مەملەكەت باسشىسى ن.ءا.نازارباەۆتىڭ بيىلعى “جاڭا ونجىلدىق – جاڭا ەكونوميكالىق ورلەۋ – قازاقستاننىڭ جاڭا مۇمكىندىكتەرى” اتتى ەل حالقىنا جولداۋىندا تۇرعىن ءۇي-كوممۋنالدىق شارۋاشىلىق جۇيەسىن دامىتۋعا ءجىتى نازار اۋدارىلعان بولاتىن. وسىعان وراي قازاقستان ۇكىمەتىنە 2011 جىلعا دەيىن جىلۋ, گاز, سۋ جانە ەلەكترمەن جابدىقتاۋ ينفراقۇرىلىمدارىنىڭ رەنتابەلدىلىگىن ارتتىرۋعا قاتىستى تۇرعىن ءۇي-كوممۋنالدىق شارۋاشىلىعىن كەڭ اۋقىمدى جاڭعىرتۋدىڭ جوسپارىن ازىرلەۋ ماسەلەسى تاپسىرىلعان-دى. وزىندىك پايدالانۋ شىعىندارىن تومەندەتۋ جانە رەسۋرس ساقتاۋ تەحنولوگيالارىن ەنگىزۋدى قامتاماسىز ەتۋ مىندەتى بەلگىلەندى.
بۇل باسىمدىقتى جۇزەگە اسىرۋ ماقساتىندا وتكەن جىلدىڭ قاراشا ايىندا ۇكىمەت قاۋلىسىمەن “تۇرعىن ءۇي-كوممۋنالدىق شارۋاشىلىعىن جاڭعىرتۋ مەن دامىتۋدىڭ قازاقستاندىق ورتالىعى” اكتسيونەرلىك قوعامى قۇرىلىپ, وعان يننوۆاتسيالىق تەحنولوگيالاردى ەنگىزۋ, تالدامالار جانە عىلىمي زەرتتەۋلەر جۇرگىزۋ ماسەلەلەرى قوسا جۇكتەلدى.
ەلباسىنىڭ جوعارىدا اتالعان جولداۋىندا تۇرعىن ءۇي-كوممۋنالدىق شارۋاشىلىعى سالاسىنداعى ينفراقۇرىلىمداردى جاڭعىرتۋ رەسۋرس ۇنەمدەۋشى تەحنولوگيالاردى ەنگىزۋمەن قاتار ءجۇرۋى قاجەتتىلىگى ناقتى كورسەتىلگەن. وسىناۋ جاۋاپتى مىندەتتى ورىنداۋ ماقساتىندا ورتالىقتا تۇرعىن ءۇي-كوممۋنالدىق شارۋاشىلىعى سالاسىنا قاتىستى 20 نورماتيۆتىك-تەحنيكالىق قۇجاتتار جانە تۇرعىن ءۇي-كوممۋنالدىق شارۋاشىلىعى سالاسىندا 2011-2015 جىلدارعا ارنالعان عىلىمي-تەحنيكالىق, يننوۆاتسيالىق, رەسۋرس ۇنەمدەۋشى تەحنولوگيالاردى ەنگىزۋ باعدارلاماسى ازىرلەنۋ ۇستىندە. سونداي-اق, يننوۆاتسيالىق جانە ينجينيرينگتىك كومپانيالاردى قۇرۋ باعىتىندا جۇمىستار جۇرگىزىلۋدە. سونىمەن قاتار, وسى سەگمەنتتىڭ جاڭا دەڭگەيگە كوتەرىلۋىنە جاعداي جاسايتىن “پايدالى اسەر كوەففيتسيەنتى جوعارى جانە زياندى قالدىقتاردى از شىعاراتىن قازاندىقتاردى قولدانۋ بازاسىندا, تۇرعىن ءۇي قورىنا سۋ مەن جىلۋدى جەتكىزۋ, تۇتىنۋ, جانە ءوندىرۋ تەحنولوگيالارىن دامىتۋ” باعدارلاماسى ازىرلەنۋ ۇستىندە. جەراستى قۇبىرلارى مەن كوممۋنيكاتسيالارىن قورعايتىن جانە ولاردىڭ سەنىمدىلىگى مەن قىزمەت كورسەتۋ مەرزىمىنىڭ ۇزارۋىن قامتاماسىز ەتەتىن زاماناۋي ەكونوميكالىق ءتاسىلدەردى جانە ءپاسسيۆتى جانە كەشەندى اكتيۆتى ادىستەردى جاساۋ جۇرگىزىلۋدە.
بۇگىندە, “نۇر وتان” حدپ مەن “جاس وتان” جاستار قاناتىمەن بىرلەسە وتىرىپ, ماۋسىم-شىلدە ايلارىندا “تۇرعىن ءۇي-كوممۋنالدىق شارۋاشىلىعى سالاسىنداعى ەنەرگيا جانە رەسۋرس ساقتاۋشى جوبالاردىڭ رەسپۋبليكالىق كونكۋرسىن” وتكىزۋدى ۇيىمداستىرىپ وتىر. اتالمىش بايگە جاڭعىرتۋدى, يننوۆاتسيالىق تەحنولوگيالاردى ەنگىزۋدى, كاسىپكەرلىك جانە قوعامدىق باستامالاردى ىنتالاندىرۋدى, سونداي-اق سالالىق عىلىمي-پراكتيكالىق زەرتتەۋلەردى ەسكەرە وتىرىپ, تۇرعىن ءۇي-كوممۋنالدىق شارۋاشىلىعى سالاسىنىڭ ينۆەستيتسيالىق تارتىمدىلىعىن ارتتىرۋعا باعىتتالعان. بۇل جوبا تۇرعىن ءۇي-كوممۋنالدىق شارۋاشىلىعى سالاسىندا مەملەكەتتىڭ ءداستۇرلى جاۋاپكەرشىلىگى بولىپ ەسەپتەلەتىن قوعامدىق ماڭىزى زور, بىراق ەكونوميكالىق تۇرعىدان ءتيىمسىز جانە رەنتابەلدى ەمەس سەگمەنتتەرىن جەكە سەكتوردىڭ رەسۋرستىق جانە ينتەللەكتۋالدىق الەۋەتىن اۋقىمدى تۇردە تارتۋ ارقىلى شەشۋگە ارنالعان.
ءابدىراحمان قىدىربەك.