ادامنىڭ قابىلەتى مەن مۇمكىندىگى عالامات. تەك ءوز بويىنداعى سول بولەكشە قاسيەتتى ءتۇرلى جاتتىعۋلار ارقىلى ۇدايى جەتىلدىرە ءبىلۋ كەرەك. سوندا عانا ادام ايتسا نانعىسىز ناتيجەگە قول جەتكىزە الادى. ماسەلەن, توعىز جاسىندا اعىلشىن تىلىنەن ەرەسەكتەرگە ساباق بەرىپ, ون ءتورت جاسىندا ەكى بىردەي وقۋ ورتالىعىن اشىپ, حالىقارالىق IELTS ەمتيحانىنان 8,5 بالل العان مەكتەپ وقۋشىسى سايا قىدىرالى – ءسوزىمىزدىڭ جارقىن دالەلى.
«قاتارىڭنىڭ الدى بول» دەيدى باتالى سوزدە. تالاپ, تالانتىمەن كوپتى ءتانتى ەتكەن سايا قازىر قاتارلاستارىن باسىپ وزىپ, ۇلكەندەردىڭ وزىنە ۇلگى بولىپ ءجۇر. العىر قىز اعىلشىن ءتىلىن تەز ۇيرەنۋدىڭ تەتىكتەرىن التى جاسىندا مەڭگەرىپ, نەبارى توعىز جاسىندا وزگەلەرگە شەت ءتىلىن ۇيرەتە باستاعان. 10-سىنىپ وقۋشىسىنىڭ بۇگىندە 2000-نان استام شاكىرتى بار. ءوزى مەكتەپتە ءجۇرىپ, مۇنىڭ بارىنە ول قالاي, قاشان ۇلگەرىپ ءجۇر؟ اعىلشىن تىلىنە العاش قالاي قىزىقتى؟
«اباي اتامىز وتىز سەگىزىنشى قاراسوزىندە «عىلىم-ءبىلىمدى اۋەل باستان بالا ءوزى ىزدەنىپ تاپپايدى. باسىندا زورلىقپەنەن ياكي الداۋمەنەن ءۇيىر قىلۋ كەرەك, ۇيرەنە كەلە ءوزى ىزدەگەندەي بولعانشا» دەيدى عوي. راسىمەن, اعىلشىن ءتىلىن التى جاسار بالانىڭ سانالى تۇردە ۇيرەنۋى ەكىتالاي. وسىنى بىلگەن انام ءتۇرلى ويىندار ارقىلى بەس جاسىمدا شەت تىلىنە قىزىعۋشىلىعىمدى وياتتى. ءارى قاراي ءوزىمنىڭ دە ىنتام ارتىپ كەتتى. وسىلايشا, شەتەلدىك ماقالالاردى وقىپ, اي سايىن ەمەس, كۇن سايىن ءبىلىمىمدى شىڭداي ءتۇستىم. ال قازىر ساباقتان تىس ۋاقىتىمدا زياتكەرلىك مەكتەپتەردە ساباق بەرىپ, قوسىمشا تابىس تابامىن», دەيدى س. قىدىرالى.
ايتا كەتەيىك, العىر قىز اناسىنىڭ سەنىمى مەن قولداۋىنا العىس رەتىندە بيىل پاتەر سىيلاعان. سايانىڭ ەندىگى ماقساتى – جوعارى ءبىلىم الىپ, بىلىكتى مامان بولۋ. ۇيرەنۋدەن جالىقپايتىن, ۇيرەتۋدەن ايانبايتىن جانعا ءبىز دە ءسات-ساپار تىلەيمىز.