بۇۇ باس حاتشىسى انتونيۋ گۋتەرريش حالىقارالىق كوشى-قون ۇيىمىنىڭ (حكۇ) ىزگى نيەت ەلشىسى ءارى تانىمال ءانشى ديماش قۇدايبەرگەنمەن كەزدەستى, دەپ حابارلايدى Egemen.kz.
«4 شىلدەدە حكۇ ىزگى نيەت ەلشىسى رەتىندە شىۇ ءسامميتى اياسىندا قازاقستانعا ساپارمەن كەلگەن بۇۇ باس حاتشىسى انتونيۋ گۋتەرريش مىرزامەن كەزدەستىم. كوشى-قونداعى ماڭىزدى ماسەلەلەردى تالقىلادىق, بۇل باعىتتاعى جۇمىستاردى قولدايتىنىمدى جەتكىزدىم. باس حاتشى كوشى-قون سالاسىنىڭ ماڭىزدى تۇستارىنا توقتالدى», دەپ جازدى د.قۇدايبەرگەن Instagram جەلىسىندە.
انتونيۋ گۋتتەريش ديماشتىڭ ونەرى بۇكىل الەم بويىنشا ميلليونداعان ادامدى ءتانتى ەتكەنىن ايتا كەتتى.
«مەن ءوز تالانتىمدى الەمدەگى وڭتايلى وزگەرىستەرگە پايدالانا الاتىنىما ريزامىن. سوندىقتان انتونيۋ مىرزامەن تۇسكەن فوتوسۋرەتتى قۋانا كوپشىلىك نازارىنا ۇسىنامىن», دەلىنگەن جازبادا.