وبلىس اكىمدىگىنىڭ قولداۋىمەن, مادەنيەت, ارحيۆتەر جانە قۇجاتتاما باسقارماسى, كەنەن ازىرباەۆ اتىنداعى وبلىستىق فيلارمونيانىڭ ۇيىتقى بولۋىمەن جامبىل وبلىسىنىڭ 85 جىلدىعى جانە كەنەن ازىرباەۆتىڭ 140 جىلدىعىنا وراي «كونە تاراز كۇمبىرى» اتتى ءۇشىنشى رەسپۋبليكالىق فولكلورلىق انسامبلدەر بايقاۋى ءوتتى.
ۇمىت بولا باستاعان بايىرعى مۋزىكالىق اسپاپتاردى ەل اراسىندا كەڭىنەن ناسيحاتتاۋ ماقساتىندا ۇيىمداستىرىلعان بايقاۋعا جالپى سانى 12 انسامبل قاتىستى. بايقاۋ بارىسىندا انسامبل مۇشەلەرى ءتورت شىعارمادان ورىنداپ, وزدەرىنىڭ كاسىبي دەڭگەيلەرىن كورسەتىپ باقتى. بارلىق ۇجىم ونەر دوداسىنا ايرىقشا دايىندىقپەن كەلگەنى كورىنىپ تۇردى.
ءىس-شارانىڭ اشىلۋ سالتاناتىندا ءسوز العان وبلىس اكىمدىگى مادەنيەت, ارحيۆتەر جانە قۇجاتتاما باسقارماسىنىڭ باسشىسى ەرلان ءجۇنىسباي تاراز تورىندە ءداستۇرلى تۇردە وتكىزىلىپ كەلە جاتقان بايقاۋ بيىل ءوڭىردىڭ 85 جىلدىق مەرەيتويى مەن ۇلت ماقتانىشى كەنەن ازىرباەۆتىڭ 140 جىلدىعىنا ارنالعانىن تىلگە تيەك ەتتى. ءداستۇرلى ونەردى دارىپتەۋ ماقساتىندا قولعا الىنعان ءىس-شارا الداعى ۋاقىتتا دا جالعاسىن تابا بەرەتىنىن جەتكىزىپ, قاتىسۋشى ۇجىمدارعا ساتتىلىك تىلەدى.
جامبىلدىق ونەرسۇيەر قاۋىم جەتىگەن مەن سازسىرنايدىڭ, شەرتەر مەن قىلقوبىزدىڭ ءۇنىن ساعىنعانىن ايقىن اڭعاردىق. ۇلتتىق ونەرگە اڭسارى اۋعان جەرگىلىكتى جۇرت ەلىمىزدىڭ ءار قيىرىنان كەلگەن مارتەبەلى مەيماندارعا اياماي قوشەمەت كورسەتتى.
رەسپۋبليكالىق دەڭگەيدە وتكەن ونەر الامانىندا كەيبىر ۇجىمداردىڭ ءباسى جوعارى ەكەنى اۋەلدەن-اق بايقالىپ تۇردى دەسەك, قاتەلەسە قويماسپىز. ماسەلەن, ماڭعىستاۋ وبلىسىنان كەلگەن «ناۋالى ساز», جەرگىلىكتى «قازاق ەلى» باستاعان بىرنەشە ءانسامبلدىڭ دەڭگەيى جوعارى ەكەنىن ماماندار دا ايتىپ جاتتى. كورەرمەندەر دە اتتارى اتالعان ونەر ۇجىمدارىنا ايرىقشا ءىلتيپات كورسەتكەنىن بايقادىق.
جوعارى دەڭگەيدە وتكەن ونەر بايقاۋىندا جەڭىلگەندەر جوق دەسەك تە بولادى. ويتكەنى ۇزدىك ۇشتىكتىڭ قاتارىنا قوسىلا الماعان بىرنەشە انسامبل ىنتالاندىرۋ سىيلىعىنا يە بولدى. ولارعا 150 مىڭ تەڭگەنىڭ سەرتيفيكاتى تابىستالدى.
بايقاۋ قورىتىندىسىندا ۇزدىكتەر قاتارىنا ءىلىنىپ, ءۇشىنشى ورىن يەلەنگەن ورالدىق «باستاۋ», الماتىلىق «قوبىز سارىنى» ونەر ۇجىمدارىنا 500 مىڭ تەڭگەنىڭ سەرتيفيكاتى بەرىلسە, ەكىنشى ورىن العان تۇركىستاندىق «اقسۋ» فولكلورلىق انسامبلىنە 600 مىڭ تەڭگەنىڭ سەرتيفيكاتى بۇيىردى. كوپشىلىك كۇتكەندەي ءبىرىنشى ورىندى ماڭعىستاۋلىق «ناۋالى ساز» ءانسامبلى يەلەندى. ۇجىمعا 800 مىڭ تەڭگەنىڭ سەرتيفيكاتى تابىستالدى. ال باس جۇلدەنى يەلەنگەن جامبىلدىق «قازاق ەلى» ەتنو توبى 1 ميلليون تەڭگەنى قانجىعاسىنا بايلادى.
جامبىل وبلىسى