سەناتتا ء«بىر ەل – ءبىر مۇددە» دەپۋتاتتىق توبىنىڭ وتىرىسى ءوتىپ, وندا «اسسامبلەيا. پارلامەنت. ءماسليحاتتار» قوعامدىق جوباسى تانىستىرىلدى. جوبانىڭ ماقساتى – پارلامەنت دەپۋتاتتارىنىڭ, بارلىق دەڭگەيدەگى ءماسليحاتتاردىڭ, مەملەكەتتىك ورگانداردىڭ, قازاقستان حالقى اسسامبلەياسىنىڭ ءوزارا تۇراقتى ءىس-قيمىل جۇيەسىن ۇيىمداستىرۋ.
سەناتور زاكىرجان كۋزيەۆ ۇلتتىق قۇرىلتاي وتىرىسىندا مەملەكەت باسشىسى جاڭا قوعامدىق ەتيكانى ورنىقتىرۋدا ورتالىق ورگاندار عانا ەمەس, سونىمەن قاتار وڭىرلىك بيلىك ءرولىنىڭ ماڭىزدىلىعىن دا اتاپ وتكەنىن, قوعامدا وسكەلەڭ ءومىردى باعدار ەتەتىن جانە دۇنيەتانىمنىڭ اجىراماس بولىگىنە اينالاتىن ۇستانىمنىڭ كەڭىنەن قانات جايۋى ءۇشىن ءتيىمدى تەتىكتەر ىزدەۋ مەن ۇسىنۋ جانە ىلگەرىلەتۋدە ورتالىق پەن وڭىرلەر تىعىز بايلانىستا جۇمىس ىستەۋى تۋرالى ايتقانىن اتاپ ءوتتى.
جوبانىڭ نەگىزىندە باستى قۇندىلىقتار – زاڭ مەن ءتارتىپ جاتقانىن ايتقان سەناتور بيلىكتىڭ زاڭ شىعارۋشى تارماعىنىڭ وكىلدەرى ءۇشىن پرەزيدەنتتىڭ «زاڭ الدىندا ءبارى تەڭ» دەگەن ءسوزىنىڭ تەرەڭدىگى مەن ماڭىزدىلىعىن ءتۇسىنۋ – مىزعىماس قاعيدا ەكەنىنە توقتالدى. «مەملەكەت ەشقاشان باسسىزدىق پەن حاوسقا جول بەرمەيدى. زاڭدى بارلىق ادام بارلىق جەردە قاتاڭ ساقتاۋى كەرەك. ءبىز زاڭ شىعارۋشىلار رەتىندە زاڭنامالىق نورمالاردى جاساپ قانا قويماي, سولاردىڭ نەگىزىندە قوعامداعى ماڭىزدى يدەولوگيالىق قۇندىلىقتاردى دامىتۋ مەن نىعايتۋعا مۇمكىندىك جاساۋىمىز كەرەك. ۇلتتىق قۇرىلتاي وتىرىسىندا مەملەكەت باسشىسى ءبىزدىڭ دۇنيەتانىمىمىزدىڭ بولىنبەس بولشەگىنە اينالاتىن وزىق ۇستانىمداردى ناسيحاتتاۋدىڭ ءتيىمدى تەتىكتەرىن ىزدەۋ, ۇسىنۋ مەن دامىتۋ مىندەتىن العا قويدى. مەملەكەتتىك اپپارات پەن بارلىق سالاماتتى قوعامدىق كۇشتەر وسى جولدا تىزە قوسىپ ارەكەت ەتۋگە ءتيىس. مىنە, ءبىزدىڭ جوبامىز دا وسىنداي ماقساتتا ومىرگە كەلدى», دەدى ول.
ز.كۋزيەۆ جوبانى ىسكە اسىرۋ بارىسىندا حالىقتىڭ وزەكتى ماسەلەلەرى ايقىندالاتىنىن, ول پارلامەنت, ءماسليحاتتار دەپۋتاتتارىنىڭ جۇمىسىندا جانە ولاردىڭ ءوزارا ءىس-قيمىلىندا كورىنىس تاباتىنىن جەتكىزدى. ء«بىز ءوز جۇمىسىمىزدا اسسامبلەيانىڭ جانە وكىلدى بيلىكتىڭ وزەكتى ماسەلەلەرى مەن مىندەتتەرىنىڭ بارلىق سالاسىن قامتيتىن بولامىز, سونداي-اق پارلامەنت پەن بارلىق دەڭگەيدەگى ءماسليحات دەپۋتاتتارىنىڭ قحا وكىلدەرى مەن ەتنومادەني بىرلەستىكتەر باسشىلارىنىڭ قاتىسۋىمەن جەرگىلىكتى جەردەگى ەتنوسارالىق قاتىناستار ماسەلەسىن تۇراقتى قاراۋدى قامتاماسىز ەتەمىز. ءبىزدىڭ جۇمىسىمىزدىڭ باستى باعىتى ارقاشان ەتنوالەۋمەتتىك شيەلەنىستىڭ ىقتيمال وشاقتارىن انىقتاۋ جانە الدىن الۋ بولۋعا ءتيىس», دەدى ول.
سەناتور جوبا اياسىندا وتكىزىلەتىن ءىس-شارالار جوسپارىنا دا توقتالىپ ءوتتى. ونىڭ ايتۋىنشا, ء«بىر ەل – ءبىر مۇددە» دەپۋتاتتىق توبىنىڭ وكىلدەرى رەسپۋبليكالىق ەتنومادەني بىرلەستىكتەردىڭ جەتەكشىلەرىمەن ولاردى تولعاندىرعان بارلىق ماسەلەنى تالقىلاۋ ماقساتىندا سەمينار-كەڭەس وتكىزىپ وتىرماق.
