مەملەكەت باسشىسى قاسىم-جومارت توقاەۆ ازەربايجان پرەزيدەنتى يلحام اليەۆپەن كەزدەسۋ وتكىزدى. قازاقستان پرەزيدەنتى شىۇ سامميتىنە قۇرمەتتى قوناق رەتىندە قاتىسقانى ءۇشىن يلحام اليەۆكە العىس ايتتى, دەپ حابارلايدى Egemen.kz اقوردا ءباسپاسوز قىزمەتىنە سىلتەمە جاساپ.
ەكى ەل باسشىلارى ينۆەستيتسيا, ونەركاسىپ, ەنەرگەتيكا, كولىك جانە لوگيستيكا سالالارىنداعى بىرلەسكەن جوبالاردىڭ جۇزەگە اسىرىلۋ بارىسىن تالقىلادى. وسى ورايدا ترانسكاسپي حالىقارالىق كولىك باعدارىن ءتيىمدى پايدالانۋ ماسەلەسىنە ايرىقشا نازار اۋدارىلدى.
يلحام اليەۆ ءداستۇرلى تۇردە قۇرمەت كورسەتكەنى ءۇشىن قاسىم-جومارت توقاەۆقا العىس ايتىپ, مەملەكەتارالىق بايلانىستاردىڭ بارلىق باعىتى بويىنشا استانامەن ەكىجاقتى ىنتىماقتاستىقتى ودان ءارى نىعايتۋعا باكۋدىڭ بەيىلدى ەكەنىن راستادى.
يلحام اليەۆ ازەربايجان مەن ارمەنيا اراسىنداعى كەلىسسوزدەر ۇدەرىسىنە اتسالىسقانى ءۇشىن قاسىم-جومارت توقاەۆقا العىس ايتتى. سونداي-اق قازاقستاننىڭ الەمدىك قوعامداستىقتىڭ لايىقتى مۇشەسى رەتىندە ايماقتا عانا ەمەس, حالىقارالىق ارەنادا دا ماڭىزدى ءرول اتقاراتىنىن اتاپ ءوتتى.
اڭگىمەلەسۋ بارىسىندا ساۋدا-ەكونوميكالىق جانە مادەني-گۋمانيتارلىق ىنتىماقتاستىقتى ودان ءارى تەرەڭدەتۋ پەرسپەكتيۆالارى قاراستىرىلدى. سونىمەن قاتار حالىقارالىق ۇيىمدار اياسىنداعى ىقپالداستىقتى ودان ءارى دامىتۋ ماسەلەلەرى جونىندە پىكىر الماستى.
كەزدەسۋ سوڭىندا ەكى ەل باسشىلارىنىڭ قاتىسۋىمەن «سامۇرىق-قازىنا» اق مەن Azerbaijan Investment Holding اراسىنداعى بىرلەسكەن ينۆەستيتسيالىق قوردى باسقارۋ تۋرالى كەلىسىمگە قول قويىلدى.