گەرمانياداعى فۋتبول دوداسىندا شيرەك فينالعا شىققان ءتورت قۇراما انىقتالدى. ەۋروپا چەمپيوناتىنىڭ كورىگىن قىزدىرعان تارتىستى باسەكەدە گەرمانيا, شۆەيتساريا, انگليا, يسپانيا فۋتبولشىلارىنىڭ مەرەيى ۇستەم بولدى.
2021 جىلى وتكەن ەۋروپا 2021 جىلى وتكەن ەۋروپا چەمپيوناتىنىڭ فينالىندا انگليا قۇراماسىنان باسىم ءتۇسىپ, قۇرلىق چەمپيونى اتانعان يتاليا فۋتبولشىلارى شيرەك فينالعا جەتە المادى. شۆەيتساريا قۇراماسى رەمو فرويلەردىڭ 37-مينۋتتا, رۋبەن ۆارگاستىڭ 46-مينۋتتا سوققان گولىنىڭ ناتيجەسىندە ايگىلى قۇرامانى ىعىستىردى. رەيمونىڭ سوققان گولىن شۆەيتساريا ۇلتتىق قۇراماسىنىڭ باس باپكەرى مۇرات ياكين جوعارى باعالادى. ورتالىق جارتىلاي قورعاۋشى قىزمەتىنە قوسا شابۋىل شەبىنە دە وراسان ۇلەسىن قوسقانىنا رازىلىعىن ايتتى.
ماتچتان كەيىن تەبىرەنىسىن جايىپ سالعان رۋبەن ۆارگاس الاڭعا نەگىزگى قۇرامدا شىعاتىنىن ەستىگەندە ەرەكشە قۋانعانىن جەتكىزدى. ء«بىز توپتىق كەزەڭدە-اق ەۋروپا قۇرلىعىنىڭ تەگەۋرىندى قۇراماسىنىڭ قاي-قايسىسىنا دا توتەپ بەرە الاتىنىمىزدى كورسەتتىك. 1-تايمنىڭ سوڭىن الا گرانيت دجاكا ماعان تاعى ءبىر گول سوعۋ كەرەك ەكەنىن ايتتى. 2-تايمدا ونىڭ تاپسىرماسىن ورىندادىم», دەدى ۆارگاس. جارتىلاي قورعاۋشى فابيان ريدەر شۆەيتساريا قۇراماسىنداعى ۇجىمدىق رۋحتىڭ كۇش العانىن ماقتانىشپەن اتاپ ءوتتى. «ماتچ كەزىندە ءبىر ويىنشى جاڭىلىسسا, قالعانىمىز ونىڭ قاتەلىگىن جابىلا تۇزەپ, ءبارىمىز ءبىرىمىز ءۇشىن بارىمىزدى سالاتىن قۇراما ەكەنىمىزدى دالەلدەدىك», دەدى ف.ريدەر.
گەرمانيا قۇراماسى كاي حاۆەرتستىڭ 53-مينۋتتا پەنالتيدەن سوققان گولىن 68-مينۋتتا جامال مۋسيالا ەسەلەگەننىڭ ناتيجەسىندە دانيا فۋتبولشىلارىن قۇرلىق الامانىنان ىعىستىردى.
