سەنات دەپۋتاتى رۋسلان رۇستەموۆ الماتى قالاسىندا «ورتالىق ازياداعى ورنىقتى دامۋ ماقساتتارىنا قول جەتكىزۋ پيونەرلەرى (SDG Pioneers)» بايقاۋىنىڭ جەڭىمپازدارى مەن قاتىسۋشىلارىن ماراپاتتاۋ راسىمىنە قاتىستى. ءىس-شارانى بۇۇ-نىڭ قازاقستان مەن ورتالىق ازياداعى جاھاندىق شارتى ۇيىمداستىرعان.
سەناتور رۇستەموۆ ساراپشىلارمەن, ۇيىمداستىرۋشىلارىمەن اڭگىمە بارىسىندا مەملەكەتتىڭ بيلىك بۋىندارىن ترانسفورماتسيالاۋ ارقىلى ەلىمىزدە جۇزەگە اسىرىپ جاتقان رەفورمالارى تۋرالى ايتىپ بەردى. ەل باسشىسىنىڭ الەۋمەتتىك-ەكونوميكالىق ءومىردى جاقسارتۋ ماقساتىندا دەنساۋلىق ساقتاۋ, ءبىلىم بەرۋ, الەۋمەتتىك ساياسات, قورشاعان ورتانى قورعاۋ سالاسىندا قابىلداپ جاتقان ستراتەگيالىق ماڭىزدى شەشىمدەرى تۋرالى دا ءسوز بولدى.
«قازاقستان تاۋەلسىزدىكتىڭ العاشقى كۇنىنەن باستاپ بۇۇ مەن ونىڭ مامانداندىرىلعان مەكەمەلەرىنىڭ جۇمىسىنا بەلسەندى قاتىسىپ كەلە جاتقانى بارشاعا بەلگىلى. بۇل ىنتىماقتاستىق – مەملەكەتىمىزدىڭ سىرتقى ساياساتىنداعى باسىم باعىتتاردىڭ ءبىرى. قازاقستاننىڭ حالىقارالىق ارەناداعى جاھاندىق جانە وڭىرلىك قاۋىپسىزدىك سالاسىنداعى ستراتەگيالىق مۇددەلەرىن قامتاماسىز ەتۋ, ورنىقتى دامۋدىڭ نەگىزىن جاساۋ, الەم قوعامداستىعىنىڭ مۇشەلەرى اراسىنداعى قاتىناستاردى ۇيلەستىرۋ – بۇل قىزمەتتىڭ باستى مىندەتتەرى», دەدى سەناتور.
دەپۋتات ساراپشىلارمەن پىكىرسايىس بارىسىندا ورنىقتى دامۋ ماقساتتارىن ىسكە اسىرۋدا, اتاپ ايتقاندا, جاساندى ينتەللەكت قۇرالدارىن پايدالانۋ ارقىلى پروبلەمالارعا مونيتورينگ جۇرگىزۋ جانە زەردەلەۋ ءۇشىن جاڭا تسيفرلىق شەشىمدەر ەنگىزۋ ماسەلەسىنە جەكە توقتالدى.
ءىس-شارا قورىتىندىسىندا سەناتور ورنىقتى دامۋ سالاسىنداعى ۇلتتىق ماقساتتار مەن مىندەتتەردى ىسكە اسىرۋ بارىسىن مونيتورينگىلەۋ جونىندەگى پارلامەنتتىك كوميسسيانىڭ اتىنان ۇيىمداستىرۋشىلارعا زور العىسىن ءبىلدىردى. سونداي-اق قاتىسۋشىلارعا «ورتالىق ازياداعى ورنىقتى دامۋ ماقساتتارىنا قول جەتكىزۋ پيونەرلەرى (SDG Pioneers)» جەڭىس ماراپاتى مەن سىيلىقتارىن تابىس ەتتى.