ادامدا ەكى ءومىر بولا ما؟ كىمدە قالاي, بىلمەدىم. مەنىڭ تاعدىر جولىم ەكى كەزەڭنەن قۇرالعان. جول اپاتىنا دەيىنگى جانە كەيىنگى. انام مەنى ون ەكى مۇشەمدى ساۋ قىلىپ ومىرگە اكەلدى. ءتىپتى, بالپاناقتاي بولعانىم سونشالىقتى, كوتەرىپ جۇرۋگە قينالعان ەكەن. بوزبالا شاعىمدا ابايسىزدا كولىكتىڭ استىنا ءتۇسىپ, بەل ومىرتقامنان زاقىم الدىم. جازىم عوي. قازىر قولاربادا وتىرامىن.
بۇل جاعدايعا بىردەن ۇيرەنىپ كەتتىم دەي المايمىن. اياقتا جان جوق. ەشتەڭەنى سەزبەيدى. بىراق, كەۋدەمدە قايناپ جاتقان ەرىك-جىگەرىم, جاستىق جالىنىم كۇيدىرىپ بارادى. ءبىر عالامات كۇش پايدا بولىپ, اياعىما جان بىتىرسە, توقتاماي جۇگىرۋگە ءازىردەيمىن. اياعىم ىرقىما كونسە, گيمالايدىڭ شىڭىن باعىندىرارداي پارمەنىم بار سەكىلدى.
وسىلاي ارمانداپ, ءتورت قابىرعاعا تالاي مۇڭ شاقتىم. بىراق, ۋاقىت بارىنە ەمشى ەكەن. كۇندەردىڭ كۇنىندە ءوز-ءوزىمدى ءابدەن قايرادىم. اياعىم بولماسا دا باسىم امان عوي. ميىمدى ەشكىم ۇرلاعان جوق. بويىمداعى تالانتىم شە؟ ونى نەگە شەكتەۋىم كەرەك؟! ءبىر كۇندە ساحناعا شىعام, ءان سالىپ, ءوزىمنىڭ تولىققاندى ادام ەكەنىمدى دالەلدەيمىن دەپ شەشتىم. ءسويتتىم دە اكەمە ءوز قالاۋىمدى ايتتىم. جۇرەگى جارىلارداي قۋاندى. اسىرەسە, انامنىڭ قايعىسى سەيىلگەندەي كورىندى ماعان. مەنى ويلاپ, قايعىدان قان جۇتىپ جۇرگەندەرىن جاقسى بىلەمىن عوي.
ءبىزدىڭ قوعام قولاربادا وتىرعان ادامداردى اياپ, مۇسىركەگەننەن ءارى اسپايدى. بىزگە ءولى مەن ءتىرىنىڭ اراسىنداعى شالاجانسارداي قارايدى. ال مەنىڭ وي-ءورىسىم, ماقساتىم, باعىتىم, قابىلەتىم – بارلىعى جالىنداعان وت سەكىلدى. ونىڭ الاۋىنا ءوزىم دە كۇيىپ كەتەردەي كۇي كەشەمىن. العاشقى ءانىمدى «ءبارى جاقسى بولارىنا سەنەمىن» دەپ اتادىم. حالىق جىلى قابىلدادى. وسى انمەن رەسپۋبليكالىق كونكۋرسقا قاتىسىپ, باس جۇلدەنى جەڭىپ, 5 ميلليون تەڭگەنى يەمدەندىم.
وتكەن جىلى پرەزيدەنت نۇرسۇلتان نازارباەۆ «التىن ساپا» جانە «پارىز» سىيلىقتارىن تاپسىرۋ جيىنىندا كاسىپكەرلەرگە, ۇكىمەتكە: «مۇگەدەك جانداردى كوپتەپ جۇمىسقا الىڭدار. ولاردىڭ دا اراسىندا بەلسەندى, قابىلەتتى ادامدار بارشىلىق», – دەپ قاداپ ايتتى. ەلباسىنىڭ وسى تاپسىرماسىنان كەيىن مۇمكىندىگى شەكتەلىپ قالعان كوپتەگەن ازاماتتارعا شەكسىز ءمۇمكىندىكتەر بەرىلە باستادى. ونىڭ قاتارىندا مەن دە بارمىن. ەلىمىزدىڭ باستى ارناسى, قارا شاڭىراق «قازاقستان» ۇلتتىق تەلەارناسىنا تەلەجۇرگىزۋشى بولىپ قابىلداندىم. قازىر ءار جۇما سايىن «جان جىلۋى» دەگەن الەۋمەتتىك تەلەجۋرنالدى ەل نازارىنا ۇسىنىپ كەلەمىز. بۇل – جاي حابار ەمەس, جىلاعان جۇرەكتەردى جۇباتىپ, الەۋمەتتىڭ الەۋەتىن كوتەرۋگە اتسالىسۋعا باعىتتالعان جوبا.
