قازالى اۋدانىنىڭ ورتالىعى ايتەكە بي كەنتىندە بيىل كوكتەمدە «جانكەنت اگرو» كۇرىش وڭدەۋ زاۋىتى ىسكە قوسىلدى. قۇنى جارتى ملرد تەڭگەدەن اساتىن جوبانىڭ 155,2 ملن تەڭگەسى «اگرارلىق نەسيە كورپوراتسياسى» اق تاراپىنان بولىنسە, قالعانىنا سەرىكتەستىك ءوز قاراجاتىن جۇمساپتى. قازىر مۇندا 10 ادام تۇراقتى جۇمىسپەن قامتىلىپ, زاۋىت جىلىنا 5 مىڭ توننا كۇرىش وڭدەيدى. سەرىكتەستىك ديرەكتورى ءانۋار ابىحانوۆتىڭ ايتۋىنشا, ءونىم وزىمىزدەن بولەك رەسەي, ۋكراينا, وزبەكستان ەلدەرىنە ەكسپورتتالىپ جاتىر.
اۋداندا كاسىپكەر, كوپبالالى انا ۆەنەرا تايلاقباەۆا قۇرعان «ازيا قامىس» اتتى مەكەمە دە بار. سەرىكتەستىك قامىستان ەكولوگيالىق قۇرىلىس ماتەريالدارىن دايىنداۋعا ارنالعان شيكىزات وڭدەپ, شۆەتسيا, فينليانديا, نورۆەگيا, گەرمانيا, نيدەرلاند مەملەكەتتەرىنە جونەلتىپ وتىر. كاسىپورىندا تۇراقتى – 10, قامىس القاپتارىندا 100-گە جۋىق ادام جۇمىسپەن قامتىلعان.
قازالىداعى «سەلحوزەنەرگو» جشس-دا تابىستى كاسىپورىندار ساناتىندا. ۇزاق ۋاقىتتان بەرى ەلەكترومونتاج جۇمىسىمەن اينالىسىپ كەلە جاتقان ءوندىرىس ورنى بۇگىندە ۆيبروپرەسس قۇرىلعىسى ارقىلى جاياۋ جۇرگىنشىلەر جولىنا ارنالعان بورديۋرلار شىعارىپ وتىر. سەرىكتەستىك ديرەكتورى بەيبىت قازىعۇلوۆ ونىمدەرى اۋدانداعى جول قۇرىلىسى جۇمىستارىندا كەڭىنەن پايدالانىلىپ وتىرعانىن ايتادى.
قىزىلوردا وبلىسى,قازالى اۋدانى