وتكەن وقۋ جىلىندا وبلىس ورتالىعىنىڭ وقۋشىلارى ءتۇرلى ءبىلىم دودالارىندا توپ جارىپ, حالىقارالىق بايقاۋلاردان جۇلدەلى ورالدى. جەتىستىككە جەتكەن ورەندەرگە پاۆلودار قالاسى اكىمىنىڭ اتىنان 100 مىڭ تەڭگەلىك سەرتيفيكات تابىس ەتىلدى.
ەرتىس وزەنىنىڭ جاعالاۋىندا ورنالاسقان «Ertis Promenad» ساحناسىندا ۇزدىك وقۋشىلاردىڭ قۇرمەتىنە سالتاناتتى كەش ۇيىمداستىرىلىپ, رەسپۋبليكالىق, وبلىستىق وليمپيادالاردىڭ, رەسپۋبليكالىق جانە حالىقارالىق زەرتتەۋ جوبالارى كونكۋرستارىنىڭ جەڭىمپازدارى مەن جۇلدەگەرلەرى ماراپاتتالدى. اقشالاي سىيلىق جالپى سانى 51 وقۋشىعا تاپسىرىلدى.
پاۆلودار قالاسى اكىمىنىڭ ورىنباسارى سۆەتلانا گلادىشەۆا وقۋشىلاردى قۇتتىقتاپ, قالا باسشىسىنىڭ اتىنان 100 مىڭ تەڭگە سوماسىنا اقشالاي سەرتيفيكات, العىسحات تابىس ەتتى.
«مۇنداي سالتاناتتى ءىس-شاراعا دارىندى وقۋشىلاردىڭ قاتىسۋى – وتە قۇپتارلىق باستاما. ءبىزدىڭ قالامىزدىڭ وقۋشىلارى وتكەن وقۋ جىلىندا 60 مەدال, ونىڭ ىشىندە 14 التىن, 15 كۇمىس جانە 31 قولا مەدال جەڭىپ الدى. سونىڭ ناتيجەسىندە شاھارىمىزدىڭ وليمپيادالىق كومانداسى پاۆلودار وبلىسىنىڭ قالالارى اراسىنداعى «ۇزدىك وليمپيادالىق كوماندا» اتاعىن تاعى ءبىر مارتە قورعاپ قالدى», دەيدى «پاۆلودار دارىنى» بالالاردىڭ بوس ۋاقىتىن قامتۋ جانە دارىندىلىعىن دامىتۋ ورتالىعىنىڭ باسشىسى اقمارال مۇحامەتجانوۆا.
قالا اكىمىنىڭ سىي-قۇرمەتىنە, سونداي-اق دارىندى بالالاردى دايىنداعان ۇستازدار دا بولەندى. ناتيجەلى ەڭبەگى مەن جوعارى كاسىبي شەبەرلىگى ءۇشىن 46 پەداگوگكە قۇرمەت كورسەتىلدى. ولار پاۆلودار قالاسى اكىمىنىڭ العىسحاتىمەن ماراپاتتالدى.
پاۆلودار