بۇگىن ەلورداداعى «نۇرلى جول» ۆوكزالىنان ءبىر توپ بالا «تۋعان ەلگە ساياحات» تانىمدىق پويىزىمەن جولعا شىقتى. جەتكىنشەكتەر 12 كۇن بويى قازاقستان وڭىرلەرىن ارالاپ, ەلىمىزدىڭ تاريحي-مادەني مۇرالارىمەن تانىسادى. ساپار كەزىندە جاس ساياحاتشىلار استانا, بۋراباي, الماتى, تاراز, تۇركىستان, بايقوڭىر قالالارىن ارالايدى.
جوبانىڭ كوزدەگەن ماقساتى – بالالاردىڭ جان-جاقتى دامۋىنا, قازاقستاننىڭ تاريحي-مادەني مۇرالارىمەن تانىسۋىنا مۇمكىندىك تۋعىزۋ. ساياحات بارىسىندا بالالار بىرقاتار قالالاردى ارالاپ قانا قويماي, تالىمگەرلەر ولاردى تابيعات پەن قورشاعان ورتانى ايالاۋعا باعىتتالعان ەكولوگيالىق ادەتتەرگە باۋليتىن بولادى.
بيىل جوباعا 10 مەن 15 جاس ارالىعىندا 400 بالا قاتىسادى.
«سامۇرىق-قازىنا» اق قارجىلاندىراتىن تانىمدىق-تۋريستىك پويىز التىنشى مارتە جولعا شىعىپ وتىر. الەۋمەتتىك جوبا بۇعان دەيىن 5 جىلدىڭ ىشىندە 3 مىڭعا جۋىق بالانى قامتىپ ۇلگەردى.
«قىمباتتى بالالار, سىزدەردى الدا قىزىقتى ساياحات ساپارى كۇتىپ تۇر. ەلىمىزدىڭ كورىكتى جەرلەرىن ارالاپ, مادەني-تاريحي مۇرالارمەن تانىساسىڭدار. «سامۇرىق-قازىنا» ارقاشان بالالارعا قولداۋ كورسەتۋگە دايىن. سىزدەر ساپالى ءبىلىم الىپ, جان-جاقتى دامۋ ءۇشىن ءبىز بارلىق جاعدايدى جاسايمىز», دەدى قور باسشىسى نۇرلان جاقىپوۆ.
جوباعا تابيعي اپاتتان زارداپ شەككەن وڭىرلەردەگى جانە قور كومپانيالار توبىنىڭ شالعاي جەرلەردە ورنالاسقان كاسىپورىندارىندا جۇمىس ىستەيتىن وندىرىستىك قىزمەتكەرلەردىڭ بالالارى شاقىرىلدى.
جالپى, بۇعان دەيىن «سامۇرىق-قازىنا» توبى تاسقىن سالدارىن جويۋ جۇمىستارىنا 22 ملرد تەڭگەدەن استام قاراجات بولگەن بولاتىن.
ساپار الدىندا «سامۇرىق-قازىنا» قورى «تازا قازاقستان» رەسپۋبليكالىق اكتسياسى اياسىندا بالالارعا ەكولوگيالىق مادەنيەتتى قالىپتاستىرۋ تۋرالى شەبەرلىك ساباقتارىن وتكىزدى. ماسەلەن, قوقىستاردى پويىزدا نەمەسە تابيعات اياسىندا قالدىرماي, كەرىسىنشە ولاردى سۇرىپتاپ, ءارى قاراي كادەگە جاراتۋ جاشىكتەرىنە سالۋعا ۇندەدى.
تاعى ءبىر ايتا كەتەرلىگى, مەكتەپ وقۋشىلارى جول بويى تالىمگەر-پەداگوگتەردىڭ جەتەكشىلىگىمەن ءتۇرلى ۇيىرمەگە, زياتكەرلىك جانە سپورتتىق ويىندارعا قاتىسادى.