8/1 فينالدىق كەزەڭدە انگليا قۇراماسى سلوۆاكيا فۋتبولشىلارىن تاجىريبەنىڭ مولدىعىمەن ەڭسەردى. ايتپەسە يۆان شرانتستىڭ 26-مينۋتتا سوققان گولىنىڭ ناتيجەسىندە 90 مينۋت بويى سلوۆاكيا قۇراماسى باسىم تۇردى. تورەشى قوسقان قوسىمشا 5 مينۋتتىڭ ىشىندە جەردىڭ استىن ۇستىنە شىعارعانداي وزگەرىس جاساعان دجۋد بەللينگەم تارازى باسىن تەڭەستىرىپ بەردى. ەكسترا تايمدا دىڭكەلەگەن قارسىلاستارىنىڭ وسال تۇسىن وڭاي تاۋىپ, حارري كەين (91-مينۋتتا) جەڭىس گولىن سوعىپ, انگليا قۇراماسىن شيرەك فينالعا جەتكىزدى. 2016 جىلى ەۋروپا چەمپيوناتىنىڭ پلەي-وفف كەزەڭىندە گەرمانيا قۇراماسىنا 3:0 ەسەبىمەن جول بەرگەن سلوۆاكيا قۇراماسى ارادا وتكەن سەگىز جىلدىڭ ىشىندە تەپكىسى مىقتى, ەكپىنى كۇشتى قۇراماعا اينالعانىن ايگىلەپ, اعىلشىن فۋتبولشىلارىن شارشاتتى. ەگەر قوسىمشا ۇستەلگەن 5 مينۋتتىڭ ىشىندە قورعانىستى سەتىنەتپەي, 0:1 باسىمدىعىن اقىرىنا دەيىن ۇستاپ تۇرعاندا كەشەلى بەرى براتيسلاۆادا باقىتتان باسى اينالعان حالىق كوشەدە تەڭسەلەر ەدى. سەبەبى بۇعان دەيىن بۇل قۇراما ەۋروپا چەمپيوناتىنىڭ شيرەك فينالىنا جەتكەن ەمەس. ىرىكتەۋ كەزەڭدەرىنىڭ وزىندە الا-قۇلا ناتيجەمەن سۇرەڭسىز ويناپ, تەك 2016 جىلدان بەرى قۇرلىق دوداسىنىڭ فينالدىق كەزەڭىنە قوسىلىپ ءجۇر. يتاليالىق مامان فرانچەسكو كالتسونا قولدا تۇرعان جەڭىستىڭ سۋسىپ كەتكەنى جانىنا باتقانىن جاسىرمادى. «وسىنداي قۇرامانى باپتايتىنىمدى ماقتانىش سانايمىن. ءبىز الەمنىڭ تەگەۋرىندى ۇجىمىنان 90 مينۋت بويى باسىم بولدىق. بىراق ايىلىمىزدى تىم ەرتە بوساتقان ەكەنبىز, تاجىريبەلى دجۋد بەللينگەم ۇرىمتال تۇستا گول سوقتى. ەكسترا تايمدا جىگىتتەردىڭ شارشاعانى ايقىن بايقالدى. بۇعان دەيىن ەۋروپا چەمپيوناتىنىڭ فينالدىق كەزەڭىندە ەكسترا تايمعا دەيىن جەتىپ, كۇشىمىزدى سىناپ كورمەگەنىمىز بايقالدى. دەسە دە بۇل جەڭىلىس ءبىزدىڭ جىگىتتەردىڭ كەلەشەكتە شاربولاتتاي شىڭدالا تۇسۋىنە وراسان تاجىريبە مەكتەبى بولدى», دەدى فرانچەسكو كالتسونا.
گەرمانيا ەلى ۇيىمداستىرعان ەۋروپا چەمپيوناتىنىڭ پلەي-وفف كەزەڭىنە ءوتىپ, دۇنيەنىڭ ديدارىن وزىنە قاراتقان گرۋزيا قۇراماسى ماڭدايى تاسقا سوعىلعانداي كۇيگە ءتۇستى. مەكتەپ وقۋشىسى لامين يامال (16 جاستا) سىندى نوياندارى بار يسپانيا قۇراماسى قارسىلاستى 4:1 ەسەبىمەن كۇيرەتە جەڭدى. 18-مينۋتتا روبەن لە نورمان ءوز قاقپاسىنا اۆتوگول سوققاندا باسىمدىققا يە بولعان گرۋزين فۋتبولشىلارىنىڭ ەكىنشى تىنىسى اشىلىپ سالا بەرگەن. ءتىپتى 1-تايمدا ازۋلى يسپانيا قۇراماسىنىڭ شابۋىلىن مەيلىنشە تويتارىپ تاستاپ وتىردى. بىراق جاستىق ماكسيماليزم باسىم, فيزيكالىق كۇش-قۋاتى قايناپ تۇرعان جاستار قۇرلىق الامانىنا العاش قوسىلعان گرۋزيانىڭ قورعانىسىن تاس-تالقان ەتتى. 39-مينۋتتا رودري, فابيان رۋيس 51-مينۋتتا, نيكو ۋيليامس 75-مينۋتتا, داني ولمو 83-مينۋتتا ەنشىسىنە گول جازدى. گرۋزيا قۇراماسىنىڭ جانكۇيەرلەرى كەلندەگى «رەين ەنەرگي» ستاديونىنان فۋتبولشىلارىن قول سوعىپ قۇرمەتتەپ, شىعارىپ سالدى. شابۋىلشىلار حۆيچا كۆاراتسحەليا, جورج ميكاۋتادزە, قاقپاشى گەورگي مامارداشۆيليگە ساۋىن ايتىپ سپورتتىق اگەنتتەر اعىلاتىنى ءسوزسىز. ۇشەۋى دە ەۋروپا چەمپيوناتىندا جاي وتىنداي جارقىلدادى.