اۋىل كاسىبىن سەرپىلتەتىن باستاما

«اۋىل اماناتى» – اۋىل حال­قىنىڭ ءال-اۋقاتىن جاقسارتۋعا جانە الەۋمەتتىك ماسەلەلەرىن شە­شۋگە باعىتتالعان بىرە­گەي جو­با. جىلدىق 2,5 پايىزبەن جەڭىل­دەتىل­گەن نەسيە ازاماتتارعا يدەيا­لارىن جۇزەگە اسىرۋعا, ءوز ءىسىن اشۋعا جانە جۇمىسسىزدىقتى ازاي­­­تۋعا مۇمكىندىك بەرەدى. وسى ماق­­­ساتتا وتكەن جىلى رەسپۋب­لي­­­كا­­لىق بيۋدجەتتەن وڭىرگە 3 ملرد تەڭگە ءبولىنىپ, 406 جوبا نەسيە­لەندىرىلگەن.

اقسۋات اۋىلدىق وكرۋگىنىڭ تۇرعىنى الما ىسمايلوۆا وسى جوبا اياسىندا نەسيە الىپ, قازىر جىلىجاي شارۋاشىلىعىن دامىتىپ كەلەدى.

– اتا-بابامىز ەگىنشىلىكپەن اينالىسقان. ۇمىت بولىپ قالعان ءداستۇر­دى وسى «اۋىل اماناتى» جوباسى اياسىندا نەسيە الىپ, جۇزەگە اسىرىپ وتىرمىز. جوبا كاسىپ اشامىن دەگەن ادامعا ۇلكەن كومەك. قازىر جى­لى­جاي كاسىبىنىڭ قىر-سىرىن تولىق يگەرىپ الدىق. الداعى ۋاقىت­تا قيار ءونىمىن ءوسىرىپ قانا قوي­ماي, ونى ءارى قاراي تەرەڭ وڭدەۋ, كونسەرۆىلەۋ, مارينادتاۋ جۇمىس­تارىن دا قولعا الساق, – دەيدى الما ىسمايلوۆا.

الما ىسمايلوۆا جوبا اياسىندا 7 ملن تەڭگە قارجى العان. بۇل قارجىعا جىلىجاي قۇرال­دارىن ساتىپ الىپ, قيار وسىرۋ­مەن اي­نالىسىپ كەلەدى. جىلىنا 3 تون­­نا قيار ءوندىرىپ وتىرعان شا­رۋاشىلىق يەسى الدا­عى ۋا­قىت­تا جىلى­جاي كولەمىن ۇلعايتۋ­دى دا جوسپارلاپ وتىر.

مۇرات ابەنوۆ كاسىپكەر سار­سەن­كۇل ارالباەۆانىڭ ش ۇلىق تسەحىندا دا بولدى. جەكە كاسىپكەر «اۋىل اماناتى» جوباسى اياسىندا وتكەن جىلى 5 ملن تەڭگە نەسيە الىپ, ش ۇلىق ونىمدەرىن شىعاراتىن قۇرال-جابدىقتار ساتىپ العان. قازىر ءۇيىنىڭ الدىنان شاعىن تسەح جۇمىس ىستەپ تۇر.

– جوبانىڭ مۇمكىندىگى جوعا­رى. 2,5 پايىزبەن الاسىڭ ءارى تولەم كانيكۋلى دا قاراستى­رىلعان. بۇگىنگى كۇنى 1 ازاماتتى جۇمىسپەن قامتىپ وتىرمىن. كۇنىنە 200, 300 كەيدە 400 شۇ­لىق شىعارامىز. الايدا باعدار­لامادا ءونىمدى ساتۋ ماسە­لەسى دە قاراستىرىلسا دەيمىز. ياعني الەۋمەتتىك دۇكەندەردە ساتۋعا رۇقسات بەرىلسە, – دەيدى كاسىپكەرلەر.

ءماجىلىس دەپۋتاتى مۇرات ابەنوۆ كاسىپكەردىڭ ءوتىنىشى بو­يىنشا بۇل ماسەلە الداعى ۋاقىتتا ەسكەرىلەتىنىن اتاپ ءوتتى.

– جالپى ەلدى ارالاپ جۇر­گەندە جوباعا قىزىعۋشىلار وتە كوپ. بۇل حالىقتى ەڭبەك ەتۋگە, تابىس تابۋعا ىنتالاندىرىپ وتىر. سوندىقتان جوبانى ناسيحاتتاۋدى كۇشەيتۋ كەرەك. وسىنداي جوبالار تۋرالى كەڭ اقپارات الۋ ءۇشىن ارنايى پلاتفورما ازىرلەۋ قاجەت. ەكىنشىدەن, كاسىپكەرلەر جوبادا وندىرگەن ءونىمدى ساتۋ ماسەلەسى قاراستىرىلسا, الەۋمەتتىك دۇكەن­دەردە ساتۋعا رۇقسات بەرىلسە دەيدى. راسىمەن دە الەۋمەتتىك دۇكەندەردە «اۋىل اماناتى» جوباسى اياسىندا وندىرىلگەن» دەگەن سورە نەگە بولماسقا. الداعى ۋاقىتتا وسى ماسەلەلەر بويىنشا جاۋاپتى ورگاندارمەن جۇمىس ىستەيمىز, – دەدى ءماجىلىس دەپۋتاتى.

حالىق قالاۋلىسى سونداي-اق جوبا اياسىندا ىسكە قوسىلعان كورپە تىگۋ تسەحىنىڭ جۇمىسىمەن دە تانىستى.