«جان جىلۋى» باعدارلاماسىنىڭ ەفيرگە شىققانىنا بيىل 5 جىل. وسى ۋاقىت ارالىعىندا باعدارلامانىڭ سەپتىگىمەن جەتىمدەر ۇيىنەن 20 بالا وتباسىنا بارىپ, جاڭا اتا-انا, تۋىس-باۋىردىڭ ورتاسىندا, 13 بالا شەتەلدەردە ەم الىپ, امان-ەسەن ەلگە ورالعان. قازىر ولاردىڭ بارلىعى دا ءوز قاتارىنا قوسىلىپ, جۇگىرىپ ءجۇر. «جان جىلۋىنىڭ» كومەگىمەن ءۇيسىز-كۇيسىز جۇرگەن 8 وتباسى باسپانالى بولدى. سونىمەن بىرگە, ەلباسىنىڭ «قازاقستاننىڭ الەۋمەتتىك جاڭعىرتىلۋى: جالپىعا ورتاق ەڭبەك قوعامىنا قاراي 20 قادام» اتتى باعدارلامالىق ماقالاسىندا ايتىلعان تالاپتارعا ساي كەلەتىن ادامدارمەن سۇحباتتاسامىن.
ولار – قول-اياعىنان ايىرىلسا دا, تاعدىرى بۇرالاڭ جولعا سالسا دا مويىماعان, ۇكىمەت ماعان نە بەرەدى دەپ قاراپ وتىرماعان, ەشكىمگە الاقان جايمايتىن ادامدار. ولاردا ماسىلدىق پيعىل جوق. ولار – مۇگەدەك بولسا دا ءوز ارباسىن ءوزى سۇيرەپ, بالا-شاعا, وتباسىن ەڭبەك تەرىمەن اسىراپ وتىرعان قايراتكەرلەر. ونداي ادامدار ءبىزدىڭ ارامىزدا از ەمەس. بىراق, ولاردى كوپشىلىك بىلە بەرمەيدى. ولار اۋىل-اۋىلداردا, شالعايدا جاتقان اۋدانداردا تۇرادى. ءبىز سول كىسىلەردى ىزدەپ تاۋىپ, تەپسە تەمىر ۇزەتىن, ون ەكى مۇشەسى ساۋ بولا تۇرا ەكى قولعا ءبىر ءىس تاپپاي جۇرگەن قانداستارىمىزعا ۇلگى ەتۋدى ماقسات تۇتتىق. مەنىڭ قولاربامەن تەلەارنا تىزگىنىن ۇستاۋىم وزىمە عانا ەمەس, وتباسىما, مەنى تانيتىن جورا-جولداستارىما قۋانىش سىيلادى.
ادام بولىپ ومىرگە كەلگەن سوڭ ەشكىمنەن كەم بولماي, قوعامدا ءوز ورنىڭدى تاۋىپ, ورتاڭا پايداڭدى تيگىزىپ عۇمىر كەشۋ قانداي باقىت! مەن ءوز تاعدىرىما رازىمىن. اياققا تۇرىپ ءجۇرىپ كەتۋدەن دە كۇدەرىمدى ۇزگەن ەمەسپىن. مەن باعىندىرار بەلەستەر ءالى دە الدا! بىزگە سەنىم ارتقان ەلباسىنىڭ ءۇمىتىن ءالى-اق اقتايمىز! قايتا قاتارعا قوسىپ, باقىتتى ساتتەر سىيلاعانىڭىز ءۇشىن وزىڭىزگە مىڭ العىس!
ارمان قارىنساۋ,
«جان جىلۋى» باعدارلاماسىنىڭ جۇرگىزۋشىسى.
استانا.