تۇركياداعى ەسكىشەحير پروۆينتسياسىندا «قازاق مادەنيەتى اپتالىعى» رەسمي اشىلىپ, وعان پروۆينتسيا گۋبەرناتورى گۇنگور ءازىم تۋنا, «تۇركسوي» حالىقارالىق ۇيىمىنىڭ باس حاتشىسى دۇيسەن قاسەيىنوۆ, قازاقستاننىڭ ءتۇركياداعى توتەنشە جانە وكىلەتتى ەلشىسى جانسەيىت تۇيمەباەۆ, اكادەميالىق توپتار, مادەني-گۋمانيتارلىق جانە قوعامدىق-ساياسي ورتالاردىڭ وكىلدەرى, قازاق ستۋدەنتتەرى مەن تۇركياداعى قازاق دياسپوراسى قاتىستى, دەپ حابارلايدى قر ءسىم ءباسپاسوز قىزمەتى.
اپتالىق اياسىندا ەسكىشەحير, انكارا, بولۋ جانە ىستامبۇل قالالارىنىڭ ەڭ ۇلكەن كونتسەرتتىك زالدارىندا تاتتىمبەت اتىنداعى قازاق ۇلت اسپاپتارى اكادەميالىق وركەسترىنىڭ, ق.بايجانوۆ اتىنداعى قاراعاندى كونتسەرتتىك بىرلەستىگىنىڭ, سونىمەن قاتار, كسرو جانە قازاقستاننىڭ حالىق ءارتىسى, اتاقتى ءانشى بيبىگۇل تولەگەنوۆانىڭ كونتسەرتتەرى وتكىزىلۋدە.
قازاقستاننىڭ ونەر يەلەرى تۇركياداعى گاسترولدەرىن تۇركى الەمىنىڭ 2013 جىلعى مادەني استاناسى بولعان ەسكىشەحير قالاسىنان باستادى. ايگىلى ءانشى ب.تولەگەنوۆا مەن تاتتىمبەت اتىنداعى اكادەميالىق وركەستر انادولى ۋنيۆەرسيتەتىنىڭ كونتسەرت زالىندا ءوز رەپەرتۋارىنداعى شىعارمالارىن ورىنداپ, تۇرىك تىڭداۋشىلارىنا جاقسى اسەر سىيلادى.
كونتسەرتتەن كەيىن ەسكىشەحير پروۆينتسياسىنىڭ گۋبەرناتورى ءسوز سويلەپ, تۇركيادا مۇنداي شارانىڭ وتكىزىلۋى مادەنيەت جانە ونەر سالاسىنداعى قازاق-تۇرىك ىنتىماقتاستىعىنا ۇلەس قوساتىنىن اتاپ ءوتتى. «مەن قازاقستاننىڭ ادامزات ءمادەني-گۋمانيتارلىق مۇراسىنا ەداۋىر ۇلەس قوسىپ جاتقانىنا كۋا بولدىم», دەپ ءمالىم ەتتى ول. ءوز سوزىندە قازاقستاننىڭ ءتۇركياداعى ەلشىسى ەسكىشەحير پروۆينتسياسىنىڭ گۋبەرناتورىنا قازاق شىعارماشىلىق توبىنا جىلى ىقىلاس ءبىلدىرگەنى ءۇشىن ريزاشىلىعىن ءبىلدىردى.
«ەگەمەن-اقپارات».