«پارلامەنتتەگى ء«بىر ەل – ءبىر مۇددە» دەپۋتاتتىق توبى وكىلدەرىنىڭ استانا, الماتى, شىمكەنت قالالارى مەن وبلىستارداعى ماسليحاتتارمەن ءوزارا ءىس-ارەكەتىن ۇيىمداستىرۋ بويىنشا رەسپۋبليكالىق كونفەرەنتسيا جوسپارلانعان. پارلامەنت دەپۋتاتتارى ءۇشىن ايماقتارعا شىعۋ كەزىندە بارلىق دەڭگەيدەگى ءماسليحات دەپۋتاتتارىمەن كەزدەسۋ وتكىزۋ مىندەتتى بولادى. ايماق ءماسليحاتتارى حاتشىلارىنىڭ قحا ەتنومادەني بىرلەستىكتەرى جانە قوعامدىق قۇرىلىمدارىنىڭ وكىلدەرىمەن تۇراقتى كەزدەسۋلەرى قاراستىرىلعان. دوستىق ۇيلەرىندە پارلامەنت, ءماسليحات دەپۋتاتتارىنىڭ ەتنومادەني بىرلەستىكتەردىڭ, قحا قۇرىلىمدارىنىڭ, حالىق وكىلدەرىمەن كەزدەسۋى ءۇشىن اي سايىنعى «دەپۋتاتتىق ساعات» ۇيىمداستىرىلادى. كەرى بايلانىس تەتىكتەرىن قالىپتاستىرۋ ءۇشىن قحا تاراپىنان سايلانعان سەنات دەپۋتاتتارىنىڭ جاۋاپتى ايماقتارداعى بارلىق دەڭگەيدەگى ءماسليحاتتار دەپۋتاتتارىمەن جۇمىس كەزدەسۋلەرىن تۇراقتى وتكىزۋ ۇسىنىلادى», دەدى ز.كۋزيەۆ.
سەناتور ۇلتارالىق سيپاتتاعى بارلىق كيكىلجىڭدەردى ورتالىققا جەتكىزبەي, ءوز ايماعىندا شەشۋگە تىرىسۋ قاجەتتىگىن ەسكە سالدى. «بۇل جۇمىسقا جەرگىلىكتى ءماسليحاتتاردىڭ وكىلدەرى قاتىسۋى كەرەك. ۇلتارالىق كيكىلجىڭدەردىڭ 90 پايىزى تۇرمىستىق سيپاتقا يە. ونى ورتالىققا جەتكىزبەي, جەرگىلىكتى دەڭگەيدە شەشكەن ورىندى ءارى ءتيىمدى. بۇگىن ءبىز ايماقتارداعى ءماسليحاتتار جانىنان قحا دەپۋتاتتىق توپتارىن قۇرامىز. مۇندا تاجىريبە بۇرىن بولعان جانە جاقسى ناتيجەسىن كورسەتكەن. جالپى العاندا, ۇلتارالىق قاتىناستاردىڭ وزەكتى ماسەلەلەرىن شەشۋ ءماسليحاتتاردىڭ كۇندەلىكتى قىزمەتىنىڭ نەگىزى سانالادى, ويتكەنى ولار ەل تۇرعىندارىنىڭ بەت-بەينەسىن كورسەتەدى», دەدى ول.
جيىن بارىسىندا سەناتور ولگا بۋلاۆكينا ەلىمىزدە 100-دەن استام ەتنوس بار ەكەنىن اتاپ ءوتتى. بۇل ءبىزدىڭ ەلىمىزدى بەيبىت ءومىر سۇرۋمەن قاتار ءوزارا سىيلاستىق دەموكراتيالىق قۇقىقتىق ازاماتتىق قوعام قۇرۋعا نەگىز بولعان الەمدەگى كوپ ەتنوستى ەلدەردىڭ بىرىنە اينالدىرادى. «اسسامبلەيا. پارلامەنت. ءماسليحاتتار» قوعامدىق جوباسىنىڭ اۋقىمىنداعى سىندارلى ديالوگ زاڭمەن بەكىتىلە وتىرىپ, قوعامدىق, كونفەسسياارالىق جانە ەتنوسارالىق كەلىسىمدى ساقتاۋدىڭ نەگىزگى قۇرالدارىنىڭ بىرىنە اينالادى. سونداي-اق ءپىسىپ-جەتىلگەن الەۋمەتتىك وزگەرىستەردى ۋاقتىلى جانە قولايلى شەشۋگە, لايىقتى ءومىر ءسۇرۋ جاعدايىن جاساۋعا ىقپال ەتەدى.
شىعىس قازاقستان وبلىستىق ءماسليحاتىنىڭ توراعاسى دەنيس رىپاكوۆ وڭىرلەر ءماسليحاتتارىنىڭ جانە قحا قۇرىلىمدارىنىڭ جۇمىسى تۋرالى ايتىپ بەردى. ماسەلەن, ءماسليحات توراعالارى مەن دەپۋتاتتار كەڭەستەردىڭ وتىرىستارىنا, وڭىرلىك سەسسيالارعا قاتىسادى جانە ەتنومادەني بىرلەستىكتەردىڭ وكىلدەرىمەن كەزدەسەدى. جوبانى ىسكە اسىرۋ بۇل جۇمىستى بارلىق وڭىردە جۇيەلەۋگە, مەكەمەارالىق جۇمىس جوسپارلارى مەن جول كارتالارىن ازىرلەۋگە مۇمكىندىك بەرەدى.