بيىلعى وقۋ جىلىندا وڭىرىمىزدەگى 321 مەكتەپتىڭ 11-سىنىبىن 9 236 تۇلەك اياقتاسا, ونىڭ 480-ءى «التىن بەلگىگە», 663-ءى جالپى ورتا ءبىلىم تۋرالى ۇزدىك اتتەستاتقا يە بولدى. ال اقتوبە وبلىسىندا ۇلتتىق بىرىڭعاي تەستىلەۋدى تاپسىرۋ مەرزىمى 25 مامىردان 11 شىلدەگە دەيىن جالعاسادى.
وبلىستىق ءبىلىم باسقارماسى باسشىسىنىڭ ورىنباسارى نۇرگۇل بەرتىلەۋوۆانىڭ ايتۋىنشا, جوعارى ءبىلىم جانە عىلىم مينيسترلىگى سۋ تاسقىنىنان زارداپ شەككەن وڭىرلەردىڭ قاتارىندا بولعان اقتوبە وبلىسىنىڭ تۇلەكتەرى ءۇشىن تەستىلەۋ مەرزىمىن 11 شىلدەگە دەيىن سوزعان.
«قازىر اپتانىڭ ءار كۇنىندە تەست ورتالىعىندا سىناق ءوتىپ جاتىر. وسى ۋاقىتقا دەيىن قانشا تۇلەگىمىز ۇبت تاپسىردى, قانشاسى ەندى تاپسىرادى دەگەن سۇراققا جاۋاپ بەرە المايمىز. بىزگە ونداي مالىمەت تۇسپەيدى. ويتكەنى ۇبت وتكىزۋگە ۇلتتىق تەستىلەۋ ورتالىعىنىڭ ماماندارى جاۋاپتى, تەست تاپسىرعاندارعا قاتىستى بارلىق دەرەك سول جەردە ساقتالادى. وبلىستىق ءبىلىم باسقارماسىنىڭ قىزمەتكەرلەرى 2017 جىلعا دەيىن ۇبت قورىتىندىسى بويىنشا وڭىردەگى مەكتەپتەردىڭ ءبىلىم ساپاسىنا تالداۋ جاساپ ءجۇردى. ويتكەنى تەستىلەۋ قالا مەكتەپتەرىندە جۇرگىزىلەتىن. ال, 2022 جىلدان باستاپ تەستىلەۋ فورماتى تۇبەگەيلى وزگەرىپ, ء«بىر تەستىلەنۋشى – ءبىر كومپيۋتەر – ەكى كامەرا» ەرەجەسىمەن تاپسىرۋ جولعا قويىلعاننان باستاپ, بارلىق جاۋاپكەرشىلىك ۇلتتىق تەستىلەۋ ورتالىعىنا جۇكتەلدى», دەيدى ن.بەرتىلەۋوۆا.
اقتوبە وبلىسىندا ەكى تەستىلەۋ ورتالىعى اشىلعان. ءبىرى وبلىس ورتالىعىندا, ەكىنشىسى – شالقار قالاسىندا. وڭىرىمىزدە مەكتەپ بىتىرۋشىلەردىڭ ۇبت-عا تىركەلۋى 6 مامىردا باستالدى. وعان 8 342 (بارلىق مەكتەپ بىتىرۋشىلەردىڭ 90,2%-ى) تۇلەك ەكى مۇمكىندىكپەن تاپسىرۋعا 16 556 ءوتىنىش جازعان. ودان وزگە وتكەن جىلدارى مەكتەپ, كوللەدجدەردى اياقتاعان 994 بالا تولىق وقۋ مەرزىمىنە وقۋعا, ال 289 كوللەدج تۇلەگى قىسقارتىلعان وقۋ مەرزىمىنە ءبىلىم گرانتىن الۋعا ءوتىنىش جازىپتى. بيىلعى ۇلتتىق تەستىلەۋدە ءتورت ءپان بويىنشا 120 سۇراق قامتىلعان: «قازاقستان تاريحى» پانىنەن – 20, «وقۋ ساۋاتتىلىعىنان» – 10, «ماتەماتيكالىق ساۋاتتىلىقتان» – 10 تاپسىرما جانە تۇلەك تاڭداعان ەكى بەيىندىك ءپان بويىنشا 40 تاپسىرما جۇكتەلدى.
اقتوبە وبلىسى