«قازگيدرومەت» سينوپتيكتەرى 5 شىلدەگە ارنالعان اۋا رايى بولجامىن ۇسىندى. بولجامعا سايكەس, ەلدىڭ باتىس وڭىرلەرىندە اپتاپ ىستىق كۇتىلەدى, دەپ جازادى Egemen.kz.
مامانداردىڭ بولجامىنا قارعاندا, ەرتەڭ بقو, اتىراۋ, ماڭعىستاۋ وبلىستارىندا, سونداي-اق اقتوبە ءوڭىرىنىڭ باتىسىندا اپتاپ ىستىق ساقتالادى.
ال ەلدىڭ وڭتۇستىك وڭىرلەرى ءالى دە انتيتسيكلوننىڭ ىقپالىندا بولادى, بىراق جاۋىن-شاشىن كۇتىلمەيدى. قازاقستاننىڭ قالعان اۋماعىندا تسيكلون جانە ونىمەن بايلانىستى اتموسفەرالىق فرونتالدى بولىكتەردىڭ جۇرۋىنە بايلانىستى نايزاعاي ويناپ, بۇرشاق تۇسەدى, قاتتى جەل سوعادى, ال سولتۇستىك, ورتالىق, شىعىس وڭىرلەردە, ەلدىڭ وڭتۇستىك-شىعىسىنداعى تاۋلى اۋدانداردا قاتتى جاڭبىر جاۋادى.
سينوپتيكتەر اباي وبلىسىنىڭ سولتۇستىك-باتىسىندا, ورتالىعىندا, اتىراۋ ءوڭىرىنىڭ باتىسىندا, شىعىسىندا, باتىس قازاقستان وبلىسىنىڭ سولتۇستىك-باتىسىندا, سولتۇستىگىندە, ماڭعىستاۋ ءوڭىرىنىڭ وڭتۇستىگىندە, الماتى وبلىسىنىڭ باتىسىندا, جەتىسۋ وبلىسىنىڭ سولتۇستىگى مەن شىعىسىندا جوعارى ءورت قاۋپى ساقتالاتىنىن ەسكەرتتى.
«تۇركىستان, قىزىلوردا, جامبىل, ۇلىتاۋ وبلىستارىندا, الماتى ءوڭىرىنىڭ باتىسىندا, جەتىسۋ وبلىسىنىڭ سولتۇستىگىندە, شىعىسىندا, شقو, قوستاناي ءوڭىرىنىڭ وڭتۇستىگىندە, قاراعاندى وبلىسىنىڭ باتىسىندا, وڭتۇستىگىندە, اتىراۋ ءوڭىرىنىڭ وڭتۇستىك-شىعىسىندا, باتىسىندا, ماڭعىستاۋ وبلىسىنىڭ باتىسىندا توتەنشە ءورت قاۋپى ساقتالادى», دەلىنگەن «قازگيدرومەت» حابارلاماسىندا.