تەك تىگىن وندىرىسىمەن اينالىساتىن «Astana يۋتاريا LTD» سەرىكتەستىگى ەلوردا ماڭىنداعى №1 يندۋستريالىق پاركتە ورنالاسقان. اۋماعى 2 گەكتار جەردى الىپ جاتقان كومپانيا كوبىنە-كوپ ارنايى قىزمەت تۇرلەرىنە ارنالعان كيىم تىگەدى. جوبا قۇنى – 2,2 ملرد تەڭگە. كومپانيا ءبىر جىلدا ءار ماماندىققا ارنالعان 200 مىڭ دانا كيىم وندىرۋگە قاۋقارلى.
كاسىپورىن 2015 جىلدىڭ جەلتوقسانىندا «بيزنەستىڭ جول قارتاسى-2020» مەملەكەتتىك باعدارلاماسى نەگىزىندە قۇرىلىپ, يندۋستريالىق پاركتەن جەر تەلىمىن العان. 7 مىڭ شارشى مەتردى الىپ جاتقان اۋماقتا وندىرىستىك, قىزمەتتىك جانە اكىمشىلىك بولىمدەرى ورنالاسقان. ودان بولەك, عيمارات سىرتىندا قىزمەتكەرلەرگە ارنالعان جاتاقحانا, شيكىزات پەن دايىن بۇيىمدارعا ارنالعان قويمالار بار.
«كەڭسەگە ارنالعان كلاسسيكالىق ۇلگىمەن قاتار, وندىرىستەگى باسشىلىق قۇرامنىڭ جانە جۇمىسشىلاردىڭ جۇمىس كيىمىن تىگەمىز. سونداي-اق توتەنشە جاعداي قىزمەتكەرلەرى, اسكەري, كۇزەت, جول پوليتسياسى, قارجىلىق مونيتورينگ اگەنتتىگىنىڭ كەڭسەلىك كيىمى, شاحتەر, مۇناي-گاز بەن تەمىرجول سالاسىنداعى جولسەرىك ازاماتتاردىڭ جانە دانەكەرلەۋشىلەرگە ارنالعان ارنايى توپتامالارىمىز بار. بۇلاردىڭ كەيبىرىندە جازدىق جانە قىستىق ۇلگىدەگى نۇسقاسى قاتار دايىندالادى. سپورتتىق كيىمدەر دە تاپسىرىسپەن تىگىلەدى», دەيدى كومپانياداعى ءوندىرىس ءبولىمىنىڭ باسشىسى مەرۋەرت قامزاحانقىزى.
كومپانيا وكىلدەرىنىڭ ايتۋىنشا, استانا قالاسى بويىنشا كادر تاپشىلىعى بار. سوندىقتان كوپ تىگىن جابدىعىنىڭ وپەراتورلارىن, ياعني تىگىنشىلەردى وزگە وڭىرلەردەن شاقىرادى. 100 ورىندىق جاتاقحانا دا سول ءۇشىن سالىنعان.
«بىزدە 250 ادام جۇمىس ىستەسە, سونىڭ 200-گە جۋىعى – تىگىنشى. بۇل ءبىر اۋىسىمداعى قىزمەتكەرلەر عانا. ەگەر تاپسىرىس ۇلعايىپ جاتسا, ەكى اۋىسىمعا كوشۋگە مۇمكىندىگىمىز جەتكىلىكتى. ول كەزدە تاعى دا مامان ىزدەۋگە تۋرا كەلەدى. ەكىنشىدەن, ءبىز تەندەر ارقىلى جۇمىس ىستەپ كەلەمىز. مىسالى, «قازاقستان تەمىر جولى» كومپانياسىمەن ەكى جىل قاتارىنان بىرلەسە جۇمىس ىستەدىك. ولار ءبىز تىككەن ارنايى كيىمدى تۇتىنادى. بيىل دا وسى كومپانيانىڭ كونكۋرسىنا قاتىسىپ جاتىرمىز. جالپى, ۇلتتىق كومپانيالار جاريالاعان تەندەردىڭ بارلىعىنان شەت قالمايمىز. تالاپتاردا كورسەتىلگەندەي, ءوز كيىم ۇلگىلەرىمىزدى كورسەتىپ, كوممەرتسيالىق ۇسىنىستارىمىزدى قوسا جولدايمىز. ولار كونكۋرس وتەتىن كۇندى بەلگىلەگەن سوڭ تاۋەلسىز ساراپشىلار ونىمدەرىمىزدى ءجىتى قاراي وتىرىپ, باعالايدى. باعاعا قاتىستى ەگجەي-تەگجەي جۇمىستار دا قاتار جۇرەدى. وسىلايشا, بارلىق تالاپ-تىلەككە ساي ءبىز تىككەن ءونىم ۇلگىسى جەڭىسكە جەتسە, تاپسىرىستى ورىنداۋشى رەتىندە ارنايى كيىمدى توپتاپ دايىنداۋعا كوشەمىز. كەيدە وتە تومەن باعا ۇسىنعان وزگە كاسىپورىندار كونكۋرستان جەڭىپ كەتەدى. ال ءبىز ءونىمنىڭ تىگىلۋى, ماتا ساپاسىنا سەنىمدى بولعان سوڭ كونكۋرستاعى باعامەن كەلىسپەي قالىپ جاتامىز», دەيدى كاسىپورىننىڭ تەحنولوگيا جانە ازىرلەمە جونىندەگى ديرەكتورى گۇلنار يگەمباەۆا.
ايتۋىنشا, كەيبىر شيكىزات, ياعني ماتا تۇرلەرى كورشىلەس رەسەيدەن كەلەدى. ال كەيبىر تاپسىرىس بەرۋشى قۇزىرلى ورىندار ماتاعا قاتىستى ءوز ۇسىنىسىن ايتىپ, سول بويىنشا ارنايى كيىم تىگىلەدى.
«ورتاشا ايلىق 250 مىڭ تەڭگەدەن اسادى. بۇل جەردە ەسكەرەتىن جايت بار. ول كاسىبي تىگىنشىلەردىڭ ەڭبەك ءوتىلى مەن ساناتىنا بايلانىستى. سوعان وراي كولەمى دە ارتىپ وتىرادى. جۇمىس جوسپارىن ۋاقتىلى ورىنداۋ دا جالاقىعا اسەر ەتەدى. كومپانيا باسشىلىعى ءار توقسان سايىن قىزمەتكەرلەردى ىنتالاندىرۋ ءۇشىن سىياقى بەرىپ تۇرادى. 100 ورىندىق جاتاقحانا بارىن ايتتىق. قالا ىشىنەن اۆتوبۋستار بەلگىلەنگەن. سونىمەن قاتار قىزمەتكەرلەرگە كەشەندى تۇسكى اس جانە تۇستەن كەيىنگى كىشى اس تەگىن بەرىلەدى», دەيدى گ.يگەمباەۆا.
كاسىپورىننىڭ باستى ماقساتى – وتاندىق ءونىم ۇلەسىن ارتتىرۋ. سونداي-اق باسشىلىق ەل ىشىنەن شىعاتىن ونىمگە تاپسىرىس بەرۋ مۇمكىندىگىنە مەملەكەت قولداۋ كورسەتسە دەگەن تىلەگىن دە جەتكىزدى.