى. بولاشاقتا تەحنيكالىق پەرسونالدىڭ جالاقىسىن 2 ەسە ءوسىرۋ قاجەت.
ال دەپۋتات ۆەرا كيمنىڭ ايتۋىنشا, ورمان شارۋاشىلىعى سالاسىنا كادر تارتۋ ءۇشىن «ديپلوممەن اۋىلعا» سىندى ءتۇرلى مەملەكەتتىك باعدارلامالار ۇسىناتىن مۇمكىندىكتەردى پايدالانۋ قاجەت.
– جوعارى وقۋ ورىندارىن تامامداعان جاس ماماندار شالعايداعى ورمان شارۋاشىلىقتارىنا جۇمىسقا ورنالاسۋعا اسىقپايدى. سەبەبى ولارعا باسپانا مەن جايلى ءومىر ءسۇرۋ جاعدايىن ۇسىناتىن مۇمكىندىك جوق. كادرلاردى ۇستاپ قالۋ ءۇشىن سالادا جۇمىس ىستەپ جاتقان جەرگىلىكتى جاس ماماندارعا جانە جالپى جاستارعا اۋدان اكىمدىكتەرىنەن اۋداندا سۇرانىسقا يە ماماندىقتار بويىنشا ءبىلىم بەرۋ گرانتتارىن ۇسىنۋ, بىلىكتىلىكتى ارتتىرۋ كۋرستارىن ۇيىمداستىرۋ, كوتەرمە جاردەماقى تولەۋ, تۇرعىن ءۇي, جۇمىس ورنىن ۇسىنۋ تاجىريبەسىن كەڭەيتۋ قاجەت, – دەدى ول.