پاۆلودار وبلىسىندا جۇمىس ساپارىمەن جۇرگەن ءماجىلىس دەپۋتاتى, قازاقستان حالىق پارتياسى فراكتسياسىنىڭ جەتەكشىسى ماگەررام ماگەرراموۆ ەلدەگى جالعىز «ەللينگ پۆ» جشس كەمە جوندەۋ زاۋىتىندا بولىپ, «قازفلوت» جەكە كاسىپكەرلىگى باسشىلىعىمەن كەزدەستى.
كاسىپكەرلەر دەپۋتاتقا ىشكى سۋ تاسىمالى سالاسىنداعى وزەكتى ماسەلەلەر تۋرالى ايتىپ بەردى. «قازفلوت» جەكە كاسىپكەرلىگىنىڭ باسشىسى ۆيكتور پودنەبەسوۆتىڭ ايتۋىنشا, كاسىپورنىنىڭ قاراماعىندا 9 كەمە بار. ولاردىڭ جارتىسى جوندەلدى, ال قالعانى كۇردەلى جوندەۋدى قاجەت ەتەدى. بىرقاتار لوگيستيكالىق ماسەلە دە شەشىمىن تاۋىپ كەلەدى.
– وتكەن جىلى يندۋستريا جانە ينفراقۇرىلىمدىق دامۋ مينيسترلىگى ەلىمىزدىڭ ءۇش سۋ باسسەينى – اتىراۋ, ارال جانە ەرتىس وزەندەرىنىڭ كولىگى مەن ينفراقۇرىلىمىن قالپىنا كەلتىرۋگە 64 ملرد تەڭگە بولىنەتىنىن مالىمدەنگەن بولاتىن. ونىڭ 27 ميلليارد تەڭگەسىن كولىك مينيسترلىگى بيىل سۋ كولىگى مەن ينفراقۇرىلىمدى دامىتۋ جانە كۇتىپ ۇستاۋ باعىتىندا يگەرۋگە ءتيىس, – دەدى م.ماگەرراموۆ.
ءماجىلىس دەپۋتاتى ىشكى سۋ تاسىمالىنىڭ دامۋى مەن قاۋىپسىزدىگىنىڭ ەكى قۇرامداس بولىگىن – جاعالاۋداعى كولىك ينفراقۇرىلىمى مەن ساپالى جوندەۋ بازاسىن قامتاماسىز ەتۋ قاجەتتىگىن اتاپ ءوتتى. مۇنىڭ بارلىعى مەملەكەت باسشىسىنىڭ 2023 جىلعى جولداۋىندا ايتىلعان تاپسىرمالاردى تابىستى ىسكە اسىرۋعا ىقپال ەتەدى.
«ەللينگ پۆ» سەرىكتەستىگى – قازاقستانداعى جالعىز كەمە جوندەۋ كاسىپورنى. ونى قازاقستان حالىق پارتياسى فراكتسياسىنىڭ دەپۋتاتتارى ۇكىمەتكە ءتيىستى دەپۋتاتتىق ساۋال جولداۋ ارقىلى ساقتاپ قالدى دەۋگە بولادى.