شىمكەنت قالاسىنىڭ اباي اۋدانىنداعى «جاڭا تۇرلان» شاعىن اۋدانىندا بولعان ءماجىلىس دەپۋتاتى, «Amanat» پارتياسى فراكتسياسىنىڭ مۇشەسى دانابەك يسابەكوۆ پارتيانىڭ «حالىقپەن بىرگە!» سايلاۋالدى باعدارلاماسى اياسىندا سالىنىپ جاتقان 1200 ورىندىق جاڭا مەكتەپ قۇرىلىسىنىڭ بارىسىمەن تانىستى.
قالادا «جايلى مەكتەپ» ۇلتتىق جوباسى اياسىندا 18 مەكتەپ سالۋ جوسپارلانعان. ونىڭ 12-ءسى بيىل, قالعان 6 مەكتەپ 2025 جىلى پايدالانۋعا بەرىلەدى.
سايلاۋشىلارمەن كەزدەسۋدە دەپۋتات دانابەك يسابەكوۆ قۇرىلىستى دەر كەزىندە اياقتاپ, بالالاردىڭ ءبىلىم الۋىنا قولايلى جاعداي جاساۋدىڭ ماڭىزىن اتاپ ءوتتى.
«جايلى مەكتەپ» جوباسىندا مەكتەپتەردى باستاۋىش جانە ورتا سىنىپتارعا ارنالعان جەكە بلوكتارمەن, امبەباپ ءماجىلىس زالدارىمەن, بالالارعا ارنالعان جەكە شكافتارمەن, وقۋ-زەرتحانالىق جابدىقتارمەن, جوعارى جىلدامدىقتى ينتەرنەتپەن جابدىقتاۋ كوزدەلگەن. سونداي-اق فيزيكا, حيميا جانە بيولوگيا, روبوتتەحنيكا كابينەتتەرى مەن STEM-زەرتحانالارى بولادى.
قاۋىپسىزدىك ماسەلەلەرىنە ەرەكشە كوڭىل بولىنەدى. مەكتەپ عيماراتتارى تەرروريستىك قاۋىپتەردىڭ الدىن الۋ ءۇشىن بەينەباقىلاۋ جانە دىبىستىق ەسكەرتۋ جۇيەلەرىمەن, سونداي-اق ەسىك پەن بلوكتى ق ۇلىپتاۋ فۋنكتسياسىمەن جابدىقتالادى. وقۋشىلاردىڭ سپورتپەن شۇعىلدانىپ, سالاماتتى ءومىر سالتىن ۇستانۋى ءۇشىن باستاۋىش جانە جوعارى سىنىپ وقۋشىلارىنا سپورت زالدارى مەن ءتۇرلى ويىن الاڭدارى سالىنادى. ءار مەكتەپتە ءوز كىتاپحاناسى, وقۋ زالى, ەلەكتروندى كىتاپحانا جانە ءار قاباتتا كوۆوركينگ الاڭدارى بولادى.
بىلتىر پارتيانىڭ سايلاۋالدى باعدارلاماسى اياسىندا شىمكەنتتە 15 مەكتەپ سالىنىپ, 3 مەكتەپ كەڭەيتىلدى.