دارىگەرلەر شىڭى

الماتىنىڭ تاۋلارىن­داعى تۋريستىك ورىنداردى دامىتۋدى كوزدەيتىن بۇل باستاماعا س.اسفەندياروۆ اتىنداعى قازاق ۇلتتىق مەديتسينا ۋنيۆەرسيتەتىنىڭ رەكتورى مارات شورانوۆتىڭ ءوزى مۇرىندىق بولىپ, دارىگەرلەر شىڭىنا سال­ماعى ونداعان كيلو بولاتىن ورىن­دىقتى جەتكىزۋ ءۇشىن التى شاقىرىمنان استام جولدى ءجۇرىپ ءوتتى. ورىن­دىققا قازۇمۋ تۇڭعىش رەكتورى سانجار اسفەندياروۆتىڭ تۋعا­نىنا 135 جىل تولۋىنا ارنالعان تاقتايشا ىلىنگەن.

«جاستار اراسىندا سالاماتتى ءومىر سالتىن ناسيحاتتاۋعا ۇلكەن كوڭىل بولەتىندىكتەن, قىز­مەت­كەر­لە­رىمىزبەن بىرگە ستۋدەنت­تەر دە دا­رىگەرلەر شىڭىنا شىق­تى. قازۇمۋ مە­موريالدىق ورىندىعى وسى شىڭدى العاش باعىندىرعان ۋنيۆەرسيتەت تۇلەكتەرىنە قۇرمەت بەلگىسى رەتىندە قالعانىن قالايمىز. تاۋعا حح عاسىردىڭ 60-جىلدارىنان بەرى مەديتسينا سالاسىندا قىزمەت ەتىپ جۇرگەن بايىرعى جانە بولاشاق دارىگەرلەر كەلدى. تۋريستەرگە ارنالعان ورىندىقتار ورناتۋ چەللەندجى جالعاسىن تاپقانىن تىلەيمىز», دەيدى قازۇمۋ رەكتورى.

ال الماتى تاۋلارىنداعى دارىگەرلەر شىڭى گورەلنيك جو­تاسىنىڭ ورتاسىندا, گورەلنيك شاتقالى مەن كىشى الماتى شات­قالىنىڭ سۋ ايرىعىندا, مىڭ­جىلقى شىڭىنىڭ سولتۇس­تىگىندە ورنالاسقان. بۇل شىڭ ءوز اتاۋىن وتكەن عاسىردىڭ 60-جىلدارى, بۇرىنعى الماتى مەملەكەتتىك مەديتسينا ينستيتۋتىنىڭ الپينيستەر سەكتسياسىنىڭ ستۋدەنتتەرى باعىندىرعاننان كەيىن يەمدەنگەنىن ەسكە سالا كەتۋگە بولادى.

دارىگەرلەر شىڭىنا شىم­بۇلاقتان بىرنەشە شاقىرىم جاياۋ ءجۇرىپ وتىرىپ, جەتۋگە بولادى. جولاي پريبورنايا مەن مىڭجىلكى شىڭدارىن باعىندىرۋعا بولادى. وسى شىڭنىڭ جوتاسىنان تيتوۆ كولىنىڭ عاجايىپ كورىنىسىنە كۋا بولا الاسىز. جاز مەزگىلىندە اتالعان شىڭنىڭ اينالاسىنان تۋريستەردىڭ اياعى ۇزىلمەيدى, قىستا شاڭعى تەبۋگە كەلەدى. تيتوۆ مۇزدىق كولدەرى – ىلە الاتاۋىنىڭ ەڭ كورىكتى جەرلەرىنىڭ ءبىرى بولسا, جىل, تاۋلىك مەزگىلدەرىنە بايلانىس­تى سۇلۋلىعى قۇبىلىپ وتىرادى. دارىگەرلەر شىڭىنا باراتىن جولدا گورەلنيك سارقىرامالارىنا سوعا كەتۋگە بولادى.

وسىلايشا, 94 جىل بويى وتان­­دىق مەديتسينانىڭ مايتال­مان­دارىن دايارلاپ كەلە جات­قان ۇلت­تىق مەدي­تسينالىق ۋنيۆەر­سيتەتىنەن 100 مىڭداي دارىگەر تۇلەپ ۇش­قان ەكەن. قازىرگى تاڭدا ۋنيۆەرسي­تەت­تە 15 553 ستۋدەنت ءبىلىم الىپ جات­سا, ونىڭ ىشىندە 33 ەلدەن كەلگەن 2 879 شەتەلدىك ستۋدەنت بار. پەدا­گوگيكالىق ۇجىم 1292 ماماننان تۇ­رادى. تۇلەكتەردىڭ جۇمىسقا ورنالاسۋ دەڭگەيى 99,3 پايىزدى قۇرايدى.

الماتى