پرەمەر-مينيستر ولجاس بەكتەنوۆ قىتاي حالىق رەسپۋبليكاسى توراعاسىنىڭ مەملەكەتتىك ساپارى اياسىندا قازاقستانعا كەلگەن China National Petroleum Corporation (CNPC) ديرەكتورلار كەڭەسىنىڭ توراعاسى داي حوۋليانمەن كەزدەسۋ وتكىزدى.
ەنەرگەتيكا سالاسىنداعى ينۆەستيتسيالىق ىنتىماقتاستىقتى تەرەڭدەتۋ ماسەلەلەرى قارالدى. شىمكەنت مۇناي وڭدەۋ زاۋىتىنىڭ وندىرىستىك قۋاتىن ارتتىرۋ جونىندەگى بىرلەسكەن جوباعا ەرەكشە نازار اۋدارىلدى. كەزدەسۋگە قاتىسۋشىلار جوبانىڭ اعىمداعى كەزەڭىن تالقىلاپ, نىساندى ۋاقتىلى پايدالانۋعا بەرۋ ءۇشىن جاڭعىرتۋ قارقىنىن جەدەلدەتۋ نيەتىن راستادى.
شىمكەنت ءموز-ءىن كەڭەيتۋدى ەسكەرە وتىرىپ, زاۋىتتى شيكىزاتتىڭ جەتكىلىكتى كولەمىمەن قامتاماسىز ەتۋ جانە كەڭقياق – اتىراۋ, كەڭقياق – قۇمكول مۇناي قۇبىرلارىن كەڭەيتۋ شارالارى قارالدى. قازىرگى ۋاقىتتا قازاقستاندىق جانە قىتايلىق ساراپشىلار قاجەتتى ەسەپتەر جۇرگىزدى.
كەزدەسۋ بارىسىندا ولجاس بەكتەنوۆ پەن داي حوۋليان «بەينەۋ – بوزوي – شىمكەنت» گاز قۇبىرىنىڭ ءبىرىنشى جەلىسىن سالۋ جانە ىسكە قوسۋعا تابىستى جۇزەگە اسىرىلعان بىرلەسكەن جوبانى مىسالعا الا وتىرىپ, گاز سالاسىنداعى ىنتىماقتاستىقتى ودان ءارى ارتتىرۋ پەرسپەكتيۆالارىنا توقتالدى.
ۇكىمەت باسشىسى بىرلەسكەن كاسىپورىندار تابىستى ءارى ەكونوميكالىق جاعىنان ءتيىمدى ەكەنىن ايتتى. سونىمەن قاتار پرەمەر-مينيستر جەرگىلىكتى تاۋار وندىرۋشىلەرمەن جانە قىزمەت كورسەتۋشىلەرمەن تىعىز ءوزارا ءىس-قيمىل جاساۋ ارقىلى جەرگىلىكتى قامتۋ ۇلەسىن كەزەڭ-كەزەڭىمەن ۇلعايتۋدىڭ ماڭىزدىلىعىن اتاپ ءوتتى.
«قازاقستان دا باسقا ەلدەر سەكىلدى, ەلدىڭ ەنەرگەتيكالىق قاۋىپسىزدىگىن قامتاماسىز ەتۋدە ستراتەگيالىق مىندەت قويىپ وتىر. ەڭ الدىمەن, بۇل – مۇناي وڭدەۋ قۋاتتارىن قۇرۋ جانە جاڭعىرتۋ. ءبىز شىمكەنت مۇناي وڭدەۋ زاۋىتىنىڭ وندىرىستىك قۋاتىن ارتتىرۋعا ەرەكشە كوڭىل بولەمىز. ءبىزدىڭ بارلىق جوبالارىمىزدى ىسكە اسىرۋداعى باسىمدىقتاردىڭ ءبىرى – جەرگىلىكتى قامتۋ ماسەلەلەرى. ەگەر ەلىمىزدە قاجەتتى تاۋارلار نەمەسە جابدىقتار وندىرىلمەسە, وندا ولاردى جاقىن ارادا قازاقستان اۋماعىندا لوكاليزاتسيالاۋ ماسەلەسىن بىرلەسىپ پىسىقتاۋدى ۇسىنامىز», دەدى و.بەكتەنوۆ, ۇكىمەتتىڭ بىرلەسكەن جوسپارلاردى ىسكە اسىرۋدا اشىق ءارى سىندارلى ديالوگكە دايىن ەكەندىگىن راستاي وتىرىپ.
ايتا كەتەيىك, قىتاي ۇلتتىق مۇناي-گاز كورپوراتسياسى (CNPC) الەمدەگى ەڭ ءىرى توپ-3 مۇناي كومپانياسىنىڭ قاتارىنا كىرەدى. قازاقستاننىڭ مۇناي-گاز ونەركاسىبىنە 45 ملرد دوللاردان استام قاراجات سالىنعان. ەل بويىنشا CNPC كاسىپورىندارىندا 30 مىڭنان استام ادام ەڭبەك ەتەدى, ولاردىڭ 98,3%-ى – ەل ازاماتتارى.