نازارباەۆ ۋنيۆەرسيتەتىنىڭ گرانتتارى شەتەلدىك بالالارعا دا بەرىلدى
الماتىدا ءحى حالىقارالىق جاۋتىكوۆ وليمپياداسى مارەسىنە جەتتى. وقۋشىلار اراسىندا ماتەماتيكا, فيزيكا جانە ينفورماتيكا پاندەرى بويىنشا وتكەن وليمپياداعا قازاقستان, رەسەي, ۋكراينا, بەلورۋسسيا, ازەربايجان, ارمەنيا, گرۋزيا, قىرعىزستان, تاجىكستان, تۇرىكمەنستان, وزبەكستان, بولگاريا, رۋمىنيا, سەربيا جانە موڭعوليا سياقتى الەمنىڭ 15 ەلىنەن 58 كوماندا قاتىسقانىن حابارلاعان ەدىك. ەندى, مىنە, ون جىلدان بەرى ۇزدىكسىز وتكىزىلىپ جۇرگەن جاۋتىكوۆ وليمپياداسىندا بيىل ءبىرىنشى رەت و.جاۋتىكوۆ اتىنداعى رەسپۋبليكالىق مامانداندىرىلعان دارىندى بالالارعا ارنالعان فيزيكا-ماتەماتيكا ورتا مەكتەپ-ينتەرناتى باس جۇلدەنى جەڭىپ الدى.
جەڭىمپازداردى ماراپاتتاۋ ساتىندە «دارىن» رەسپۋبليكالىق عىلىمي-پراكتيكالىق ورتالىعىنىڭ ديرەكتورى شولپان قيراباەۆا:
– سىزدەردىڭ قاي قيىردان كەلگەندەرىڭىزگە قاراماستان, وليمپياداعا تمد مەملەكەتتەرى تۇگەل قاتىسىپ وتىر, الىس جانە جاقىن مەملەكەتتەردەن كەلگەن وقۋشىلار بار, بارشاڭىزدى ماتەماتيكا, فيزيكا جانە ينفورماتيكا پاندەرىنە دەگەن سۇيىسپەنشىلىك بىرىكتىرەدى. قازاقستان رەسپۋبليكاسىنىڭ ءبىلىم جانە عىلىم مينيسترلىگى سىزدەردى دامىتىپ, الەمدەگى ەڭ بەدەلدى جوعارى وقۋ ورىندارىندا ءبىلىم الۋلارىڭىزعا ىقپال جاسايدى, – دەدى.
سونىمەن, ەڭ ۇزدىك مامانداندىرىلعان مەكتەپتەر اراسىنداعى وليمپيادانىڭ جۇلدەلى ورىندارىنا 7 كوماندا لايىق دەپ تانىلدى.
كۇردەلى ءبىلىم جارىسىندا جەتى مارتە باس جۇلدەنى جەڭىپ العان ماسكەۋ مەملەكەتتىك ۋنيۆەرستەتى جانىنداعى مامانداندىرىلعان وقۋ-عىلىمي ورتالىعىنىڭ (سۋنتس) كومانداسىن ءبىر ساتىعا ارتقا تاستاپ, كوماندالىق ەسەپتە باس جۇلدەنى ءبىرىنشى رەت رمفمومي-دىڭ كومانداسى جەڭىپ الدى. ەندىگى جەردە ەسەپكە جۇيرىك وقۋشىلار اراسىنداعى ءبىرىنشى ورىندى ممۋ سۋنتس (رەسەي), ەكىنشى ورىندى ەرەۆان مەملەكەتتىك ۋنيۆەرسيتەتىنىڭ فيزيكا-ماتەماتيكا مەكتەبى (ارمەنيا) مەن سوفيا ماتەماتيكا مەكتەبىنىڭ (بولگاريا) كوماندالارى ءوزارا ءبولىستى, ءۇشىنشى ورىندى چەليابىنىڭ №31 ليتسەيى (رەسەي) مەن №199 «كوماروۆ» مەكتەبى (گرۋزيا) جانە بەلارۋس مەملەكەتتىك ۋنيۆەرسيتەتىنىڭ ليتسەيى ( مينسك قالاسى) كوماندالارى يەلەندى.
جەڭىمپاز كوماندالاردىڭ ءاربىر قاتىسۋشىسى باعالى سىيلىقتارمەن ماراپاتتالدى. گران-پري جەڭىپ العان كوماندا قاتىسۋشىلارى ۋلترابۋكقا يە بولدى. 6 كوماندا ماقتاۋ قاعازدارىمەن ماراپاتتالدى.
وليمپيادانىڭ التىن مەدالىنە 31 وقۋشى يە بولدى (قازاقستان – 4, ونىڭ 3-ءۋىن رمفمومي وقۋشىلارى – احان يسمايلوۆ, ولجاس قادىراقۇنوۆ, داۋلەت قۇرمانتاەۆ جەڭىپ الدى). ال 60 وقۋشى كۇمىس مەدال يەگەرى اتاندى (قازاقستان – 19 مەدال, ونىڭ 6-ۋى رمفمومي وقۋشىلارى. قولا مەدال يەگەرلەرىنىڭ سانى – 87 بولسا, ونىڭ 50-ءى قازاقستاندا قالدى).
بارلىعى 176 مەدالدىڭ 50-ءىن قازاقستان وقۋشىلارى جەڭىپ السا, ونىڭ 20-سى رمفمومي-عا تيەسىلى. وليمپيادانىڭ جوعارى دەڭگەيدە وتكەنىنىڭ كۋاگەرى بولدىق, بارلىق قازاقستاندىق 50 بالاعا, ياعني جەڭىمپازدار مەن جۇلدەگەرلەرگە نازارباەۆ ۋنيۆەرسيتەتتىڭ ءبىلىم گرانتتارى جانە وسىنداي گرانت شەتەلدەن كەلگەن وليمپيادا جەڭىمپازدارىنا دا بەرىلدى. قبتۋ-دىڭ گرانتتارى تابىستالدى. ازەربايجان ۋنيۆەرسيتەتى (باكۋ قالاسى) بارلىق جەڭىمپازدار مەن جۇلدەگەرلەرگە ءبىرىنشى رەت ءبىلىم گرانتتارىن ۇسىندى.
ايناش ەسالي,
«ەگەمەن قازاقستان».
الماتى.